 |
| ಚಂಡಿಘಡತ ಶಿಲಾವನ (ರಾಕ್ ಗಾರ್ಡನ್) - ಒಂಜಿ ದೃಶ್ಯ |
ತುಳು ಬಾಸೆದ ಪಾತೆರೊದ ಶೈಲಿನು, ರೀತಿನು, ಬೊಕ್ಕ ಲಾಲಿತ್ಯೊನು ಆಯಿತ ಜೋಡು ಪಾತೆರೊ ಅಥವಾ ಜತೆ ನುಡಿಟ್ ತೂವೊಲಿ. ಹಿತ-ಮಿತವಾದು ಒಗಟುದಂಚ ಪಣ್ತಿನ ಈ
ಗಟ್ಟಿ ಪಾತೆರೊನು – ಸೂಕ್ಷ್ಮತತ್ವ ರೂಪೊನು ಯಾ ಸಾರ
ವಾಕ್ಯೊನು – ಬುಡ್ಪಾವುದು ತೆರಿಯೆರೆ ಒಂತೆಕಷ್ಟನೆ. ಇಂಚ ಕೈ ಬಾಯಿಡು ಅರೆಂಜೆರ ಆವಂದಿ ಈ ನಾಡ ನುಡಿನು ತೂಲೆ.
“ಕಲೆ ಕಲ್ತುದು ಬರ್ಪುನವತ್ತ್ , ಕಲ್ಪಂದೆ ಬರ್ಪುನವುಲಾ ಅತ್ತ್!”
ಕಲೆ ಕಲ್ತುದು ಬರ್ಪುಜಿ , ಕಲ್ಪಾಂದೆ
ಲಾ ಬರ್ಪುಜಿ. ಒಂಜೆ ಕೊಂಜಿ ಸಂವಾದಿಯಾದು ಬರ್ಪಿನಸೂತ್ರ ರೂಪೊದ ಈ ಗಾದೆನು ಒಂತೆ ಬುಡ್ಪಾವುಗ.
ಕಲೆ
ಕಲೆ ಪನ್ನುಣ್ಡ ಬೊಲ್ಪು,ಕಾಂತಿ,ತೇಜಸ್ಸು,ದೈವ-ದೇವೆರೆನಮಾಯೆ-ಮಹಿಮೆ. ಕಲೆಕು ಪದಿನಾಜಿ ಭಾಗೊಲು, ಚಂದ್ರನ ಕಲೆದಂಚ. ದೈವ-ದೇವೆರೆನ ಪಾತ್ರಿನ ಕೆಳೆಗು ಮದಿಪು
ಪಣ್ದು ಮೆಯಿಟ್ ಎಚ್ಚಿ ಬರ್ಪಾನವಗ, ‘ಪದಿನಾಜಿ ಕಲೆಟ್ ಪರಿಪೂರ್ಣವಾದು ಉಂತಿದಿ ಮಾಣಿನ ಮಿತ್ತ್ ನೆಲೆಯಾದು ಎಚ್ಚಿಡ್ಬರೊಡು ’ ಇಂದುದು ನಟ್ಟುವೆರು. ಸ್ಥಳತ ಮಹಿಮೆಗುಲಾ
‘ಕಲೆತಜಾಗ’ ಇಂದುದು ಪಣ್ಪೆರ್. ಮೆಯಿತ ಕುರೆಯಾ ಕಳಂಕೊಗುಲಾ ಕಲೆ ಇಂದುದು ಪಣ್ಪೆರ್.
ಮೂಲು , ಉಂದೆತ್ತ ಅರ್ಥ: ಬೇತೆ ವಿದ್ಯೋಳು. ಕಾವ್ಯ,ನಾಟ್ಯ,ನಾಟಕ, ಸಂಗೀತ,ಚಿತ್ರ – ಇಂಚ ಮಾತ ಕಲೆಕುಳು.
ವೃತ್ತಿಪರ ವಿದ್ಯೆಲುಲಾ ತೂದು ಕಲ್ತುದು ಬರ್ಪಿನಕಲೆ-ಕುಳು.ಆಯಿಟ್ಪರಿಣತಿ
ಅಭ್ಯಾಸೊಡು, ಅನುಭವೊಡು ಬರ್ಪುನು. ಫ್ಯಾಕ್ಟರಿಡು ಮಶಿನಿಡ್ ಕೆಲಸ ಮಲ್ಪುನ ಜನಕುಲೆನು‘ ಪರಿಣಿತಿದಾಂತಿನಾಯಿ=Non-skilled, ಅರ್ಧ ಪರಿಣಿತಿ ಇತ್ತಿನಾಯಿ=Semi-skilled ಬೊಕ್ಕ ಪೂರ್ಣಪರಿಣಿತಿ ಇತ್ತಿನಾಯಿ=Highly-skilled’ ಇಂದುದು ವರ್ಗಭೇದ ಮಲ್ಪುವೆರು.
ಮನುಷ್ಯ ಜೀವನೊನುಲಾ ಒಂಜಿಕಲೆ ಇಂದುದು ಪಣ್ಪೆರ್. ಆಯಿತನ್ನ
ಅಭ್ಯಾಸೊಡು, ಅನುಭವೊಡು ತೆರಿನ, ಪಡೆತಿನ ವಿಷಯನೆ ಒಂಜಿಕಲೆ. ಮಾತೆರೆನಲ ಕೈಯೆಡ್ಡೆ – ಕೈಗುಣವಾ
ಕುಶಲತೆ – ಒಂಜೆ ಲೆಕ್ಕ ಉಪ್ಪನ್ದು; ತಾರತಮ್ಯ ಉಂಡೇ ಉಂಡು. ಬದುಕುಡು ಆಪಿನಎಡ್ಡೆ-ಪಡ್ಕೆ, ಕಯಿಪೆ- ಚೀಪೆ ಸಂಗತಿಲು
ನಮಕು ಬದುಕುಡು ಎಂಚ ಉಪ್ಪೊಡ್, ವಾ ರೀತಿ
ನಡಪೊಡ್ ಪನ್ಪಿ ವಿವೇಕೊನು ಪುಟ್ಟಾವುನು.
ಕಲ್ಪ/ಕಲ್ಪುನು
ತೆರಿಯೊಣುನು, ವಿದ್ಯೆ, ವಿದ್ವತ್ತ್, ಜ್ನಾನ, ಉಂದು ಮಾತ ಕಲ್ತುದು ಬರ್ಪುನವು.
ಲೋಕ ವ್ಯವಹಾರೊಡು ಬರ್ಪಿನ – ತಿಕ್ಕುನ
ಬುದ್ಧಿ, ತಿಳುವಳಿಕೆ ಅಥವಾ ಜಾಣತನ. ಉಂದೆಕ್, ‘ಉಪ್ಪುನುಪ್ಪು ತೆರಿಯೊನುನು’ ಇಂದುದುಲಾ ಪಣ್ಪೆರ್.
ಕಲ್ಪೊಗು‘ ಕಪಟಬುದ್ಧಿ, ಇಜ್ಜಾಂಡ ‘ಅರ್ಧಸತ್ಯ
ಅರ್ಧಸುಳ್ಳು ಪಣ್ಪಿನ ಬುದ್ಧಿ’ ಇಂದುದುಲಾ
ಅರ್ಥ ಉಂಡು.
ಕಲ್ತುದು(ಅಂಗೀಕೃತ) x ಕಲ್ಪಾಂದೆ(ಅಂಗೀಭೂತ)
ಉಂದು ತದ್ವಿರುದ್ಧ ಪಾತೆರೊಳು - ಒಂಜಿ ಅಂಗೀಕೃತ, ಬೊಕ್ಕೊಂಜಿ,
ಅಂಗೀಭೂತ. ಕಲ್ತುದುಲಾ ಬತ್ತಿಜಿಡ, ಕಲ್ಪಾವಂದೆ
ಬರ್ಪಿನ ವಿದ್ಯೆ ಆಂಡಲಾ ಬೋಡು. ಶಾಲೆಗು ಪೋದು
ಕಲ್ಪಾಂದಿನ ನಮ್ಮ ದುಂಬುದ ಹಿರಿಯೆರು,ಗುರಿಕಾರೆಳೆನು
ಉದಾಹರಣೆಯಾದು ದೆತ್ತೋನೊಳಿ.ಶಾಲೆಗು
ಪೋದು ಓದಂದಿನ ಜೋಕುಳು ಮಲ್ಲ ಮಟ್ಟದ ಕಲಾವಂತೆರಾತಿನ ಉದಾಹರಣೆ ಏತೊ ಉಂಡು.
ಅಂಗೀಕೃತ ಕಲ್ಪಾಟ
ಈ ಕಲ್ಪಾಟೊಡು, ಕೆಲವೆರು
ಸೂಕ್ಷ್ಮಗ್ರಾಹಿಯಾದುಪ್ಪೆರು. ಬೊಕ್ಕ ಕೆಲವೆರು, ನಿಧಾನವಾದು
ಕಲ್ಪುವೆರು. ಬೊಕ್ಕಲಾ ಕೆಲವೆರು ಶತದಡ್ಡೆರು. ಕಲ್ಪಯಿನಾತುಲ
ಮಂಡೆಗು ಪೊಗ್ಗುಜಿ. ಈ ವ್ಯತ್ಯಾಸ
ಆಕಳಕೆಳೆನ ಐ‌ಕ್ಯೂ (IQ) ಮಟ್ಟದ ಮಿತ್ತ್ ಉಂಡು. ಕಾರಣ, ಮನೋದೈಹಿಕ
ಆಸ್ತಿಮತೆ. ಪರಿಸರಲಾ ಈ ಅಸಮಾನತೆಗು ಪರಿಣಾಮವಾದು
ಬರು. ಅಪ್ಪನ ಪೆಟ್ಟುದ ಪೋಡಿಗೆಗು ಇಲ್ಲಡು ಸರಿ ಉತ್ತರ ಕೊರ್ಪಿನ ಬಾಲೆ, ಸಾಲೆದ ಪರೀಕ್ಷೆಡು ಪೂರಾ ತಪ್ಪು
ಬರೆದೇ ಬರ್ಪೆ. ಉಂದು ನಮಲಾ ತೂಪ ನಮ್ಮ ನೆರೆಕರೆಟು.
ಅಂಗೀಭೂತ ಪ್ರಜ್ನೆ
ತಲೆಮಾರುಡ್ಡು ವ್ಯಕ್ತಿ – ಸಮಷ್ಟಿ – ಸಾಮಾಜಿಕವಾದು ಪರತ್ತೊಂದು ಬರ್ಪಿನ ದೈಹಿಕ-ಮಾನಸಿಕ ಶಕ್ತಿ, ವಿವೇಕ, ಬುದ್ಧಿಶಕ್ತಿ,ಸೂಕ್ಷ್ಮಬುದ್ಧಿ, ವಂಶೊಡು ಅಥವಾ
ದೇಶೊಡು ಬೊಕ್ಕ ಪುಟ್ಟುನ ಜೋಕೆಳೆಗು ಬರ್ಪುಣು. ವ್ಯಕ್ತಿಗತ ವಿಜ್ನಾನದ ಸಂಶೋಧನೆ, ತಾಂತ್ರಿಕ ಪ್ರಗತಿ ಬೊಕ್ಕ ಆತ್ಮ ಕೇಂದ್ರಿತ
ಅಧ್ಯಾತ್ಮಿಕ ಉನ್ನತಿ– ಉಂದೆಕು ಮಾತ ಜನ್ಮಜನ್ಮಾಂತರದ ಜ್ನಾನ ಸಂಪಾದನೆನೇ ಕಾರಣ.
ಸಮಾರೋಪ
ಕಲೆ ಕಲ್ತುದು ಬರ್ಪುಜಿ,‘ಕಲ್ತುದು ಬರ್ಪುಜಿ’ ಪನ್ನುಂಡ ಅಂಕೆ (ಗುಣ) ಕಡಿಮೆ ತಿಕ್ಕುನು. ಆಕೆಳೆನ ಸಾಧನೆಡು ಅಕುಳು ಆ
ಕುಂದುನು ದಿಂಜಾವೆರು.ಇಡೀ ಬಾಳುನು ತರೆಪುವೆರು, ಪರ್ತೆ ಮಲ್ಪುವೆರು.
ಕಲೆ ಕಲ್ಪಾಂದೆಲಾ ಬರ್ಪುಜಿ. ಇತ್ತೆಗು
ಬೋಡಾಯಿನ ವಿದ್ಯೆನು ಕಲ್ತುದೇ ಕಲ್ಪೊಡು, ತೆರಿಯೊನೆರೆ. ಬೇತೆ ಸಾದಿ ಇಜ್ಜಿ. ಇಜ್ಜಾಂಡ ಬೇತಕಳೆನ ಎದುರುಡು ನಮ ಪಿರ ಬೂರ್ವ. ಕಲ್ಪಾಂದೆ ಬರ್ಪಿನ ವಿದ್ಯೆ ತಾನಾದೆ ಬರ್ಪುಣು. ಪೂರ್ವಕೃತ ಸಂಪಾದನೆ.
ಈ ನಿಬಂಧೊನು ಎಚ್ಚ ಒಯ್ತುದು ಬರೆಪುಜೆ.
ಇಡೆಗೇ ಉಂತಾವೆ. ಉದ್ದ ಕುದ್ಯ
ಇತ್ತುಣ್ಡ ಪಣುಳೆ.
ಕರ್ತವೆ: ಹೊಸಬೆಟ್ಟು ವಿಶ್ವನಾಥ, ಪುಣೆ
