ಬಾಲೆ ಬುಲಿಪುನು
ಬಡವುಗುಯಾ ಮಡೆ ಮಲ್ತುದು.
ಅಪ್ಪೆ ಕೆಲಸೊಡು ಉಳ್ಳೊಳು.
ಪೆದ್ದಿ ಕರ್ಲುಗು ಕೇಣುನು.
ಬರ್ಪೊಳು ಮಿರೆ ಕೊರ್ಪೊಳು. ಬಾಲೆ
ತೆಲಿಪುನು. ಮಡೆ ಮಲ್ತುದು
ಇತ್ತುಣ್ಡ ಮಡೆ ದೆಪ್ಪುವೊಳು.
ಪೆದ್ದಿ ಕರುಳುಗು ಕುರೆ ಇಜ್ಜಿಂದ್
ಪಣ್ಪೆರು. ಉಂದು ಪೆದ್ದಿ ಅಪ್ಪೆ ಕೊರ್ಪಿನ
ನ್ಯಾಯ, ಪಾತೆರೆ ಬರಂದಿ ಬಾಲೆದ
ಬುಳುಪಾಟದ ಮದಿಪುಗು. ಬಿನ್ನಪ
ದುಂಬು, ಕೊರ್ಪಾಟ ಬೊಕ್ಕ.
ಕೋರಿಕೆ-ನೀಡಿಕೆ. ತುಳುತ
ನುಡಿಮುತ್ತು ಉಂದೆನೆ ಪಣ್ಪುಣು
ಇಂಚ:
ಮದಿಪು ದುಂಬು, ಮಾಯ
ಪಿರ
ನಮ್ಮ ಕರಾವಳಿದ ದೈವಾರಾಧನೆಡ್ದು ಈ
ನುಡಿಗಟ್ಟು ರೂಡಿಡುಂಡು. ಬಯಿದಿನು
ಇಂದುದುಲಾ ಪಣೋಲಿ. “ದೈವೊನು ನಂಬಿನಕೆಳೆಗು ಇಂಬು ಉಂಡು” ಪಣ್ಪಿ ಪಾತೆರೊ ಈ ತುಳುನಾಡುಡ್
ಉಂಡು. “ಸತ್ಯದ ಮಣ್ಣ್-ಡ್
ಪುಟ್ಟುದ, ಧರ್ಮೋಡ್ ಅಧರ್ಮ
ಆವರೆ ನಮ ನಂಬುದಿನ ಶಕ್ತಿ
ಬುಡಂದ್. ಮಾಯೆಲಾ ಅವ್ವೆ. ನಂಬುದಿನಾಯಗ್
ಇಂಬು ಉಂಡುಗೆ ಪಣ್ಪಿ
ಕೀರ್ತಿ ಈ ರಾಜ್ಯೋಗು ಉಂಡು.”
ಸುರುಟು ಮಳ್ಪೊಡು ಮದಿಪು, ಪಣ್ಡುಂಡ
ನ್ಯಾಯೊಗು, ರಕ್ಷಣೆಗು ಪ್ರಾರ್ಥನೆ, ಅಹವಾಲು, ದೂರು.
ಮಾಯ ಪನ್ನುಣ್ಡ
ನ್ಯಾಯ. ನ್ಯಾಯದ ಪಾತೆರೊ
ಬೊಕ್ಕ. ತಪ್ಪು-ಒಪ್ಪುದ, ನಂಬಿಕೆಗು
ಇಂಬು ಕೊರ್ಪಿನ ಭರವಸೆದ, ತೀರ್ಮಾನದ ಕಡೆ
ಪಾತೆರೊ.
ಏರ್, ಯಾಪ ಮಳ್ಪೊಡು? ವಾದಿ ಗುರಿಕಾರಡ
ಪಣ್ಪೆ, ಗುರಿಕಾರೆ ಮದಿಪು, ಪ್ರಾರ್ಥನೆ
ಮಲ್ಪುವೆರು. ದೈವ ಸಮಾಧಾನ
ಕೊರ್ಪುನು. ಉಂದು ಒಂಜಿ
ವ್ಯಕ್ತಿಗತ ಅಥವಾ ಸಾಮಾಜಿಕ
ಅಹವಾಲು ಆದಿಪ್ಪೊಲಿ. ಗ್ರಾಮ ಯಾ
ದೇಶದ ಅಹವಾಲುಲಾ ಆದುಪ್ಪು.
ಕರಿಕಾಲೊಡು,
ಕುಟುಂಬೊದುಳಯಿದ ತಕರಾರು ಜಾತಿದ ಯಾ
ಊರುದ ಗುರಿಕಾರೆರೆಗು ಪೋಪುನು.
ಬೋಡಾಯಿನ ಹಿರಿಯ ತರೆನಾಕೆಲುಲಾ ಈ ರಾಜಿ
ಪಂಚಾಯಿತೆಗೆಡ್ ಉಪ್ಪುವೆರು. ರಾಜಿ
ಪಂಚಾಯಿತಿಕೆ ಸಮಾಧಾನೊಡು ಇತ್ಯರ್ಥ
ಆಂಡ, ಈ ಕಡೆತಕುಳು
ಕೊರಿನ ಚೊಂಬು ನೀರುನು ಆ
ಕಡೆತಕುಳು ಪರ್ಪೆರು. ಆ ಕಡೆತಕುಳು ಕೊರಿ
ನೀರುನು ಈ ಕಡೆತಕುಳು ಪರ್ಪೆರು.
ಇಜ್ಜಾಂಡ, ಊರುದ ದೈವದೆದುರು
ಆಪುಣು.
ಮಾಯ
ಮಾಯ/ಮಾಯೆ ಪಾತೆರೊಗು ಮಸ್ತು ಅರ್ಥೋಳು. ಪಾಲಿ ಬೊಕ್ಕ ಸಂಸ್ಕೃತ ಬಾಸೆಳೊಡು
ಮಾಯೆ ಪನ್ನುಣ್ಡ ಒಂಜಿ ಭ್ರಮೆ, ತೋಜಿದ್
ಬರ್ಪಿನ ಒಂಜಿ ಬಜಿ ಕಣ್ಕಟ್ಟುದ ನೋಟ, ಕಡು ದೊಂಬುಡ್ ತೊಜುನ ನೀರ್ಕುದುರೆ, ಮೃಗಜಲ (mirage)-ದಂಚ
ಮಾಯಾ ಪ್ರಪಂಚ ಇಂದುದು ಪಣ್ಪೆರು.
ಒವು ಇಜ್ಜಾ ಅವು
ಮಾಯ, ಪಣ್ನುಂಡ ಒಂಜಿ
ಪ್ರತಿಬಿಂಬ, ಪಿರನೆರೆಳ್ ಮೂಜಿ ತರತ
ಗುಣೋಟು. ಆ ಮೂಜಿ ಗುಣೋಳು – ಸಾತ್ವಿಕ, ರಾಜಸ, ಬೊಕ್ಕ ತಾಮಸ.
ಬದುಕುದ ಕಷ್ಟೊಳು. ವಿವರಣೆ ಬೊಕ್ಕ ಪರಿಹಾರ ಪಣೆರಗಾತ್ರ
ಅಧ್ಯಾತ್ಮ ತತ್ವೊಡು ಮಾಯ ಪಣ್ಪಿ
ತಂತ್ರದ ಉಪಯೋಗ ಮಲ್ಪುವೆರು.
ನಾರದ-ಸಂಸಾರದ ಕತೆ ನಿಕುಲು
ಕೇಣ್ದುಪ್ಪೆರ ಇಯಾವು. ಮಾಯೆ
ಪನ್ನುಣ್ಡ ಎಂಚಿನ ಇಂದುದು
ವಿಷ್ಣುದೇವೆರೆಡ ಕೇಣ್ನಗ, ದೇವೆರು
ಬಾಜೊಲುಗು ಕೈತಲ್ಡಿತ್ತಿನ ತುದೆತ ನೀರ್
ಕನೆರ ನಾರದೆರುನು ಕಡಪುವೆರು.
ನಾರದೆರು ನೀರುಗು ಜತ್ತಿ
ಪೆಟ್ಟುಗೆ ಪೊಣ್ಣಾಪೆರು. ಮದುಮೆ
ಆದು ಜೋಕುಲಾಪುಣು. ಸುಖ
ಸಂಸಾರೊಡು ಉಪ್ಪನಗ ಒಂಜಿ
ಸರ್ತಿ ತುದೆಟು ಬೊಲ್ಲ ಬತ್ತುದು
ಒಂಜೊಂಜೇ ಬಾಲೆರು ಬೊಲ್ಲೊದ
ಒಯಿಲುಡು ಕೊಚ್ಚಿದು ಪೋಪೆರು, ನಾರದೆರು
ತೂವ ತೂವನಗೆನೇ. ದಾಲ
ಮಲ್ಪೆರ ಆವಂದೆ ನಾರದೆರು
ಬುಳ್ತೊಂದುಪ್ಪನಗ ನಾರಾಯಣ ದೇವೆರು
ಕೇಣುವೆರು,“ನಾರದ ನೀರು ಕೊನೊದು
ಬತ್ತನಾ?” ನಾರದೆರೆಗು ಎಚ್ಚರ
ಆಪೆರು. ದೇವೆರು ಪಣ್ಪೆರು,“ಉಂದೊಂಜಿ
ಎನ್ನ ಕ್ಷಣತ ಮಾಯೆ.
ಈಯಿಲಾ ಮಾಯೊಗ್ ಬೂರಿಯನ?” ಮಾಯೆ
ಪನ್ನುಣ್ಡ ಸ್ವಪ್ನ ಸದೃಶ
ದೃಶ್ಯ.
ಋಗ್ವೇದೊಡು ಈ ಸಬುದ 70 ಸರ್ತಿ, ಆಥರ್ವಣ ವೇದೊಡು 27 ಬಾರಿ ಬಯಿದಿನು
ಇಂದುದು ಪಣ್ತೆರು. ಅವುಲು
ನೆತ್ತ ಅರ್ಥ: ಪ್ರಜ್ಞೆ, ಜ್ಞಾನ-ವಿಶೇಷ
ಇಂದುದು ಒಪ್ಪಿದೆರು.
ತುಳು ಬಾಸೆಡ್ ಪ್ರೀತಿ, ಪ್ರೀತಿದ
ಆವರಣ,ಅಭಯ ಕವಚ, ನ್ಯಾಯ, ಇಂಚ
ಮಾತ ಅರ್ಥ ಪಣೋಲಿ.
ಈ ಅರ್ಥ ಸಾಮಾನ್ಯವಾದು
ಮಾತ ಬಾಸೆಳೆಡು ಉಂಡುಂದು
ಪನೊಲಿ.
ನ್ಯಾಯ ಪದ್ಧತಿ
ವಾದ. ಮಾತೆಕ್ಲಾ ವಾದ.
ನಮ್ಮಾತೆಗೆ ಇತ್ತುಂಡಲ ತಗಾದೆಳು
ಪುಟ್ಟುಂಡೇ. (ಅಧಿಕಾರ) ದರ್ಪದ ಎದುರು
ವಾದ ಮಲ್ಪಡ ಪಣ್ಪೆರು. ಅಂಚಾಂಡ, ಎದುರಿಸುನವೇ
ನಮ್ಮ ಧರ್ಮ. ನ್ಯಾಯ ಎಂಚ
ತಿಕ್ಕುಪಣ್ಪಿನ ವಿಚಾರ ಮಲ್ಪಂದೆ.
ನಿತ್ಯ ವ್ಯವಹಾರೋಡು ಇತ್ತೆ
ರಕ್ಷಕ ವರ್ಗೊಲು ಪಣ್ನುಂಡ ಕೋರ್ಟು - ನ್ಯಾಯ ಮಂದಿರ+ನ್ಯಾಯಾಧೀಶೆರು ಬೊಕ್ಕ
ಲಾಯರ್ ಪನ್ನುಣ್ಡ ನ್ಯಾಯವಾದಿಳು
ದೇಶ-ಪರದೇಶೊಡು ದಿಂಜುದು ಪೋತೆರು.ನ್ಯಾಯ ತಿಕ್ಕಾ ಇಜ್ಜಾ ಆಯಿತ ಖಾತ್ರಿ
ಇಜ್ಜಿ. ಸುಳ್ಳು ದೂರು, ಸುಳ್ಳುಸಾಕ್ಷಿ. ನ್ಯಾಯೊಡ್ಡು ಎಚ್ಚ ಅನ್ಯಾಯನೇ
ಗೆಂದುನು. ಲೋಕ ರೂಢಿದ
ನ್ಯಾಯ ಪದ್ಧತಿಲು, ಅತ್ತಂದೆ
ಆಳುನ ಸರಕಾರ ಸಮಯ ಸಮಯೊಗು ಪಾಸ್ ಮಲ್ತಿನ ತರತರತ
ಸಿದ್ಧ ಕಾನೂನುಳುಂಡು ಎಡ್ಡೆ-ಪಡ್ಕೆ
ಕೆಲಸ ಬೊಕ್ಕ ವಿಷಯದ ಮಿತ್ತ್. ಕಾನೂನು
ಕಲಮುಳೆನ ಚಕಮಕಿ. ಕಾಸುದ ಉಬ್ಬರ,ನ್ಯಾಯವಾದೆರ ಅಬ್ಬರ.
ಪುಟ ಪುಟ ಮಗಪುವೆರು, ಮುಚ್ಚುವೆರು. ಬೊಕ್ಕ
ಕಡೆಕು, ನ್ಯಾಯೊಗಾತ್ರ ಪಕ್ಷ ಪ್ರತಿಪಾದನೆ ಅಕಳಕೆಳೆನ, ಕಲಮುದ
ಉಲ್ಲೇಖ ದಾಂತೆ. ನ್ಯಾಯಪತಿನ
ತೀರ್ಪು - ಸಾಕ್ಷ್ಯಾಧಾರೊಡ್, ಅಂಚಿನ
ಕೇಸುಲೆಡ್ ದುಂಬುಡು ಮಲ್ತಿ ನಿರ್ಧಾರೊದ ಆಲೋಚನೆಲಾ ಮಲ್ತುದು. ಇತ್ತಿನ
ಮಾಜುನು, ಉಪ್ಪಂದಿನ ಇತ್ತಿನಂಚ ತೊಜುನು. ಉಂದುಲ
ಒಂಜಿ ಮಾಯೆ. ಕಡೆಕ್
ನೋಪುನೇರ್?
ಬದುಕು-ಮಾಯೆ,
ಮಾಯೆ ಜನಮಾನಿನ ಬದುಕುಡು
ಸೇರುದು ಪೋತಿನ ಒಂಜಿ
ಸಾಮಾನ್ಯ ಪಾತೆರೊ.ಆಂಡ ಆಯಿಟ್ ಮಸ್ತು ವಿಚಾರೊಳು ದೆಂಗುದುಂಡು.
ಪರತತ್ವದ ಎಣಿಕೆ ಈ ಶಬ್ದೊನು ವಿಚಾರ ಮಲ್ಪನಗ
ಆಪುನು. ಅಂಚಾದು “ಪರತತ್ವದ
ಅವತರಿಣಿಕೆ ಮಾಯೆ” ಇಂದುದು ಪಣ್ಪೆರು. ಆ
ರಹಸ್ಯಮಯ ವಿಷಯೊನು ಈ ಸರಳ, ಸರಸ
ಪ್ರಬಂಧೊಡ್ ಪಣೆರ ಬಲ್ಲಿ
ಜೀವಿ ಪುಟ್ಟನಗನೆ ದುಂಬುದಜನ್ಮದ
ನೆನೆಪು ಪೂರಾ ಮದತು ಬುಡ್ಪೆ.
ತನ್ನ ಮೂಲ ಸ್ವರೂಪದ
ನೆನಪೇ ಉಪ್ಪುಜಿ.ಮೂಲು, ಮದಪು ಪನ್ನುಣ್ಡ
ಅಜ್ಞಾನ. ಬಾಲೆ ಮಾತೆರೆನುಲಾ
ತೂದ್ (ಮಯಿಲೆದಾಂತಿನ) ಪೂತೆಲಿಕೆ ತೆಲಿಪುವೆ,ಮಾಯೆ-ಮಮತೆದ ಕಂಬೊಲಿ
ಪೊದ್ದುದು. ಪೊಸ ಪುಟ್ಟುಗು
ಒಗ್ಗುದು ಪೋಪೆ. ಸಂಚಿತ ಕರ್ಮದ
ಫಲೊನು ತಿನ್ಪೆ. ಬೊಕ್ಕ
ಬುಳಿಪುವೆ, “ಮಾಯೆ-ಮಮತೆ ಕೊರ್ದು ದಾಯೆಗ್
ಸೋಪಾವ, ದೇವ” ಪಣ್ದು. ಗಳಿಗೆಗಳಿಗೆಗು ಕಸರತ್ತು.
ಬದುಕುದ ತ್ರಾಸುನು ಸರಿ ತೂಕೊಡು
ದೀವೆರೆ ಪೊರ್ಮುವೆ - ಗಡಿಬಿಡಿಟ್ . ಸಮತೂಕುನೆಕ್ಕು “ತ್ರಾಸ್ “ ಪಣ್ಪಿ
ಶಬ್ದ ಇಂಚ ಬತ್ತುದುಪ್ಪು.
ಗಾದೆ ಪಾತೆರೊ
ಒಂಜಿ ಆಲೋಚನೆ. ಗಾದೆಳು
ನಾಡ ನುಡಿ. ಪಣ್ನುಂಡ, ನಾಡು ಮಲ್ಪುನು
ಅತ್ತ್. ಆ
ನಾಡುದ ಜನಕುಳೆ ಅನುಭವೊಡು
ತೆರಿನ ಬದುಕುದ ಸಾಮಾನ್ಯ ಸತ್ಯೊಳು, ಸಾರ
ವಾಕ್ಯೊಡು.ಇಂಚ ಪಾಕವಾಯಿನ ಆ ಗಟ್ಟಿ
ಪಾತೆರೊಳು ಆಕೆಳೆನ ಕಸಬು, ರಾಜಿಕ- ಸಾಮಾಜಿಕ
ರೀತಿ-ನೀತಿ,
ದೇಶ-ಕಾಲ-ಭೌಗೋಳಿಕ ಸ್ಥಿತಿ-ಗತಿಗು ಹೊಂದುದುಂಡು. ಕೆಲವೊಂಜಿ
ಗಾದೆಳು ಮಾತ ಸಮಯೊಗುಲಾ
ಸರಿಯಾಪಿನ ಸರ್ವಕಾಲಿಕ ಸತ್ಯವಾದುಪ್ಪುಜಿ. ಆಂಡ, ಆ
ನಾಡ ಜನಕುಲೆನ ಸಂಸ್ಕಾರ, ಕೂಡು
ನಡವಳಿ, ಕೂಡು ಪಾತೆರೊ, ಇಂಚ
ಮಾತ ಸಮಯದ ಛಾಪುದ
ಸಾಕ್ಷಿಸ್ವರೂಪ.
ಈ ಪ್ರಬಂಧೊಡು ಆಲೋಚನೆ
ಮಳ್ತಿನ ಗಾದೆ “ಮದಿಪು ದುಂಬು, ಮಾಯ ಪಿರ”
ಈ ನಮ ತುಳುನಾಡುಗು
ಎಚ್ಚ ಹೊಂದುದು ಉಂಡು.
ಸರ್ವಕಾಲಿಕವಾದುಲಾ ಉಂಡು.
ಸಾಮಾನ್ಯ ಜೀವನ ಧರ್ಮೋಡು, ಕಣ್ಣೀರು ದೆತ್ತುದು
ನಟ್ಟುನೊನುಲಾ ಒಂಜಿ ಆತ್ಮಸಮರ್ಪಣ ಭಾವದ ದೇವಧ್ಯಾನ.
- ಹೊಸಬೆಟ್ಟು
ವಿಶ್ವನಾಥ, ಪುಣೆ
20200730
