20.ಅರ್ತ ತೆರಿಲೆ, ಗುರ್ತ ಮಲ್ಪುಳೆ

ಪೂಮಾಲೆ.ಬ್ಲಾಗ್ಸ್ಪಾಟ್ಡು ಏಪ್ರಿಲ್ ಪತ್ತುಗು ಅಚ್ಚಾತಿನ  ಅಂಚೆ 18-ನು ಓದುದುಪ್ಪರ್.  ವಿಸಯ: ”ಒಗಟುಲಾ-ಗಾದೆಲಾ – ಗೊಂಚಿಲ್ 9”. ಆಯಿಟ್ ಸೇರಿದಿನ ಒಂಜಿ ಚುಟುಕುದ ಪಾತೆರೊ: “ಅರ್ತ ತೆರಿಲೆ, ಗುರ್ತ ಮಲ್ಪುಳೆ”.  ಈ ನಾಣ್ಣುಡಿದ ಅರ್ಥ ಇಂಚ ಬುಡುಪಾವುದೆ:

1.  ಶಬ್ದ ಬಂಧದ ಆಟ:  ಅಡ್ಡ ಪದಬಂಧದ ಖಾಲಿ  ಜಾಗೊನು ದಿಂಜಾವೆರೆ, ಚಕ್ರಪಾದ ಸವಾಲುಡು ಕೊರ್ತಿನ ಸೂಚನೆನು ಅರ್ಥ ಮಳ್ಪೊಡು  ಬೊಕ್ಕಸರಿ ಸಬುದೊನು ಗುರ್ತು ಮಳ್ಪೊಡು.

2.  ಒಗಟುದ ಅರ್ಥ ಬುಡಪಾವುದು ಆಯಿಟ್ ನಡೆತಿನ ವಸ್ತು ಅಥವಾ ಕೆಲಸ  ಎಂಚಿನ ಇಂದುದು ನಾಡ್ಡು ಪತ್ತೊಡು ,

3.  ಒರಿಯನೊಟ್ಟುಗು ಇತ್ತುದು ಆಯಿ ಎಂಚಿನ ಸ್ವಭಾವದಾಯಿ ಇಂದುದು ಅಂದಾಜು ಮಲ್ತೊನುದು, ಅರ್ಥ ಮಲ್ಪೋಡ್.  ನಾಲಾಯಿ ನಮ್ಮ ಗುಣ-ದೋಷದ ಕನ್ನಡಿ ಪಣ್ಪೆರ್ ಅತ್ತೆ?

ಗುರ್ತ ಪನ್ನುಣ್ಡ ಎಂಚಿನ

ಒಂಜಿನೆ ಅಂಕೆಡ್ ಪಣ್ತಿನಂಚ,  ಉಂದೊಂಜಿ  ಒಗಟುಂದುಲಾ ಪಣೋಲಿ.  ಈ ನುಡಿಗಟ್ಟುಗು ನನಲಾ ಅರ್ಥ ಕಟ್ಟೊಲಿ.   ಸಾದಿಡ್ ಪೊನಗ ಒರಿ ತಿಕ್ಕುವೆ, ಅಯನ ಗುರ್ತ ಪನ್ಪೆ: ಅಂಚಿನಯಿ, ಇಂಚಿನಯಿ, ಅಲ್ಪ ಇತ್ತ ಒಟ್ಟುಗು ಇಂದುದು.  ನಮಕು ಅರ್ಥ ಆಪುಜಿ.  ಅಂಚೆನೇ,ನಮಲಾನಮ ಗುರ್ತದ ಜನ ಅಪರೂಪೊಗು  ತಿಕ್ಕನಗ, ಗುರ್ತು ಪಾತೆರುವ. ಆಯಗು ಗುರ್ತ ಪತ್ತುಜಿ.ಇತ್ತೆ ತರತರತ ಗುರ್ತುದ ಚೀಟಿಲೆನು ತೂದು, ಅರ್ತ ಮಳ್ತುದು ಕಚೇರಿಡು ಗುರ್ತ ಮಲ್ಪುವೆರು.ನೆಕ್ಕು ದಾನೆ ಪಣೋಲಿ?

ಅರ್ತ ಮಲ್ತುದು ಗುರ್ತ ಮಲ್ಪುನೆಕ್ ಬೇತೆ ದಾಲ ವಿಶೇಷ ಅರ್ಥ ಉಪ್ಪಾ? ರೂಪ ಚರ್ಯೆಡ್ ತೆರಿದು ಗುರ್ತ ಪತ್ತುನು, ಪ್ರಾಪಂಚಿಕ ಅರ್ಥೊಡು.   ಅಧ್ಯಾಮಿಕ ಅರ್ಥೋಡ್ ಗುರ್ತ ಪತ್ತುವೆರ?‘ಸೋಹಂ’ (That is it),‘ತತ್ವಮಸಿ’ (Thou art that): ಈ/ಅವು ಅವ್ವೆ ಆದುಲ್ಲಾ) ತತ್ವ  ವಾಕ್ಯನೊಳೆನು ಕೇಣ್ದುಲ್ಲರ್.  ಉಂದು ಸ್ಥೂಲ-ಸೂಕ್ಷ್ಮ ರೂಪೊಡು ದೇವೆರೆಗುಲಾ, ವ್ಯಕ್ತಿ ಮಾತ್ರೊಗುಲಾ ಸರಿ ಹೊಂದುನು. 

ಜಗತ್ತುದ ಮೂಜಿ ಅವಸ್ಥೆ

ಸೃಷ್ಟಿ-ಸ್ಥಿತಿ-ಲಯ.  ಪುಟ್ಟು-ಸಾವುದ  ನಡುಟು ಸ್ಥಾವರ-ಜಂಗಮ ಜೀವ ರಾಶಿಳು  ಜೀವೊಡು ಉಳ್ಳ. ಈ  ಜೀವರಾಶಿಡು  ಮನುಷ್ಯ ಪ್ರಾಣಿಲಾ ಸೇರ್ದುಂಡು–ದೇವಾಂಶ  ಆತ್ಮರೂಪೊಡು  ದೇಹಧಾರಿಯಾದು.

ನಿಯಾಮಕೆ ಒರಿ

ಈ ಜಗತ್ತುದ ಅಧಿದೇವತೆ ಅಥವಾ ಆದಿಶಕ್ತಿ ಏರ್? ಈಶ್ವರನೇ ಆವೊಲಿ, ಹರಿಯೆ ಆವೊಲಿ. ಆದಿಮಾತೆನೆ ಆವೊಲಿ (ದೇವೆರೆಗುಲಿಂಗ ಭೇದವಿಜ್ಜಿ). ದಾಯೆಗ ಪನ್ನಗ, ಆಯಿ ಪಂಚ ಭೇದೊಡು  ತೋಜಿ ಬರ್ಪಿನ ಪಂಚ ರೂಪಾತ್ಮಕೆ. ಈ  ಶ್ಲೋಕ ಕೇಣ್ಲೆ :

ನಾರಾಯಣಾಯ ಪರಿಪೂರ್ಣ ಗುಣಾರ್ಣವಾಯ| ವಿಶ್ವೋದಯ-ಸ್ಥಿತಿ-ಲಯೋ ನಿಯತಿ ಪ್ರದಾಯ|  ಜ್ಞಾನಪ್ರದಾಯ |  ವಿಬುಧಾ| ಸುರ, ಸೌಖ್ಯ ದುಃಖ|  ತತ್ಕಾರಣಾಯ|  ವಿತತಾಯ| ನಮೋ ನಮಸ್ತೆ ||

ಆತ್ಮ ವಿಚಾರ

ನಮ್ಮ ಗುರ್ತ ನಮಕು ಆಪುಜಿ.  ಯಾನ್ ಏರ್? ದಾಯೆಗ್ ಬಯಿದ?  ಈ ಬಾಳುದ ಅರ್ಥ ಎಂಚಿನ?  ಮನಸುದ ಕಡಲು ಕಲಕುನು ಈ ಮನೋವ್ಯಾಕುಲೊಡ್ ಲಕ್ಕುನ  ಸಿರೆಟು. ಪ್ರಶ್ನಮಾಲಿಕೆ ಉಂತುನು ವಿಚಾರ ಮಲ್ಪುನೆನು ಬುಡೊಂದು ಬನ್ನಗ.  ಬೊಕ್ಕ ಪೂರ್ತಿ ಮೌನ. ಈ  ಮೌನರಾಜ್ಯೊಡು ಕೆಲವು ಸತ್ಯ-ಸುಳ್ಳು ಪಣ್ಪಿನ  ವರ್ಗದಾಂತಿನ  ಚಿತ್ರೊಳು ತೊಜು, ಮನೋಲೋಕದ  ‘ಯಾನ್ ಏರ್’ -ಇಂದು ಪಣ್ಪಿನ ಅನುಭವ ಮಂಟಪಾರೂಢ  ಆತ್ಮಾರಾಮಗು.  ‘ಯಾನೆ ಈ ದೇಹ’ ಇಂದು ಎನ್ನುನ ಅಹಂಕಾರಿ ಮನಸುಗು, ‘ಈ ದಪ್ಪ ಶರೀರ ಯಾನ್ ಅತ್ತ್, ಆಯಿತ ಉಲಾಯಿದ ಸೂಕ್ಷ್ಮ ಶರೀರನೆ ಎನ್ನ ಆತ್ಮ’ ಪಣ್ಪಿಣ ಬೋಧ   ಅಪುಣು. ಈ ಆತ್ಮವಿಚಾರೊಡು, ನಾಡುನಾಯಿಲಾ ಆಯೆ,  ನಾಡುನ ವಸ್ತುಲಾ ಆಯೆ.  ಆತ್ಮವಿಚಾರೊಡ್ಡು,‘ಆತ್ಮಸ್ಥಿತ’ ಆಪಿಣ ಮುಟ್ಟದ ಕಾಲನೇ ತಪಸ್ಸು. ಆತ್ಮ ವಿಚಾರೊದ್ದು ‘ಆತ್ಮಸ್ವರೂಪೊ’ನು ತೆರಿಯೋಣುನ ಸರಳ ಸೀದಾ ಸಾದಿನು  ತನ್ನ ಸ್ವಂತ ಜೀವನೊಡು ಸಾಧಿಸಿದ್ ತೋಜಾದು (ಮೌನ ಸಂಭಾಷಣೆಡು) ಕಲ್ಪಾದೇರ್ (19-20ನೆ ಶತಮಾನದ ನಡುಟು ಇತ್ತಿನ)ಸದ್ಗುರು  ರಮಣ ಮಹರ್ಷಿಳು. (Note: Be a Member of The Ramana Way, Ramana Maharshi Centre for Learning, Post Office Road, Sanjay Nagar, Bangaluru-560 094).

ಆತ್ಮಬೋಧೆ ಆಯಿ  ಬೊಕ್ಕ ಬೇತೆ ಗುರ್ತ ಬೊಡ್ಚಿ.

ಪರತತ್ವ - ಪಂಚಕ ಪ್ರಪಂಚ

ಈ ಭೌತಿಕ ದೇಹ ‘ಪಂಚ ಮಹಾಭೂತೋಡ್ಡು’ ಆತುನು. ಈ ಪಂಚ ಭೂತೋಳು ಜಗತ್ ವಿಕಸನ ಘಟಕದ ಒಂಜಿ ಪಂಚಕ (ಐನ್ ಮೂಲ ವಸ್ತುದ ರಾಶಿ).   ಜಗತ್ ಸೃಷ್ಟಿ ವಿವೇಚನೆನು ‘ಪರತತ್ವ’ ಇಂದು ಲೆಪ್ಪುವೆರು. ಅವೆನು ಒಂತೆ ತೆರಿಯೋನುಗ:

ಆ ಪ್ರಕೃತಿ ವಿಕಸನ ಘಟಕೊಲು 24 (ಪ್ರಕೃತಿ, ಬುದ್ಧಿ, ಅಹಂ, ಮನಸ್ (4) + ಪ್ರಕೃತಿತತ್ವವೊನು ವಿಭಜನೆ ಮಲ್ಪನಗ ನಾಲು ಪಂಚಕೊಲು: ಜ್ಞಾನೇಂದ್ರಿಯ, ಕರ್ಮೇಂದ್ರಿಯ, ತನ್ಮಾತ್ರಕ, ವಿಷಯ ಅಥವಾ ವಸ್ತು ಸಾರ, ಬೊಕ್ಕ ಮಹಾಭೂತ (20).  ಆಯಿಕೊಂಜಿ  ಆತ್ಮತತ್ವ  ಬೋಡು– ಅವು ದೇವಾಂಶ  ‘ಜೀವಾತ್ಮ’.  ಅಪಗ 25 ಪರತತ್ವೋಳು  ಉಂಡಾಪುಣು.

ಈಶ್ವರ ತತ್ವ

ಉಂದೆನೆ ‘ಈಶ್ವರ ತತ್ವೊಡು’ 36 ಘಟಕೊಡು ವಿಸ್ತಾರ ಮಲ್ತುದೆರು.

ಈಶ್ವರ ತತ್ವ:

(1) ಶಿವ (ಚಿತ್) ತತ್ವ, (2) ಶಕ್ತಿ (ಕ್ರಿಯಾ) ತತ್ವ, (3) ಸದಾಶಿವ (ಜ್ಞಾನ + ವಿದ್ಯ), (4) ಈಶ್ವರ (ಜ್ಞಾನ+ವಿದ್ಯ), (5) ಶುದ್ಧ ವಿದ್ಯ (ಜ್ಞಾನ+ವಿದ್ಯ) 

ಶಕ್ತಿ (ಕ್ರಿಯಾ) ತತ್ವ ವಿಸ್ತಾರ ಪಂಚಕ:

(6) ಕಾಲ (Time), (7) ನಿಯತಿ (Space), (8) ವಿದ್ಯ (Natural knowledge), (9) ರಾಗ (Passion), ಬೊಕ್ಕ (10) ಕಲಾ (Power).

ಆಜಿ ಆತ್ಮ ತತ್ವೊಳು:

(11) ಮಾಯ, (12) ಪುರುಷ (13) ಬುದ್ಧಿ (Wisdom), (14) ಅಹಂಕಾರ (Ego), (15) ಮನಸ್, (16) ಪ್ರಕೃತಿ

ಪ್ರಕೃತಿ ತತ್ವ ವಿಂಗಡನೆ (ನಾಲು ಐನುದ ರಾಶಿ):

17-21 ಜ್ಞಾನೇಂದ್ರಿಯ ಪಂಚಕ:  17-ಶ್ರೋತ (Ear), 18-ತ್ವಕ್ (skin), 19-ಚಕ್ಸು(Eye), 20-ಜಿಹ್ವಾ (Tongue), ಬೊಕ್ಕ  21-ಘ್ರಾಣ(Nose).

22-26 ಕರ್ಮೇಂದ್ರಿಯ ಪಂಚಕ:  22-ವಾಕ್ (Speech), 23-ಪಾಣಿ (Hands),24-ಪಾದ (Legs), 25-ಪಾಯು (Anus), 26-ಉಪಸ್ಥಾ(Genital),

27-31 ತನ್ಮಾತ್ರಕ ಪಂಚಕ:  27-ಶಬ್ದ (sound, hearing), 28-ಸ್ಪರ್ಶ (Touch), 29-ರೂಪ (Form/Colour), 30-ರಸ (Taste), ಬೊಕ್ಕ 31-ಗಂಧ (Smell).

32-36 ಮಹಾಭೂತ ಪಂಚಕ:  ಉಪನಿಷತಿಡ್ ಪಣ್ತಿನ ಜಗತ್ ಸೃಷ್ಟಿ ಕ್ರಮ ಪ್ರಕಾರ: 32-ಆಕಾಶ (Ether), 33-ವಾಯು (Wind), 34-ಅಗ್ನಿ (Fire), 35-ಆಪ: (Water), ಬೊಕ್ಕ 36-ಪೃಥ್ವಿ (Earth).

ಮಹಾಚೇತನೆರು ಬುಡುಪಾವುದಿನ ಈ ಪರತತ್ವ ಚಿಂತನೆ ತೆರಿಯೊಣನಗ, ಒಂಜಿ ಕವನ ಬರೆದು ಎನ್ನ ಒಂಜಿ ಅಪ್ರಕಟಿತ ಕನ್ನಡ ಕೃತಿಟು ಸೇರಿಸಾದೆ. ಅಯಿತ ಕಡೆತ ಪದ್ಯ ಇಂಚ ಉಂಡು:

ಗುಣಿಸಿ ಭಾಗಿಸಿ ಕೂಡಿಸಿ ಕಳೆದು

ಎಣಿಸೆ ಸಿಲುಕಿದು ಸಾರ ವಿಸ್ತಾರ

ಗಣಿಸಲಾಗದು ಪ್ರಕೃತಿಗಂಟಿದ ಗುಣಪ್ರಕಾರ |

ಗಣಿಸು ಪ್ರಮಾಭ್ರಮೆಯಲಿಹ

ಮಾಣಿತ ಸತ್ಯಜ್ಞಾನ  ಪ್ರತ್ಯಕ್ಷ

ಅನುಮಾನ ಶಬ್ದ-ಶ್ರುತಿ ಗುರುಮುಖೇನ ||

ಮಹಾಮೃತ್ಯುಂಜಯ ಮಂತ್ರ

ಓಂ. ತ್ರ್ಯಂಬಕಂ ಯಾಜಮಾಹೇ ಸುಗಂಧಿಮ್ ಪುಷ್ಟಿವರ್ಧನಮ್

ಉರ್ವಾರುಕಮಿವ  ಬಂಧನಂ ಮೃತ್ಯೋರ್ ಮುಕ್ಷೀಯ ಮಾಮೃತಾತ್ ||

ಜಗತ್ತುನು ಸಂಚಾಲನೆ ಮಲ್ಪುನ ಸೃಷ್ಟಿ-ಸ್ಥಿತಿ-ಲಯ ಪಣ್ಪಿಣ ಮೂಜಿ ಸ್ಥಿತಿದ ಅಧಿನಾಯಕನನು ಪ್ರಾರ್ಥನೆ ಮಲ್ಪುವೆ.  ಬದ್ಕು ಪೊರ್ಲಾದ್  ಪರಿಮಳಮಯ ಆವಡ್. ಜನ್ಮ ಸಂಚಿತ  ಕರ್ಮಫಲೊಟು ದಾತ್ರ   ಜನ್ಮ ಜನ್ಮೋಗು  ಆತ್ಮ ದೇಹಧಾರಣೆ ಮಲ್ಪುನು, ಸಂಸಾರಿಯಾಪುಣು. ಇಂಚೆನೆ ಆ ಸಂಸಾರಿ ಜೀವದ ಸಂಸ್ಕಾರ ರೂಪೊಡ್  ಪಾಪ ಕರಗುದು ಪುಣ್ಯ ಹೆಚ್ಚಾಪುನು.  ಅಪಗ, ತೌತೆಕಾಯಿ ಪರ್ನ್ದುದು ತೊಟ್ಟು ತುಂಡಾದು ತಿರ್ತು  ಬೂರುನಂಚ, ಜೀವಾತ್ಮ ಮೆಯ್ ಬುಡುದು ಪರಮಪದೊನು ಸೇರುನು. ಆ ಜೀವೊಗು ಅಮೃತತ್ವ ಒದಗುನು.

ಇಂಚ, ನಮ ಮಾತೆರ್ಲಾ ಎಡ್ಡೆ  ಬದುಕುನು ಬಾಳುದು  ನಮ್ಮ ಸಮಾಜೊಗು  ಉಪಕಾರಿಯಾದು, ಒಂಜಿ ಕಾಲೊಗ್  ಮುಕ್ತಿನು ಪಡೆತೊನುಗ.

ಕಡೆತ ಪಾತೆರ

ಆತ್ಮಾನಂ ವಿದ್ಧಿ (Know thyself).  ನಿನನು  ಈಯೇ ತೆರಿಲ. ‘ಆರ್ತ ತೆರಿಲೆ, ಗುರ್ತ ಮಲ್ಪುಳೆ’.  ಈ ಪುಟ್ಟು-ಸಾವುದ ನಡುತ ಜೀವನದ ಆರ್ತ ನಮಕು ಆಂಡ, ನಮ್ಮ ಬದುಕು ಸೌರಭಮಯ.  ಕೀರ್ತಿ ರೂಪೊಡು ನಮ್ಮ ಗುರ್ತ  ಒರಿಯು.

ಬರೆತಿನಾರ್ :  ಹೊಸಬೆಟ್ಟು ವಿಶ್ವನಾಥ್ (ಪುಣೆ)

ಅರ್ಪಣೆ:  ಭಾವಾಜಿ ಕೇಶವ ಪಿ. ಪುತ್ರನ್ (ಕುದ್ರೋಳಿ), ಎನ್ನ ಯಶೋದಕ್ಕನ ಕಂಡನಿ, ಏಪ್ರಿಲ್ 17ಕ್ಕೆ  ದೇವೆರ ಕೈತಲ್ ಪೋತೆರು. ಯಾನು ಮುಂಬಯಿಗು  ಬತ್ತಿನ ಸುರುಟು ತೆರಿಯಂದಿ  ಎನನು ಮೆಗ್ಯನಂಚ  ತೂದು, ತಿದ್ದುದು ನಡಪಾವುದೆರ್.  ಆರ್ ಇತ್ತಿನ ಗುಡ್ಲಾಸ್ ನೆರೋಲ್ಯಾಕ್ ಪೈಂಟ್ಸ್ ಕಂಪೆನಿಡು ಯಾನ್ ಮೂಜಿ ತಿಂಗೊಳು leave vacancy-ಡು ಕೆಲಸೊಗು ಇತ್ತೆ. ಅರೆನ ಸ್ಮರಣಾರ್ಥ ಈ  ಬರಹೊನು ಅರ್ಪಣೆ ಮಳ್ತುದೆ.

21.04.2017

19. ಪಿರವುಡ್ ನೆರಡೆ - ತುಳು ಸುಭಾಷಿತಕ್ಕೊಂಜಿ ಟಿಪ್ಪಣಿ

ತುಳುಟು  ತರೆ ತರೆಟಿದ್ದು  ನಡತ್ತೊಂದು ಬಯಿದಿನ  ದಿಂಜ  ನಾಡನುಡಿಲು ಉಳ್ಳ.  ಎಚ್ಚಿನ ಸುಭಾಷಿತೊನು‘ಬಲ್ಲಿ’ ಪಣ್ಪಿಣ  ನಿಷೇಧಾತ್ಮಕ (Don’ts) ರೂಪೊಡ್ ಪಣ್ತೆರ್. ಉದಾರ್ಮೆಗು, ತಿರ್ತೀಡು ಕೊರ್ತಿನ ಲೋಕೋಕ್ತಿನು ಆಲೋಚನೆ ಮಲ್ಪುಗ.

‘ಪಿರವುಡ್ ನೆರಿಯೆರೆ ಬಲ್ಲಿ,ಎದುರುಡು ಪುಗರಿಯೆರೆ ಬಲ್ಲಿ’.

ವ್ಯಾಕರಣ ಶುದ್ಧದ ಜೋಡು ನುಡಿ.  ಅರ್ಥ ಬುಡಪಾವುದ್ ಪಣೊಡಿಂದಿಜ್ಜಿ. As one should not find fault, talk ill, curse, or complain  about  somebody at his back, One also should not praise or flatter that person ( sincerely or insincerely) in his presence. ಈ ನೀತಿ ಪಾತೆರ ಸ್ವತ ಸಿದ್ಧ ಸತ್ಯನಾ (Is it a truism)? ಕಾರ್ಯ ಪಣ್ತೆರ್,  ಕಾರಣ ಪಣ್ತಿಜೆರ್. ಅನುಮಾನ ಸಿದ್ಧ ಪಾತೆರೊನ?

ನೆತ್ತ   ದುಂಬುದ ಬರಹೊಡು (ಕಂತು 17) ಕಿಣ್ಣೆ ಮಟ್ಟುಡು ಅರ್ಥ ಕೊರ್ದುಳ್ಳ.  ಖಂಡಿತ ವಾಕ್ಯೊಡ್ (ಇತ್ಥ್ಯಾತ್ಮಕ –Do’s) ರೂಪೋಡು ಪಣ್ಪಿಣಾಂಡ ಇಂಚ ಪಣೋಲಿ:  ‘ಎದುರುಡು ನೆರ್ಲೆಆಯನ ಪೊನೆಗ್, ಬೇತೆನಕಲೆನ ಎದುರುಡತ್ತ್; ಪಿರವುಡ್ ಪುಗರ್ಲೆ, ಆಯೆನ ಎದುರತ್ತ್.’ಅವು ತಪ್ಪತ್ತ್.

ಸಮಸ್ಯಾತ್ಮಕ ಯುಗ್ಮ ಪದ ವಾಕ್ಯ

ಉಂದೆಂಚಿನ  ಪರಸ್ಪರ ವಿರುದ್ಧ  ಕೆಲಸೊನು ತೆರಿಪಾವುನ ರಡ್ಡ್ ಅರ್ಥ ಕೊರ್ಪಿನ (ನಕಾರಾತ್ಮಕ)  ಜೋಡು ಪದ ವಾಕ್ಯ!   ಒರ ಸರಿ ಇಂದು ತೊಜುನು.  ಕುಡ ಒರ ಸುಳ್ಳುಂದು ತೊಜುನು.  ಸೋಜಿಗದ ಪಾತೆರ!  ಪಚ್ಚೆ-ಕೆಂಪುದ ಸೂಚಿಕಾಂಕ ಯಾಪ ಸರಿ, ಯಾಪ ತಪ್ಪು? ಈ ನೀತಿ ವಾಕ್ಯನೊನು ಒಂತೆ  ಬುಡುಪಾವುದ್  ತೂಕ.

‘ಪಿರವುಡ್ ನೆರಿಯೆರೆ ಬಲ್ಲಿ’ಪನ್ನಗ

ನೆರ್ಪಿನ  ಪ್ರಸಂಗ ಯಾಪ ಬರ್ಪುನು? ಬತ್ತುನು  ಪಣ್ಕ. ಅಪಗ, ಒರಿಯನ ತಪ್ಪುನು ಎದುರೆದುರೆ  ಪಣೋಡ್, ಆಯೆಗ್ ಕೋಪ ಬರಡು, ಬರಂದೆ ಕುಳ್ಳಡ್.  ಬಾಸ್-ಗಿರಿ ಆಫೀಸುನು ಎಣ್ಣುಳೆ. ಬಸವಣ್ಣೆರು ಪಣಿತಿನ – ಇದಿರು ಹಳಿಯಲು ಬೇಡ – ಪಾತೆರದ ಬಜೀ  ಪಿರ ಸುತ್ತುದ  ಪಾತೆರ.

ಎದುರೆದುರುಡ್  ಪುಗರ್ದು, ಪಿರವುಡ್ ನೆರಿಯೆರ ಬಲ್ಲಿ.  ಎದುರುಡು ಪುಗರುನು ಪನ್ನುಣ್ಡ  ಆತ್ಮ ವಂಚನೆ ಮಲ್ಪುನು.  ಅಂಚಿನಕುಳು ‘ಬಿಸತಿಗ್  ತಿಗತನೆಯಿ ಪೂಜಿದ್, ನಕ್ಕರೆ ಕೊರ್ಪಿನ ನಯವಂಚಕೆರು.   ಮುಖ ಸ್ತುತಿ  ಮಲ್ಪುನಕೆಳೆನು ನಂಬೆರೆ ಬಲ್ಲಿ.

ವ್ಯಾವಹಾರಿಕ  ಜ್ಞಾನೊಡ್, ಜೋರುದಾಕೆಳೆಗು ಪೋಡಿದು, ತನುಕುಲೆ ತರೆಕು ಬೂರುನ  ಪೆಟ್ಟುನು ತತ್ಕಾಲೊಗ್  ತಪ್ಪಾವರೆಗಾತ್ರ‘  ಎದುರುಡ್  ಪುಗರ್ಲೆ, ಪಿರವುಡ್  ನೆರಡೆ ’ಇಂದುದು ಅರ್ಥ ಮಲ್ಪೋಲಿಯ?

‘ಎದುರುಡುಪುಗರಿಯೆರೆಬಲ್ಲಿ’ಪನ್ನಗ

ಎದುರುಡ್  ಒರಿಯನು ಎಲ್ಯ  ಮಲ್ತುದು ಪಾತೆರ್ದು, ಪಿರವುಡ್  ಪುಗರುನು. ಮಿತ್ತುದ ಪಾತೆರೊದ ಪೂರಾ ಪೂರಾ ವಿರುದ್ಧ ಪಾತೆರ.

ಆಂಡಲ, ಒಂಜಿ ವ್ಯಾವಹಾರಿಕ ಸತ್ಯ ಈ ಪಾತೆರೊಡು ಉಂಡು.  ಅಹಂಕಾರ ನೆತ್ತಿಗ್ ಏರೆರ ಬಲ್ಲಿ’– ಇಂದುದು ಎದುರುಡು ಪುಗರೆರ ಬಲ್ಲಿ.‘ ಹೊಗಳಿ ಹೊಗಳಿ  ಎನ್ನ ಹೊನ್ನ ಶೂಲಕ್ಕಿದರಯ್ಯ’  ಇಂದುದು ಶಿವಭಕ್ತಿ  ಭಂಡಾರಿ ಬಸವಣ್ಣೆರು ಬುಳ್ತುದೆರು.

ಸಂಸ್ಕೃತ ಕವಿ ಭಾರವಿನ ಕತೆ:

‘ಸಹಸಾ ವಿದಧೀತ ನ ಕ್ರಿಯಾಂ........’  ಈ ಸುಭಾಷಿತ   ಶ್ಲೋಕೊನು  ಕೇಣ್ದುಪ್ಪರ್.  ಭಾರವಿ ಕೆಲಸ ಮಲ್ಪಂದೆ, ತಿರುಗೊಂದು ಪತ್ತೊಂದು, ಮನಸ್ಸಾಯಿನಾಪಗ ಬರೆವೊಂದು ಇತ್ತೆ.  ಆಯಿ ಬರೆತಿನ ಮಾತ ಶ್ಲೋಕೊನು ಮಾತೆರ್ಲಾ ಪುಗರೊಂದು ಇತ್ತೆರ್.  ಆಯನ ಅಮ್ಮೆರ್  ಪುಗರುಜೆರು. ಕೇಣಿನಕೆಳೆಗು:  ‘ದಾನೆನ  ಜೋಕುಲಾಟಿಗೆಡ್ ಬರೆತೆ’ ಇಂದುದು ಪಣ್ಪೆರ್.   ಮಗಕು ಕೋಪ.  ಪ್ರತಿ  ಸರ್ತಿಲಾ ಭಾರವಿಗು ಉತ್ಸಾಹಭಂಗವಾಪುಣು.  ಕೋಪ ನೆತ್ತಿಗು ಏರುನು.  ಅಮ್ಮೆರೆನ್ ಕೆರ್ದು ಬುಡುಪೆ ಪಣ್ಡು  ಕೋಪದ ಜೋರುಡು ಒಂಜಿ ದಿನ ಅಮ್ಮೆರ್  ಒಣಸುಗು ಬರ್ಪಿನ ಸಮಯೋಗ್ ಅಟ್ಟೊಡು ಕಾತ್ತೊಂದು ಕುಳ್ಳುವೆ.  ಆ ದಿನ ಬುಡೆದಿ ಕಂಡನಿಡ  ಕೇಣುವೊಲ್:  “ಈರು ದಾಯೆಗ್ ಮಗನು  ಪುಗರುಜರ್.  ಯಾಪಲ ತೆಗಳಿಕೆನೆ ಮಲ್ಪುವರು.”  ಅಪಗ ಅಮ್ಮೆರ್ ಪಣ್ಪೆರ್:  “ಮಗಡ ಮಿತ್ತ್ ಎಂಕುದಾಲ ಪಗೆ  ಇಜ್ಜಿ.   ಆಯಗ್ ಸರಸ್ವತಿ ಒಲಿದೊಳು. ಆಯನ ಕಾವ್ಯ ಶಕ್ತಿಗ್ ರಡ್ಡ್ ಪಾತೆರ ಇಜ್ಜಿ.  ಯಾನ್ ಪೂರಾ ನಂಬುವೆ. ಆಯೆನ ತರೆಕು  ಅಹಂಕಾರ  ಏರೆರ  ಬಲ್ಲೀಂದು ಯಾನ್ ಪುಗರೊಂದು ಇಜ್ಜ.”  ಈ ಸಂಭಾಷಣೆ  ಕೇಣ್ದು ಭಾರವಿಗು (ನಿಜ ಪುದರು: ದಾಮೋದರ ಇಂದುದು ಪಣ್ಪೇರ್.  ಜನಕುಳು ಕೊರ್ತಿನ ಪುದರು‘ಭಾರವಿ’ = Onewhoisshining) ಪಶ್ಚಾತ್ತಾಪ ಅಪುಣು.  ತಿರ್ತು ಬತ್ತುದು, ತಾನ್ ಮಲ್ಪೆರ ಪೊವೆಂದಿತ್ತಿನ ತಪ್ಪುನು ಒಪ್ಪುವೆ.  ಅಹಂಕಾರ ತಪ್ಪು.  ಮಲ್ಪುನ ಕೆಲಸೊನು ಸಾರಾಸಾರ ವಿಚಾರ ಮಳ್ಪೊಡು.   ಸಹಸಾ – ಹಠತ್ತಾದು (impulsively)–ಭಾವೆನೆದ ಒತ್ತಡೊಗು ಬಗ್ಗುದ್ ದುಂಬು-ಪಿರ  ತೂವಂದೆ ಕೆಲಸ ಮಲ್ಪೆರ ಬಲ್ಲಿ.  ಇಂಚ  ಈ ಶ್ಲೋಕೊನು ತಾಮರೆದ ಇರೆಟ್ ಬರೆದು  ಸರೋವರೊಡು ಬುಡ್ಪೆ.  ಅವು ಬೇಟೆಗು ಬಯಿದಿನ ಓಂಜಿ ರಾಜಗ್ ತಿಕ್ಕುನು.  ಕವಿನು ಲೆಪ್ಪುವೆ.  ಆಂಡ, ಆಯಿ ಬಡವೆ ಪಂಡುದು ಬಾಕಿಲ್ದ ಪಹರೆದಕುಳು ಉಲಾಯಿ ಬುಡುಪಿಜೆರ್.  ರಾಜೆ ಆ ಶ್ಲೋಕೋನು ಬಂಗಾರ್ದ ಅಕ್ಷರೊಡು ಕೆತ್ತುದು ತಾನು ಜೆಪ್ಪುನ ಕೋಣೆಡ್ ಅಕ್ಕುಡ್ಡು ಡಿಪ್ಪೆ.  ಯುದ್ಧಗು  ಪೊಯಿನ ರಾಜೆ ಒಂಜಿ ವರ್ಸದ ಬೊಕ್ಕ ಪಿರ ಬಣ್ಣಗ, ತನ್ನ ಹಾಸಿಗೆಡ್ಪ್ರಾಯದ ಆಣನೊಟ್ಟುಗು  ಬುಡೆದಿ ಜೆಯಿದಿನ ತೂಪೆ, ತೂದು ಇರ್ವೆರ್ನುಲಾ ಕೆರೆರ  ಕತ್ತಿ ದೆರ್ಪಣಗ (ಭಾರವಿ ಬರೆತಿನ) ಶ್ಲೋಕೊನು ತೂದು ಓದುವೆ, ಆಯೆನ ಕೋಪ ತಗ್ಗುನು.  ರಾಣಿನು  ಲಕ್ಕವುದ್ ಕೇನ್ನಗಜೆಯಿದಿನ  ಪುರುಷೆ ತನ್ನ ಮಗೆನೇ ಇಂದುದು ತೆರಿನು.  ಬೊಕ್ಕ ಭಾರವಿನು ಲೆತ್ತುದು ಭಾರಿ ಮನ್ನಣೆ ಮಲ್ಪುವೆ.

ಇತ್ತೆದ ಅಪ್ಪೆ-ಅಮ್ಮೆರೆನಕುಲು:

ಇತ್ತೆದ  ಅಪ್ಪೆ-ಅಮ್ಮೆರೆನಕಲೆನ  ನಡವಳಿ ಎಂಚ?  ಆಕೆಳೆಗು ತನಕುಳೆ  ಜೋಕುಲೆನು ಪುಗುರುನ  ಅಭ್ಯಾಸ ಜಾಸ್ತಿ.  ಕೊಂಡಾಟದ ಈ  ಚಟ, ಜೋಕುಲೆನು ಹಾಳು  ಮಲ್ಪುನುಂದು ಪಾಲಕೆರೆಗು ತೆರಿಯಂದು.  ಜೋಕುಲೆಗು, ಅಕುಳು  ಮಳ್ತಿನ ಕೆಲಸ ಪೂರಾ ಸರಿ ಪಣ್ಪಿನ ವಿಚಾರ  ಆಕೆಳೆನ  ತರೆಟ್ಒರಿನು.  ಪಾಲಕೆರೆನ‘ಸರಿ’ ಪಂಪಿನ ‘ಸಹಿ’ ತಿಕ್ಕನಗ,  ಆ ಜೋಕುಲೆ ಮಂಡೆಗು ಗರ್ವ ಏರುನು.  ಎಡ್ಡೆ  ಕೆಲಸ ಮಲ್ಪನಗ, ಪ್ರೋತ್ಸಾಹ ಕೊರೆರ ಬಲ್ಲಿಂದು ಏರುಲ ಪಣಯೆರ್. ಆಂಡ, ಎಡ್ಡೆ ಕೆಲ್ಸ ಮಳ್ತಿಜೆರುಡ, ಜೋಕುಲೆನ  ಆತ್ಮ  ವಿಶ್ವಾಸ  ಕುಂದುನಂಚ  ನೆರಡೆ.

ಮನುಷ್ಯ ಸ್ವಭಾವ

ಕೆಲವೆರು, ಜನಕುಲು ತನನು ಪುಗರ್ದು ಪಾತೆರುಡು ಪಣ್ಡು ಆಸೆ ಮಲ್ಪುವೆರ್.   ಉಂದೊಂಜಿ  ಮನುಷ್ಯರೆನ ಕೀಳು ಆಸೆ, ಸ್ವಭಾವ.  ಅಕುಳು ಆಕೆಲೆನು ಪುಗರೆರ ಒಂಜಿ ಪಟ್ಲಾಮ್ನು  ತಾಂಕುವರ್ (ದುಂಬುದ ರಾಜೆರ್ಲು ಪುಗರು ಭಟ್ಟ್ರೆಲೆನು = ಭಟ್ಟಂಗಿಲೆನು  ತಾಂಕಿದಿನಂಚ). 

ಅಂತರಂಗ - ಬಹಿರಂಗ ಶುದ್ಧಿ

ಅಣ್ಣ ಬಸವಣ್ಣೆರು ಆರೆನ  ವಚನೊಡ್ ಸಾರಿದಿನ ತತ್ವೊನು ತೂವನಗ, ಅಂತರಂಗ- ಬಹಿರಂಗ ಶುದ್ಧಿದ ಪಾತೆರೊ ಈ ತುಳು ಒಳ್ನುಡಿಟ್ ಪಂತಿಜೆರ  ಇಂದುದು ಸಂಶಯ ಅಪುಣು.  ಆ ‘ಅಂತರಂಗ-ಬಹಿರಂಗ ಶುದ್ಧಿ’-ದ ಮಂತ್ರೋನು ಕೇಣುಲೆ:

·         ಕಳಬೇಡ, ಕೊಲಬೇಡ, ಹುಸಿಯ ನುಡಿಯಲು ಬೇಡ| ಅನ್ಯರಿಗೆ  ಅಸಹ್ಯ ಪಡಬೇಡ ತನ್ನ ಬಣ್ಣಿಸಬೇಡ|  ಇದಿರು ಹಳಿಯಲು ಬೇಡ – ಇದೇ ಅಂತರಂಗ ಶುದ್ಧಿ|  ಇದೇ ಬಹಿರಂಗ ಶುದ್ಧಿ  ಇದೇ ಕೂಡಲ ಸಂಗಮನೊಲಿಸುವ ಪರಿ||

ಕಡೆತ ಪಾತೆರ

ಮೂಲು ವ್ಯಾಕರಣ ಪ್ರಯೋಗ ಸರಿ,  ಸೀದಾ  ತರೆಕು ಪೊಗ್ಗುನು ಅರ್ಥ.  ಸಮಸ್ಯೆ ಒವುಲು? ಉತ್ತರೊಡ,  ಅರ್ಥವ್ಯಾಪ್ತಿಡ, ತರ್ಕ- ಕುತರ್ಕೊಡ?

ಇಂಚೊಗೊಂಜಿ, ಮಲ್ಕೊಲ್ಮ್ ಫೋರ್ಬ್ಸ್ (Malcolm Forbes) ಬರೆತಿನ ಉಲ್ಲೇಖನ (Quote)ತೂಯೆ: “It’s so much easier to suggest  solutions when you don’t know too much about the problem”. (ಒರಿಯೆಗ್ ಒಂಜಿ ಸಮಸ್ಯೆದ ಎಚ್ಚಿನ ತಿಳುವಳಿಕೆ ಇಜ್ಜಿಡಲಾ,ಆಯೆಗ್ ಸಮಸ್ಯೆದ ತಿಕ್ಕು ಬುಡಪಾವುದ್ ಪಣೆರ, ಸಲಹೆ-ಸೂಚನೆ ಕೊರೆರ ದಿಂಜ ಸುಲಭ ತೊಜುನು).  ಅಂಚಾಂಡ ಇಂಚ ಸರಿ, ಇಂಚಾಂಡ ಅಂಚ ಸರಿ.  ಎಂಚ ಸರಿ? ಆ ಸಮಯೊಗ್ ಸರಿ ಆಪಿನ ಅನುಮಾನೊಡಾ?

ಸ್ವಾರ್ಥ ಸಾಧನೆಗಾತ್ರ, ಏರೆನ್ಲಾ ಎದುರುಡು ಪುಗರೊಚ್ಚಿ, (ತನ್ನ ತಪ್ಪುನು ದೆಂಗಾವುದ್) ಏರೆನ್ಲಾ ಪಿರವುಡ್ ನೆರೊಚ್ಚಿ. ಎಡ್ಡೆ ಉಪದೇಶ.

ಈ ಗಾದೆಡ್, ಸಂಗತಿದ ಕಾಲಲಾ, ಸಂದರ್ಭಲಾಪಣ್ತಿಜೆರ್. ಅಂಚಾದ್, ಗಾದೆಡ್ ಪಣ್ಣಿನಂಚ ಕಾಲೋಗ್ ತಕ್ಕ ಕೋಲ ಗೊಬ್ಬೊಡಾವು.

Note:

Malcolm Stevenson Forbes (19.08.1919-24.02.1990) was a Publisher & Businessman of USA.  He was the Publisher of Forbes Magazine, founded by his father B.C. Forbes.  He has many brainy quotes to his credit (Eg. Education’s purpose is to replace an empty mind with open one).

-ಹೊಸಬೆಟ್ಟು ವಿಶ್ವನಾಥ (ಪುಣೆ)

05.04.2017

18. ಒಗಟುಲಾ-ಗಾದೆಲಾ – ಗೊಂಚಿಲ್-9

1.  ಬೊಳ್ಳಿ ತಿಂದುದು ಬಂಗಾರ್ ದಕ್ಕುವೆಗೆ

ಉತ್ತರ: (ಬಾರೆ) ಪರ್ಣ್ಡು ತಿನಿಪಿಣಿ.  ಬಾರೆ ಪರುಂಡದ ತಿರುಳ್ ಬೊಳ್ದು (ಬೊಳ್ಳಿದ ಬಣ್ಣ).  ಆಯಿತ ಚೂಳಿ/ಸೂಲಿ  ಮಂಜಲ್ – ಬಂಗಾರದ ಬಣ್ಣ.

2. ಅರ್ತ  ತೆರಿಲೆ, ಗುರ್ತು ಮಲ್ಪುಳೆ

ಉಂದೆನು ನಾನಾ ಅರ್ಥ ಕೊರ್ಪಿನ ಎಲ್ಲ್ಯ ಬುದ್ಧಿವಂತಿಗೆದ  ಒಗಟುದ ಪಾತೆರೊ ಇಂದುದುಯಾನ್ ಪಣ್ಪೆ. ಎಂಚ್? ಅರ್ಥ ಬುಡುಪಾವುಗ.

ಅ) ಶಬ್ದಬಂಧ ಆಟ:  ಅಡ್ಡಪದ ಚೌಕಬಂಧದ ಖಾಲಿ ಜಾಗೊನು ದಿಂಜಾವೆರ, ಚಕ್ರಪದ ಸಾವಲುಡು ಕೊರ್ತಿನ ಸೂಚನೆನು ಅರ್ಥ ಮಲ್ಪೋಡು ಬೊಕ್ಕ ಸರಿ ಸಬುದೊನು ಗುರ್ತ ಮಲ್ಪೋಡು.

ಆ)  ಒಗಟುದ ಅರ್ಥ ಬುಡಪಾವುದ್, ಆಯಿಟ್ ಪಣಿತಿನ ವಸ್ತು ಅಥವಾ ಕೆಲಸ ಎಂಚಿನ ಇಂದುದುದು ನಾಡ್ಡು ಪತ್ತೊಡು.

ಇ)  ಒರಿಯನ್ನೊಟ್ಟುಗು ಇತ್ತುದು, ಆಯಿ ಎಂಚಿನ ಸ್ವಭಾವದಾಯಿ ಇಂದುದು ಅಂದಾಜು ಮಲ್ತೊನುಣು, ಅರ್ತ ಮಳ್ಪೊಡು. ನಾಲಾಯಿ ನಮ್ಮ ಗುಣದೋಷದ ಕನ್ನಡಿ ಪಣ್ಪೇರ್ ಅತ್ತೆ?

ಉಂದೊಂಜಿ ಒಗಟಾ, ನಾಡ  ನುಡಿಯಾ?  ನಿಕುಳೆ ಎನ್ನುಳೆ. 

3.  ಇನಿತ ದಿನೊ ನಮ್ಮವು, ಎಲ್ಲೆದ ದಿನೊ ದೇವೆರೆ ಕಯಿಟ್

Live in the present. Do not procrastinate.  ಇನಿತ ದಿನ ಎಡ್ಡೆ  ದಿನ. ಎಲ್ಲೆದ ದಿನ

ದೇವೆರೆ ಕಯಿಟ್. ಇನಿ ಮಲ್ಪುನ ಕೆಲಸೋನು  ಇನಿಯೇ ಮಲ್ಪುಲೆ. ಎಲ್ಲೆಗ್ ದೀವಡೆ.ದಾಸೆರು ಪಣ್ತಿನಂಚ: “ಇಂದಿನ ದಿನ ಸುದಿನ, ನಾಳೆಗೆಂದರೆ ಬಲು ಕಠಿಣ.”

ಅಷ್ಟಮಿದ ದಿನೊಟು,ನಡುರಾತ್ರಿ ಚಂದ್ರೆ ಮೂಡ್ಡು ಬನ್ನಗ, ಬ್ರಾಣೆರ  ಇಲ್ಲೋಡ್ ಜಾಗಟೆ ಕೇಣ್ನಗ,ಇಲ್ಲಡು ತುಳಸಿ ಕಟ್ಟೆಡ್ ಪೂಜೆ ಮಲ್ತುದು ಮೂಡೆ-ತೊಂದ್ರುದ ಪೇರಡ್ಡೆನು ತಿನ್ನಗ,ಅಪ್ಪೆ ಕಯಿಟ್ ಒರಿಯೊರಿಯೆರೆನ ಬಾಯಿಗ್ ಪೇರಡ್ಡೆ ತಿನಿಪಾವನಗ, ಪನೋದಿತ್ತೇರು: “ಈ ವರ್ಸ ಯಾನ್ ಉಲ್ಲೆ, ಬರ್ಪಿ ವರ್ಸ ಏರ!”

4.  ಆಯೆನ ಬೆರಿಯೆ ನೇಲೊಂದು ಜನಕುಲ್ಲೆರ್  ಪಾಕ ತಿಗಳ ಗಂಟೆರೆ

ಸಮಾಜ ಕಂಟಕೆರು ಅಥವಾ ಕಾಸುದಕಲೆನ ಪಿರವುಡ್ ತಿರುಗುದು, ತಿಂದುದು, ತಿಗಳೆ ಬುಲೆಪಾವೊಂದು  ಪೋಡಿಗೆ ದಾಂತೆ ಉಲ್ಲೆರ್ ಕೆಲೆವೆರು.  ಆ  ತಿಗಳೆಗಂಟೆರೆನ ಮಿತ್ತುಡ್ ಬೊಕ್ಕ ಬರೆಕ.

5.  ಕಂತ ಮುಟ್ಟೆ  ಪತ್ತುಂಡಲಾ, ಸೂತ (ತೂತ) ನಾಲಯಿ ಮಿತ್ತ್  

ಅಭ್ಯಾಸ ಬಲ ತೈಯಂದ್ (Habit dies hard).ತೂ ಪತ್ತಿದಿನ ಕಡ್ಡಿನ್ ತರೆ ತಿರ್ತು, ಅಡಿ ಮಿತ್ತ್ ಮಲ್ತುದು ಪತ್ತುಂಡಲಾ, ತೂ ಅರುಲುನು, ನಾಲಯಿ ಮಿತ್ತ್ ಕೊರ್ದೇ.  ಉಂದು ತೂತ ಸ್ವಭಾವ.  ಅಂಚನೆ ನರಮಾನಿಲಾ ಎಂಚಿನ ವಿಪರೀತ ಪರಿಸ್ಥಿತಿಡುಲ ಆಕೆಳೆನ ಸ್ವಭಾವ ಬುಡಾಯೆರು, ತಿದ್ದಾಯೆರು.

6.  ಓಲೆದಾಳೆನ ಒಟ್ಟುಗು ಸೇರಿಂಡ ಓಲೆದ ಬುದ್ಧಿ.  ಒಲಿತ್ತಾಳೆನ ಒಟ್ಟುಗು ಸೇರುಂಡ ಒಲಿತ ಬುದ್ಧಿ

ಒಂಜಿ ಕಾಲೊಡ್, ಪ್ರಕೃತಿಡ್ ತಿಕ್ಕುನ ವಸ್ತುಳೆನೆ ಉಪಯೋಗ ಮಾಲ್ತೋಂದಿತ್ತೆರ್. ಒಲಿತ ಓಲೆ = Earring made of palm tree leaf. ನಮ ಏರೆನ ಒಟ್ಟುಗು  ಎಚ್ಚ ಉಪ್ಪುವೊನ, ಆಕೆಳೆನ ಸ್ವಭಾವ ನಮಕುಲಾ ಬರ್ಪುನು.  ಒರ್ತಿ ಪೊಣ್ಣಗು ಸಿರಿವಂತಿಕೆದ ಪೊಣ್ಣನ ದೋಸ್ತಿ ಇತ್ತುಣ್ಡ, ಆಳ್ ತನ್ಕುಲಾ ಬಂಗಾರ್ದ ಓಲೆನೆ (Earring)  ಆವೊದುಂದು ಕಂಡನಿಗ್ ಪಣುವೊಲ್.   ಒಲಿತ ಓಲೆದಾಳೆನ (ತನ್ನಂಚನೆ ಬಡವೆದಿನ) ಒಟ್ಟುಗು  ಇತ್ತುಣ್ಡ, ಒಲಿತ ಓಲೆನೆ ಉಪ್ಪಡ್ ಇಂದುದು ಪಣ್ವೋಲ್. ಆಡಂಬರ-ಸರಳ ಸ್ವಭಾವದ ನಡುತ ಸಂಬಂಧನೊನು ತೂಲೆ.  ಬದಲಾವಣೆನಮ ಏರೆಡೊಟ್ಟುಗು ಉಳ್ಳನಾ, ಆಯಿತ ಮಿತ್ತುಡ್ ಆವು.

7.  ಒರುಮೆ ಕಲ್ಪೊಡು ಕಕ್ಕೆಡ, ಕರ್ಮೊ ಕಲ್ಪೊಡು ಚೀಯೊದ ಕೆಲೆಂಜಿಡ

ಎಂಚ ಒಗ್ಗಟ್ಟುಡು ಉಪ್ಪೊಲಿ ಇಂದುದು ಕಕ್ಕೆನು ತೂದು ಕಲ್ಪೊಡು.  ಒಂಜಿ ಕಕ್ಕೆಗ್ ಪರ್ಪಿನ ನೀರ್,  ತಿನಿಪಿನ ವಸ್ತು  ತೊಜುಂಡ. ಕಾಕಾ ಪಣ್ಡುದು ಮಾತ ಕಕ್ಕೆನ್ನುಲಾ ಲೆಪ್ಪುನು.   ಒಂಜಿ ಕಕ್ಕೆ ತಯಿತಿದ್  ಬುರುಂಡ ಮಾತೆರ್ನುಲ್ಲ ಲೆಪ್ಪುನು.  ನರಮಾಣಿನ ಮಂಡೆಗು ಕುಟ್ಟುನು.  ಕಕ್ಕೆದ ಗೂಡುಡು ಕಿನ್ನಿಳು ಇತ್ತುಂಡ, ಕಯ್ತಲ್ ಪೊಯಿನಕೆಳೆನ ಮಂಡೆಗ್ ಸುಯಿಂದು ಪಣ್ದು ಪಾರುದು ಬರು, ಮಂಡೆಗ್ ಗೀರು.  

ತಿಗೆತ ಕೆಲೆಂಜಿ, ಪೂಪೂ ತಿರುಗುದ್, ಪೂತ ಚೀಪೆ ರಸೊನು ಬಾಯಿದ ಒಯ್ಪು-ಕೊಳವೆಡು ಸೀಂಟುನು.  ಪಿರ ಬತ್ತುದು ಪಟ್ಟುದ ಕನಕನೊಟು ಒಟ್ಟು ಮಲ್ಪುಣು.  ಒಡ್ಕದಾಂತೆ ರಾತ್ರೆ - ಪಗೆಲ್ ಕೆಲಸ ಮಲ್ತೋಂದೆ ಉಪ್ಪುನು – ಬೇನೆ-ಬೇಸರ, ಸುಸ್ತು - ಸೋಮಾರಿತನ ತೋಜಾವಂದೆ.  ಇಂಚಿನ ಚೀಯೊದ ಕೆಲೆಂಜಿನು ತೂದು ಮನುಸ್ಯೆ  ಕೆಲಸದ ಪೆರ್ಮೆನು ತೆರಿಯೊನೆಲಿ.

8.  ಒರುನ  ಇಲ್ಲೂಲಾ, ತೋರುನ  ಇಲ್ಲೂಲಾ ಒಂಜೆ  ಲೆಕ್ಕ.  ಯಾಪಲ ಎಡ್ಡೆ ಆವಂದ್ ಒರಿಯನ ಇಲ್ಲಗ್ ಮಾಟ ಮಲ್ಪುನ ಬೋಡ್ಚಿ ಅವುಳು ಶಾಂತಿ ಇಜ್ಜಿಡ.  ಜಗಳ ಮಲ್ಪುನ ಇಲ್ಲಾಗು ಏಳಿಗೆ ಇಜ್ಜಿ.  ಬರ್ಸೋಗು ತೋರುನ ಇಲ್ಲುದ ವಸ್ತುಲು ಪೂರಾ ಹಾಳಾಪ. 

9.  ಒರುನ  ಬುಡೆದಿಡ್ಡು  ಅರಾದ್  ಪತ್ತುನ ಮಾರಿ ಎಡ್ಡೆಗ್ಯೆ

ಕುಡೊಂಜಿ ಗಾದೆಲ ಉಂದೇ ವಿಸಯೊನು ಪಂಪುಣು: ‘ಒರಿ ಇಲ್ಲುಲಾ ತೋರಿ ಇಲ್ಲುಲಾ ಹಾಳ್’.  ಪತ್ನಿ ಪಣ್ದುಂಡ:  “ಪತನ ತ್ರಾಯತೇ ಇತಿ ಪತ್ನಿ.” [= (ಪತಿ) ಬುರಂದಿನಂಚದೆರ್ತುದು ಪತ್ತುನಾಳ್].  ಕಂಡನಿ ಹಾಳು ಸಾದಿ ಪತ್ತನಗ ಸರಿ ಸಾದಿಗು ಕನೋಡು. ಯಾಪಲ ಒರೊಂದುಪ್ಪುನ ಕೈ ಪತ್ತಿನಾಲೆಡ್ಡು ಅರಂಬುದ್ ಪತ್ತುನ ಮಾರಿ ಎಡ್ಡೆ.  ಮಾರಿದ ಪೆಟ್ಟು ಒಂಜಿ ಇಯವು ನೆಲಪತ್ತಾವೆರೆ.  ಬುಡೆದಿ  ದಿನಾಲ ಕಚ್ಚಾಡೊಂದು ಚಿತ್ರೆ ಹಿಂಸೆ  ಕೊರ್ಪೊಳು. 

10.  ಓರೆ  ಮೂಂಕುದಾಯಿ  ಕನ್ನಡಿ  ದರ್ತಿ ಗಾದೆ

ಒರ್ದ ಮುಕುದಾಯಿ ಎನ್ನುವೆ, ಕನ್ನಡಿನು ಪುಡತ್ ಪಾಡುಂಡ (ಆಯಗು) ಅಯನ ಮೂಕು ತೊಜಾಂದು.  ಸಮಾಜೋಡು ಜನಕುಳು ಆಕಲೆನಾ ಕುಂದು ಕೊರತೆನು ಮಾಜವೆರ ಎದುರುಡ್ ಎಡ್ಡೆ ಕೆಲಸ ಮಲ್ಪುವೆರ್.  ಪಿರವುಡ್ ಬೇತೆನೆ ಹಾಳು ಕೆಲಸ ಮಲ್ಪುವೆರು.

- ಹೊಸಬೆಟ್ಟು ವಿಶ್ವನಾಥ್ (ಪುಣೆ)

09.04.2017