60. ಕುರೆ- ಬಡವು - ಒಂಜಿ ಮುಗಿಯಂದಿ ಕತೆನಾ?

ತುಳುಟೊಂಜಿ  ಪಾತೆರೊ  ಉಂಡು:  “ಮೀನಾತ್  ಕುರೆ  ಉಂಡು,  ಉಂಡಿನಾತ್  ಬಡವುಂಡು” .    ಮೆಯಿತ  ಕುರೆಕು  ಮೀಯೊಡು,  ಬಂಜಿದ ಬಡವುಗು  ಉಣೋಡು.   ಉಂದು   ನರಮಾನಿನ  ದಿನದಿನತ  ತರತರತ ಚರಿಗೆಡು ಸೇರ್ದಿನ  ರಡ್ಡು  ವಿಸಯೊಳು.

ಜೋಡಿ ನುಡಿ ಕುರೆ-ಬಡವು

ಕುರೆ  ಪಣ್ನುಂಡ ಮಯಿಲೆ.   ಬಡವು  ಪಣ್ನುಂಡ ತಿಂಪಿನ  ಆಶೆ  ಪುಟ್ಟುನು. ಒಂಜಿ  ವಿಶಯೊನು  ತೆರಿಯೊನುನ ಬಯಕೆನು, ಆಸೆನುಲಾ  ಬಡವು  ಇಂದುದು  ಪಣ್ಪೆರು.   ಆಯಿಕು ಜ್ನಾನಕ್ಷುಧಾ  ಯಾ ಜ್ನಾನಪಿಪಾಸೆ ಇಂದುದು ಪಣೋಲಿ.    ಕುರೆಲಾ,  ಬಡವುಲಾ    ಅಪಗಪಗ ಅಪುಣು.   ಕಾರಣ  ದಿಂಜ.  ಗೊಬ್ಬನಗ,  ಕೆಲಸ  ಮಲ್ಪನಗ,  ಲಡಾಯಿ  ಮಲ್ಪನಗ  ಕುರೆ  ಅಪುಣು.      ಕೆಲಸ  ಮಲ್ಪಡು  ಮಲ್ಪಂದೆ   ಉಪ್ಪಡು   ಬಂಜಿಗ್   ಬಡವು  ಲಕ್ಕೋನ್ದೆ  ಉಪ್ಪುನು. 

ಬಾಸೆ  ನಮ  ಮಲ್ಪುನ  ವಿಚಾರದ   ಪರಪುಣ  ಸಾದಿ.   ಇತ್ತೆ,  ಮಿತ್ತುಡ್  ಪಣ್ತಿನ  ನುಡಿಗಟ್ಟು  ಒಂಜಿ  ಸರ್ವ ಸಾಮಾನ್ಯ  ವಿಚಾರ  ಸರಣಿ.    ನಿತ್ಯ ಬದುಕುಡ್  ನಮ  ತೂಪಿನ   ಸಾಮಾನ್ಯ  ನಿಜ  ಸಂಗತಿ.   ಮಾನವ  ಶರೀರ  ನಮ   ದುಂಬುದ  ಜನ್ಮ  ಜನ್ಮೊಡು ಮಲ್ದಿನ  ಎಡ್ಡೆ ಕೆಲಸದ  ಫಲ  ಇಂದುದು  ತೆರಿದಿನಕೆಲೆನ  ಪಾತೆರೊ.“ಶರೀರಮಿದಂ    ಪುಣ್ಯಂ  ಖಲು  ಧರ್ಮ ಸಾಧನಮ್”. ಎಡ್ಡೆ  ಕೆಲಸ  ಮಲ್ಪುನೆಕ್  ಶಕ್ತಿ  ಕೊರ್ಪಿಣಿ   ಸೀಕ್-ಸಂಕಟ  ದಾಂತಿ  ನಮ  ಶರೀರ, ಅತ್ತೆ!“ ದೇವೆರು ದಯೆಟ್  ಕೊರ್ತಿನ  ಈ ಮಾನವ ಶರೀರೊಗು  ಹಾನಿ  ಮಲ್ಪಡೆ”   ಇಂದುದು  ನಮ್ಮ  ದಾಸೆರುನಕುಲಾ  ಪಣ್ತೆರು.

ಇಂಚ  ಸುರುಟು  ಬರ್ಪಿನ  ಪ್ರಶ್ನೆ:  ಸೀಕ್-ಸಂಕಡೊನು   ದೂರ  ದಿವೋಡಾಂಡ  ದಾನೆ  ಮಲ್ಪೋಡು?  ದಿನನಿತ್ಯಲಾ   ಮಿಯೋಡು,  ಕೈ-ಕಾರ್-ಬಾಯಿ  ಗಡಿಗಡಿ ದೆಕ್ಕೊಡು.    ಅಂಗಿ-ಕುಂಟು ಬದಲು  ಮಲ್ತುದು  ಅರ್ದುದು  ಪಾಡ್ದಿನ  ಸ್ವಚ್ಚ  ವಸ್ತುಲೆನು  ತುತ್ತೊಡು.   ಪಿದಯಿ  ಪೋದು   ಬತ್ತಿನ   ಬೊಕ್ಕ  ನಮ್ಮ ಪಾದದಡಿ,  ಕೈಕಾರ್-ಮೋನೆ   ಸರಿ  ದೆಕ್ಕೊಡು, ಇಲ್ಲ  ಜಾಲಿಡ್ಡು  ಉಲಾಯಿ   ಬನ್ನಗ.    ದುಂಬುದ   ಪದ್ಧತಿ  ಇಂಚನೆ  ಇತ್ತುನು.   ಅಂಚ  ಮಲ್ತಿಜೆರುಡ   ಇಲ್ಲದ   ಎಲ್ಯ  ಬಾಲೆನುನಾ   ಪತ್ತುಜೆರ್.     ಕೈಮುಗ್ಗಿದು  ನಮಸ್ಕಾರ  ಮಲ್ಪುನಲಾ  ಪದ್ಧತಿಲಾ  ಉಂದೇ ಕಾರಣೋಗು  ಬಳಕೆಗು   ಬಯಿದಿನು. 

ಶರೀರ   ಕೊರ್ನಗ  ದೇವೆರು  ಬಡವುಲಾ  ಕೊರ್ತೆರು. ಶರೀರದ  ಶಕ್ತಿ  ಬೊಕ್ಕ  ಆರೋಗ್ಯನು   ಒರಿಪೆರ  ರುಚಿ-ಶುಚಿಯಾದಿತ್ತಿನ   ಉಂಪು-ತಿಣ್ಪುನು  ಹಿತಮಿತವಾದು  ತಿನೋಡು.  ಕಡಿಮೆಲಾ  ಅತ್ತ್  ಎಚ್ಚಲಾ  ಅತ್ತ್.  ಅಡ್ಪಿಲ್ಲು  ಸ್ವಚ್ಛ  ಉಪ್ಪೋಡು.  ತಿಂಪಿ  ಬಾಜನೊಳು   ಶುದ್ದ   ಉಪ್ಪೋಡು.  ತರಕಾರಿ, ಬೇತೆ  ಮಾತ  ಮಸಾಲ ಸಂಭಾರೊಲೆನು, ಖಾದ್ಯ  ಪದಾರ್ಥಲೆನು  ಆಡಿಪುಣ ದುಂಬು  ಸ್ವಚ್ಛ  ಮಳ್ಪೊಡು. ಬಂಜಿಗ್  ಎತೋ  ಬೋಡೋ   ಆತೆ, ಆಡಿಗೆ  ಬನ್ನೇ  ಮುಟ್ಟ  ತಿನೋಲಿ. ಪುಕ್ಕಟ್ಟು ತಿಕ್ಕುನು  ಪಣ್ದು  ಮುಕ್ಕುನತ್ತ್ .  ಒರಿ  ಬಾಯ್  ಪಾಡ್ಡು  ಒರಿದಿನ  ನುಪ್ಪುನು  ಕುಡ  ಬೊಕ್ಕೊರಿ   ತಿನೇರ  ಬಲ್ಲಿ .     ಒರಿ  ಬಾಯ್   ಪಾಡ್ಡು   ಪರಿನ   ನೀರುನು  ಕುಡ  ಒರಿ  ಪರೆರ  ಬಲ್ಲಿ.    ಉಂದು   ಮಾತ   ಎಲ್ಯಿಡ್   ಪಾಲೆನೆ  ಮಲ್ತೊಂದು  ಬಯಿದಿನ  ಸಂಗತಿ.  ಇತ್ತೆ  ಮದತಿದು    ಬುಡ್ತ.    

ಮೆಯಿತ  ಕುರೆನು  ದೆಪ್ಪೋಡು,  ತಿನಿಪಿನ-ಉಣ್ಪಿನ   ವಸ್ತುಲೆನು   ಹಾಳಾವಂದಿನಂಚ  ದಿವೊಡು.  ಕುರೆ-ಬಡವನು  ಜೋಡಿಯಾದ್   ಪಣೆರ  ಉಂದೆ   ಕಾರಣ   ಪಣ್ದು    ಯಾನ್  ಎಣ್ಣುವೆ.

ಮೀನಾತ್  ಕುರೆವುಂಡು, ಉಂಡಿನಾತ್   ಬಡವುಂಡು

ಈ  ಪಾತೆರೊ  ಬಜೀ  ಸಾದಾರಣ  ವಿಚಾರ.   ಆಯಿತ  ತಿರುಳೆಂಚಿನ,  ವಿಶೇಷತೆ  ಎಂಚಿನ ?  ರಡ್ಡ್  ಬಗೆಟು  ಆಲೋಚನೆ  ಮಲ್ಪೊಲಿ -  ಲೌಕಿಕವಾದು ಬೊಕ್ಕ  ಆಧ್ಯಾತ್ಮಿಕವಾದು.

ದಿನ ನಿತ್ಯದ  ಕೆಲಸ ವ್ಯಾವಹಾರಿಕವಾದು:

ದಿನಾಲ  ಮೀಯಂದಿನಕೆಳೆಗುಲಾ,  ದಿನಾಲ  ಜಳಕ  ಮಲ್ಪೊನಕೆಳೆಗು  ತೆರಿದಿನ  ಕತೆ.    ಮೀದು  ಬೈರಾಸುಡು   ಒರೆಸೆನಗ  ಒರಿದಿನ  ಕುರೆ   ಉಂಡೆ ಉಂಡೆಯಾದ್  ಲಕ್ಕುನು.   ಆ  ಉಂಡೆಳು  ಮೀಯನಗ  ಜಾರ್ದು  ಪೊವಂದಿನ  ತೈದಿ  ಚರ್ಮದ  ಕುರೆಕುಳು.   ನಮ್ಮ  ಉಪ್ಪುನ  ವಾತಾವರಣಲಾ,  ಶರೀರ ಉಲಾಯಿ  ಆಪಿನ  ಕೆಲಸೊಲುಲಾ  ನಮ್ಮ ಮೆಯಿತ  ಕುರೆನು  ಉಂಡು  ಮಲ್ಪುನು.   ಬೆಗತ್ತುಂಡ   ದೂಳು  ಪತ್ತುದು  ಮೆಯಿ  ವಾಸನೆ  ಬರ್ಪುನು, ಎಚ್ಛಾದು  ಅರೆಕಾಲೊಡು.  ಮರಿಯಾಲ, ಚಳಿಗಾಲೊಡು   ಮೆಯ್ನೀರು  ಗಡಿ ಗಡಿ  ಬರ್ಪುನು.   ಆ  ಜಾಗೊಡು  ವಾಸನೆ  ಉಂಡಾಪುಣು.   ನಮ್ಮ  ಕೈಕಾರು,  ಕೆಬಿ,  ಕಣ್ಣು,  ತರೆ,  ಕಿಜಿಕಿಲಡಿ,  ಪೂವೊಳು,  ಲಂಗ ಲಂಗೋಟುದಡಿ,  ಇಂಚ  ಮೈ  ಇಡೀ  ಕುರೆ ಕುರನೆ.  ಮೀಯಿ  ಬೊಕ್ಕಲಾ  ಕುರನೆ.

ಅಂಚನೆ  ಬಡವು.  ಉಣ್ಣಿನಾತ್, ತಿನ್ನಿನಾತ್  ಬಡವು-ಅಂಗಲಾಪು!   ನಮ್ಮ  ಮೆಯಿನ್  ಸುದೃಢೊಡು  ದಿವೆರ   ರೂಢಿಡು   ತಿಂಪಿನ,  ಉಂಪಿನ  ಸಮಯೊನು  ನಿಶ್ಚಿತ  ಮಲ್ತುದೆರು.   ದಿನೋಕು  ಮೂಜಿ ಸರ್ತಿ.    ನಡುನಡುಟು  ತಿನ್ಪಿಲಾ  ಉಂಡು – ಅವು ಬಡವುಗತ್ತ್;  ನಾಲಾಯಿದ  ತೊಡುಕು    ಕೆಲವೆರು  ಇಂಚ ತಿನ್ನೊಂದೆ   ಉಪ್ಪುವೆರು;   ಗುಂಡಕ್ಕಗುಂಡಣ್ಣೆರು  ಆಪೆರು.

ಸರಿ  ಇಂಚ, ಕುರೆ-ಬಡವು  ಮುಗಿಯಂದಿ  ಕತೆ. ದೈಹಿಕ  ದೃಷ್ಟಿಡು  ಅತ್ಯಗತ್ಯ -  ರೋಗರುಜಿನೊನು  ದೂರ  ದಿವೆರ.   ಮೆಯಿತ   ಎಡ್ಡೆಗು,  ರಕ್ಷಣೆಗು ಕುರೆನು ಕಳೆವೊಡು, ಬಂಜಿದ  ಬಡವುಗು ಸಮಯ  ಸಮಯೊಗು ತಿನೊಂದುಪ್ಪೊಡು.    ಜೀವನಲೀಲೆನು  ಸಮಗಟ್ಟಾದು  ಮುಗಿಪೆರ,  ಸಾರ್ಥಕ  ಮಲ್ಪೆರ ಮಾನವ ಶರೀರ ಒಂಜಿ ಸಾದಾರಣ ವಸ್ತು  ಅತ್ತ್.    ಜೀವನ  ಲೀಲೆ  ಇಂದುದು  ಪಣ್ನಗ  ಆಯಿತ  ಉಲಾಯಿತ  ಅರ್ಥ ಬೇತೆಲಾ ಉಂಡುಂದು   ತೋಜತ್ತೆ!  

ಕೋವಿಡ್-19  ಮಹಾಮಾರಿ

ಕುರೆತ,  ಬಡವುದ  ವಿಸಯೊಡು  ಪಾತೆರೆನಗ,  ಇಡೀ  ಭೂಮಂಡಲೊನು  ಅರಂಬುದು  ಪತ್ತುದಿನ  ಕೋವಿಡ್-19  ಪಣ್ಪಿ   ಮಹಾಮಾರಿದ   ಮಿತ್ತ್  ಮುಲ್ಪ  ಪಾತೆರುನ   ಅಪ್ರಾಸಂಗಿಕ ಆವಂದು.  ಕೊರೋನ  ವಿಷಾಣು (corona virus)-ಡ್ಡು  ಉಂಡಾಪಿನ ಒಂಜಿ ರೀತಿದ  ಶೀತ (ನೆಗಡಿ)  ರೋಗವುಂದು.     ಅವು  ಸ್ಥಾನಿಕವಾದು ಬರ್ಪಿನ  ರೋಗ (Pandemic).  ಒಂಜಿ  ಪ್ರದೇಶದುಳಯಿ,  ದೇಶದ ಉಳಾಯಿ  ಬರ್ಪುನು ಬೊಕ್ಕ  ಜನಕುಲೆ   ಸಂಪರ್ಕೊಡು  ಸಂಸರ್ಗ  ಸಂಕ್ರಾಮಿಕ ರೋಗ (Endemic)-ವಾದು  ದೇಶ-ವಿದೇಶೊಗು  ಪಕ್ಕನೆ ತೂವತೂವನೆ ಪಗರುನು, ಪೀಡಿತ  ವ್ಯಕ್ತಿ  ತೆಮ್ಮ  ಲಪ್ಪನಗ,  ಪಾತೆರನಗ  ಬಾಯಿದ  ಉಬ್ಬಿನೀರುದ  ಪನಿಪನಿ  ರಟ್ಟುನು, ಅಂಗಿ-ಕುಂಟುಗು, ನೆಲಕು, ಕೈತಲ್ದ  ವಸ್ತುಲೆಗು  ತಾಗುನು.    ಆ  ಪನಿ  ನಮ್ಮ  ಕೈಕಾರುಗು  ಪತ್ತುನು ಕೈತಲ್  ಬನ್ನಗ.   ಬಾಯಿ, ಮೂಕು, ಕೆಬಿ,  ಕಣ್ಣುದ ಸಾದಿಡ್  ನಮ್ಮ ದೇಹೊಗು  ಪೊಗ್ಗುನು  ಗುಮ್ಮೆದಂಚ.    ಮೂಜಿ  ಮಟ್ಟದ  ಆಯಿತ  ರಂಗಭೂಮಿ.   ಪದಿನಾಲ್    ದಿನ ಬಾಯಿಡ್  ಗಂಟೆಲುಡು  ಇತ್ತುದು, ಕಿರ್ಮೆಲ್ ಉಂಡು  ಮಲ್ಪುನು, ಶ್ಲೇಷ್ಮ ಗಟ್ಟಿಯಾದು ಪೊಟ್ಟು ತೆಮ್ಮೊನು  ಬರ್ಪಾವುನು,  ವಿಪರೀತ  ಜ್ವರ  ಏರುನು.    ಶ್ಲೇಷ್ಮೊನು  ಪಿದಯಿ  ಪಾಡಿಜಿಡ  ಶ್ವಾಸನಾಳೊಡ್ಡು   ಶ್ವಾಸಕೋಶೊಗು  ಪೊಗ್ಗುದು   ಪಸರುದು  ದಮ್ಮ  ಕಟ್ಟವುದು   ಪೀಡಿತ  ವ್ಯಕ್ತಿನು ಕೆರ್ಪುನು. ಈ  ಮಹಾಮಾರಿನು  ನಮನೆ ಲೆಪ್ಪುನು -  ಸ್ವಂತ  ಮೆಯಿತ ಮಡಿ ಮೈಲಿಗೆನು  ಸರಿ ದೀಜಿಡ, 3­-ಮೀಟರ್ ದೂರ  ಸಾಮಾಜಿಕ ಅಂತರನೊನು  ಕಾಪಾಡಿಜಿಡ, ತಿನ್ಪಿ  ಆಹಾರ-ಪಾನೀಯನೊನು  ಸುದ್ದ  ದೀಜಿಡ,  ವಾತಾವರಣನೊನು ಹಾಳು  ಮಲ್ತುಂಡ. 

ಕೆಲವು ಪ್ರಶ್ನೆಲೆಗು  ತಿಕ್ಕುನ  ಉತ್ತರ:

ಕೊರೊನ ವಿಷಾಣು  ರಡ್ಡು  ಪದರುಡು ಉಪ್ಪುನ  ಒಂಜಿ ನಿರ್ಜೀವ  ಜೀವಾಣು.    ಚೀನದ  ವುಹಾನ್    ಜೈವಿಕ  ವಿಷಾಣು ಪ್ರಯೋಗಾಲಯೊಡ್ಡು  ಪಸರುನಿಂದು  ಮಾತೆರುಲಾ  ಸಂಶಯ  ಮಲ್ಪುವೆರು.  ಈ ಜೀವಾಣು  ಮಾಟಮಂತ್ರದ  ಮಂತ್ರವಾದಿಳು  ಪಗೆನಕೆಲೆನು   ದೆಪ್ಪರೆ ಮಲ್ಪುನ  ಕೃತಿಮ  ಯಂತ್ರದಂಚ*  ಕೃತಿಮ ರಚನೆ  ಇಂದುದು  ವಿಶ್ವದ  ಕೆಲವು   ವೈಜ್ನಾನಿಕೆರೆನ  ಮತ.   ಉಂದು ಮಾನವೆರು  ಮಳ್ತಿನ  ಪ್ರಕೃತಿ  ನಾಶದ   ಕಾರಣೋಡು   ದೇವೆರು   ಕಡಪುರಿನ  ವಿಷಾಣು  ಇಂದುದುಲಾ  ಪಣ್ಪೆರು.   ಈ  ಸೀಕ್-ಗು  ಬಡವೆ-ಸಿರಿವಂತೆ,   ಮೇಲ್-ಕೀಳು,  ಜಾತಿ-ಧರ್ಮ,  ದೇಶ-ವಿದೇಶ,  ಪಣ್ಪಿ  ಪಕ್ಷಪಾತವಿಜ್ಜಿ.     ನಿಯಮ  ತತ್ತಿನಕೆಲೆನು   ದಮ್ಮುಕಟ್ಟಾವುದು  ಕೆರ್ದು   ಪಾಡುನು.  ಮುಸ್ಕಟೆಗು   ತಿಕ್ಕುನ   ಗಾಳಿ  ಕಾಸು   ಕೊರುಂಡಲಾ   ತಿಕ್ಕಂದೆ   ಪೋಪುಣು. 

* ಟಿಪ್ಪಣಿ: ಏತೋ  ವಿಚಿತ್ರ ಕತೆಳೆನು ಶಾಲಾ ಸಮಯೊಡು  ಕೇಣುದುಲ್ಲಾ.  ಒರಿ  ನಡತ್ತೊಂದು ಪೊವುಂಡುಲ್ಲೆ.  ಅಪಗ  ಒಂಜಿ ಕಕ್ಕೆ ಪಾರೊಂದು  ಬತ್ತುದು ತನ್ನ ಕೊಕ್ಕುಡಿತ್ತಿನ   ಬಚ್ಚಿರೆದ ಇರೆನು ಅಯನ  ತರೆಕು  ಪಾಡನಗ   ಆಯೆ   ತರೆತಿರುಗುದು  ಮಗರುದು  ಬೂರುದು  ತೈಪೆ.  ಇರೆಟ್  ಎಂಚಿನನಾ  ಬರೆದುಪ್ಪುನು.   ಇಂಚಿತ್ತಿನ  ಕತೆಲೊಳು ಮಾತ.

ಇತ್ತೆ ಮಹಾಮಾರಿದ ಮಿತ್ತ್  ಲಕ್ಕುನ ಕೆಲವು  ಪ್ರಶ್ನೆಳೆಗು ಇಂಚ  ಉತ್ತರ  ಕೊರ್ಪೆರು: 

·         ಕೊರೊನ  ವಿಷಾಣುದ  ಪಿದಯಿ ಮೆಯಿಟ್ ಚರ್ಬಿದ  ರಕ್ಷಾವರಣ  ಉಂಡು.  ತೈತಿ  ಪೆದ್ದೆ ಕಣ. ಅಂಚಾದು  ಆಯಿಕ್  ನಾಶ  ಇಜ್ಜಿ.   ನಂಕು  ಕೆರೆರ  ಆಪುಜಿ.    ಆಯಿತ  ಪಿದಯಿದ   ಕವಚ   ತಾಲುಣ್ಡ  ಅವು  ತಾನಾದೆ  ತುಣುಕು  ತುಣುಕು  ಆದು  ಬೂರ್ದು  ನಾಶ ವಾಪುನು.  ಏತ್  ಸಮಯ, ಯಾಪ  ಬೂರುನು  ಪನೆರ  ಬರ್ಪುಜಿ.  ಉಂದೆಕೆ  ಬೆಚ್ಚ   ತಡೆವೆರಾಪುಜಿ.   ಪಿದಯಿ  ಏತ್   ತೇವ ಬೊಕ್ಕ  ಬೆಚ್ಚ   ಉಂಡು  ಆಯಿತ  ಮಿತ್ತ್  ಒಂತೆ  ಒಂತನೆ  ನಶಿದ್  ಬೂರುನು.

·         ಗಾಳಿಡ್  ಪಗರುಜಿ.   ಪೀಡಿತ  ವ್ಯಕ್ತಿ  ನಿರೋಗಿ  ವ್ಯಕ್ತಿನ  ಸಂಸರ್ಗೊಗು  ಬತ್ತೆಡ,  ಆಯಡ್ಡು  ನಿರೋಗಿಗು  ಪಗರುನು  ಸೀಂತಿನ  ಪನಿಪನಿಟು,  ಕುಂಟುದ್ದು,   ಕೈಕುರ್ಕುನೆಟ್ಟು,  ಮುತ್ತು  ಕೊರ್ಪಿನೆಟ್ಟುಡು  ದಾತ್ರ .   ಮೆಯಿಟ್  ಗಾಯ  ಉಪ್ಪರೆ   ಬಲ್ಲಿ.

·         ಸಾಮಾಜಿಕ  ಅಂತರ  ಕಾಪಾಡೊಡು.    ಪ್ರದೇಶ- ಪ್ರದೇಶದ  ಸಂಪರ್ಕೋಗು  ತಡೆ ಮಲ್ಪೊಡು    ಈ  ಸೀಕು  ಪಸರಂದಿನಂಚ  ಮಲ್ಪೆರ.  “ಲಾಕ್  ಡೌನ್”  ಮಲ್ಪುನ  ಉದ್ದೇಶಲಾ  ಉಂದೆ.   ಮುಖ-ಕವಚ  (Mask - ಮೊಗಕಾಚ )  ಪಾಡೊಡು;  ಆವೆನುದೆಕ್ಕೊಂದು  ಉಪ್ಪೊಡು,  ಅಲ್ಪಮುಲ್ಪ  ದಕ್ಕೆರ ಬಲ್ಲಿ.    

·         ಸೂರ್ಯ ಪ್ರಕಾಶೊಡ್   ಈ  ಅಣು ನಾಶವಾಪುನು.   ಅಂಚಾದು  ನಮ  ಉಪ್ಪುನ  ಪರಿಸರ  ತಂಪಾದು, ತೇವಭರಿತವಾದು,  ಉಪ್ಪೆರ  ಬಲ್ಲಿ.   ಕತ್ತಲೆ  ಉಪ್ಪೆರ  ಬಲ್ಲಿ    ಬೋಲ್ಪು  ಬೂರುನ  ಜಾಗುಡು ಈ  ಜೀವಾಣು  ಸ್ವಯಂ  ಪುಡವುನು,  ನಷ್ಟ  ಆಪುಣು.   ಬೂರಿನ ವಸ್ತುದ  ಗುಣ ಪ್ರಕಾರ,  ಆಯ್ತ  ಮಿತ್ತು    ಬೂರಿನ  ವಿಷಾಣು  ನಾಶವೆರ   ಒಂಜೆ  ಪ್ರಮಾಣದ  ಸಮಯ  ದೆತೊನುಜಿ.

·         ಸಾಬೂನು,  ಬೊಕ್ಕ  ಕುಂಟು  ಅರ್ದುನ  ಸಾಬೂನುಡು   20 ಸೆಕಂಡ್   ಕೈನ್   ದೆಕ್ಕೊಡು,  ಗಡಿ ಗಡಿ.   20 ಡಿಗ್ರಿ ಉಷ್ಣಾಂಶದ  ಬೆಚ್ಚ  ನೀರುನು  ಪರೊಂದು  ಉಪ್ಪೊಡು.  ಈ  ಶಕ್ತಿಹೀನ   ಕಣ   ಅಪಗ  ವಿಘಟನವಾದು ನಷ್ಟವಾವು.  ಕುಂಟುಗು  ಬ್ಲೀಚಿಂಗ್  ಪೌಡರು  ನಡಪಂದು.65%  ಆಲ್ಕಹಾಲ್  ಇತ್ತುಣ್ಡ  ಶುದ್ಧಿಕಾರಕ  ದ್ರವೊಟು ನಾಶವಾವೆರ  ಸಾಧ್ಯ.     ಕೀಟನಾಶಕ   ದ್ರವೊಟು   ಈ  ಜೀವಹೀನ   ಕಣೋಕ್ಕು  ದಾಲ  ಪರಿಣಾಮವಾವಂದು.

·         ಆಟಿಲ್   ಮಲ್ಪುನ  ವಸ್ತುಲೆನು  ಬೆಚ್ಚ  ನೀರುಡು  ಸುರುಟು   ದೆಕ್ಕೊಡು. ಉಣ್ಪೂ-ತಿಣ್ಪುನು ಮುಚ್ಚಿದು   ದಿವೊಡು

·         ಇದ  ಮುಟ್ಟ, ತಕ್ಕ  ಮರ್ದುನು,  ಲಸಿಕೆನು   ನಾಡ್ಡು  ಪತ್ತುದಿಜೆರ್,   ವಿಶ್ವದ  ಮಾತ   ಲಸಿಕೆ  ತಯಾರು  ಮಲ್ಪುನ  ಪ್ರಯೋಗಶಾಲೆಳೆಡು  ಈ ಕೆಲಸ  ಮಳ್ತೊಂದು  ಉಲ್ಲೆರು.

 

ಆಂಡ, ಭಾರತೊಡು ಮಲೇರಿಯೊಗು   ಕೊರ್ಪಿನ ಮರ್ದು chloroquine  ಬೊಕ್ಕ  Hydroxy Chloroquine (ಹೈಡ್ರೋಕ್ಷಿ ಕ್ಲೋರೋಕ್ವೀನ್.  ಬೇತೆ  ಮರ್ದುದೊಟ್ಟುಗು  ಕೊರುನಗ  ಪರಿಣಾಮಕಾರಿಯಾದು ಕೆಲಸ ಮಲ್ಪುನು.  ಈ ದಿಕ್ಕಿಡ್, ಪರದೇಶದ ಅಕೆಳೆನ  ಅಗತ್ಯೊನುನುಲಾ  ಭಾರತ ಪೂರೈಸೋಂದುಂಡು.

 

ಪರಜೀವಿನಾಶಕ ಮರ್ದು (Antibiotics) ಈ  ಜೀವಾಣುಗು  ನಾಟುಜಿ..

 

·         ಬೆಚ್ಚ  ನೀರುದ   ವಾಪು (ಸ್ಟಿಮಿಂಗ್, steaming)  ದೆತೊನುಡು,  ಬೆಚ್ಚ  ನೀರು  ಪರೊಂದು  ಉಪ್ಪೊಡು.   ಉಪ್ಪು ನೀರು  ಗಂಟೆಲುಗು  ಪಾಡ್ಡು  ಗರಗರ   ಮುಗುಳೊಡು.  ಸೀರ್ಕದ  ನೀರ್  ಕೆಲಸೋಗು  ಬರಂದು.

·         ಪೋಡೆರ  ಬಲ್ಲಿ.   ನಮ್ಮ ದೇಹದ  ಸಹಜ  ರಕ್ಷಣಾ ಶಕ್ತಿನು  ಎಚ್ಚ ಮಲ್ಪೊಡು.  ಶುಚಿ  ರುಚಿಯಾದಿತ್ತಿನ  ಇಲ್ಲದ   ಒಣಸು  ಮಲ್ಪೊಡು.  ಇಲ್ಲಡೆ  ಉಪ್ಪೊಡು, ಲಾಕ್-ಡೌನ್  ನೀತಿನ್  ಪಾಲನೆ  ಮಲ್ಪೊಡು.

ಆಧ್ಯಾಮಿಕ  ದೃಷ್ಟಿಕೊನೊಡು:

ದೈಹಿಕ ಪ್ರಾಕೃತಿಕ  ಆರೋಗ್ಯೋಗು  “ಮಡಿ” ಎಂಚ  ಅಗತ್ಯೊನೋ,  ಅಂಚನೆ  ಮಾನಸಿಕ  “ಮಡಿಲಾ”   ಕಾಪಾಡೊಡು.       ಎಡ್ಡೆ  ಮಡಿ  ವಾತಾವರಣೋಡು   ಸುವಿಚಾರ  ಮೂಡುನು.   ಉಂದೆಕು  ಅಪಗಪಗ   ಆತ್ಮ  ಚಿಂತನೆನು  ಮಲ್ಪೊಡು– ದೇವ ದರ್ಶನೊಗು.  ಪದೇಪದೇ  ನಮ  ಮನಸು  ಉಳಮುಖ  ಅವನಗ “ನಮ  ಏರ್”   ಪಣ್ಪಿ  ನಮ್ಮ  ಇರವುದ  ಬಗ್ಗೆ  ಚಿಂತನೆ  ಬರ್ಪುನು.  ನಿರಂತರ  ಆತ್ಮ ಚಿಂತನೆಡು ಮನಸು  ಶಾಂತವಾದು  ಮೌನವಾಪುಣು.   ವಿಚಾರ  ಆತ್ಮಸ್ಥಿತವಾಪುಣು.  ತಿಳಿ ನೀರುದ  ಕೆದುಟು  ನಮ್ಮ  ಪ್ರತಿಬಿಂಬೋನು  ತೂಪಿನಂಚ   ನಮ್ಮ ದೇಹದುಳಯಿದ   ಆತ್ಮ  ದೇವೆರನೇ   ಅಂಶ  ಪಣ್ಪಿ  ಅರಿವು  ಬರ್ಪುನು.  ಹಗುರ  ಚಿಂತನೆ   ಪಿದಯಿದ  ಜಗೊಟು.  ಗಹನ  ಚಿಂತನೆ  ಉಲಾಯಿದ  ಜಗೊಟು.

ದಿನದಿನತ ಮಡಿ ಮಡಿಟ್  ಕುರೆ ಪೊಪುಣು  ದೇಹ-ಮನಸುದ.    ತೆರಿಲ ತೆರಿಲ ಪನ್ಪಿ ನಿತ್ಯವಿಚಾರೊಡು - ಬಡವುಡು  - ಆತ್ಮೋನ್ನತಿ  ಅಪುಣು.  ಬದಕುದ   ನಿತ್ಯ ವ್ಯವಹಾರ  ಸಾಮಾನ್ಯ  ಪಿದಯಿಡ್,  ಅಂತರ್ಮನೊಡು  ವಿಶೇಷ. ಉಳಾಯಿ  ತಿರುಗನಗ   ತತ್ವದರ್ಶನ.  ಅರಿವೆ  ನಮ್ಮ  ಇರುವಿಕೆ.  

ಜಗ  ನಲಿಪಡು

ಈ  ಪರೀಕ್ಷೆದ  ಕಾಲೊಡು  ನಮ  ನಮ  ಆರೋಗ್ಯನು  ನಮ ನಮ  ಸರಿ ದೀದು,  ಬೇತಕೆಳೆಗು  ತೊಂದರೆ  ಆವಂದಿನಂಚ  ತೂವೊಡು.   ನಮ  ಎಡ್ಡೆ  ಆಂಡ   ಜಗ  ಎಡ್ಡೆ. 

ಯಾನ್  ಪ್ರಬಂಧ  ಕುಶಲಿಯತ್ತ್.  ಈ  ಸರಲ ಲಲಿತ  ಪ್ರಬಂಧೊಡು  ನಮ್ಮ  ಹಿರಿಯಕೆಳೆನ   ಪಾತೆರೊಗು  ಒಂತೆ  ಬೊಲ್ಪು  ಪಾಡ್ಡು,  ಆಕೆಳೆನ  ನುಡಿತ  ಮಥಿತಾರ್ಥ  ತೆರಿಪಾವೆರ   ಪ್ರಯತ್ನ  ಮಳ್ತುದೆ.    ನಿಕುಳ್ಕೇಣುಳೆ, ಸುಖೊಟು  ಬದುಕುಲೆ. ಮುಗಿಯಂದಿ  ಕುರೆ-ಬಡವುದ   ಗೊಬ್ಬು ಸಾರ್ವಕಾಲಿಕ  ಸತ್ಯ.  ಭಾರತಿಯೆರಾಯಿನ  ನಮ  ಮಾತ  ಕೊರನೊನು  ಜಯ್ತಿದು  ನಾಮಾವಶೇಷ  ಮಲ್ಪುಗ.     ಗೆಂದಡು  ಭಾರತ   ಲಸಿಕೆ  ತಯಾರು ಮಲ್ಪುನೆಟ್ಟು!

ನಮ  ಮಾತಾ ಸೇರ್ದ್  ಕೊರೊನಾ ವಿಷಾಣುಲೆನು ನಿಗ್ರಹ ಮಲ್ಪುಗಾ

 

ಹೊಸಬೆಟ್ಟು ವಿಶ್ವನಾಥ (ಪುಣೆ)

20200429..