49. ಸ್ಯೂರಿಶ್ ( Zürich ) ದುಲಾಯಿ

ಪುಲ್ಯಕಾಂಡೆ ಚುಮು ಚುಮು ಚಳಿ. ಕಾಂಡೆ ಎಣ್ಮ ಗಂಟೆ ಆನಗ ವಂತೆ ವಂತೆ ಬೊಲ್ಪಾಪಿನ ತೋಜುಂಡು. ಅದಮುಟ್ಟ ಕತ್ತಲೆನೆ. ಕೋಣೆದುಲಾಯಿ ಬೆಚ್ಚ ಮಲ್ಪುನ ಉಪಕರಣ (ಹೀಟರ್) ಉಪ್ಪುನ ಕಾರಣ ಪಿದಾಯಿದ ಚಳಿ ಗೊತ್ತಾಪುಜಿ. ಕಂಡಿದ ಬಾಕಿಲ್ ಸಡಿಲ ಮಲ್ತ್’ನ್ಡ ಚಳಿ ಉಲಾಯಿ ಬರ್ಪಿನ ಗೊತ್ತಾಪುಂಡು. ಗೂಗಲ್’ದ ಪ್ರಕಾರ ಇನಿ 6-7 ಡಿಗ್ರಿ ಸೆಂಟಿಗ್ರೇಡ್ ಉಷ್ನತೆ.

ಕೋಣೆ(ರೂಮು)ದ  ಬೆಂಪುಕರಣ (ಬೆಚ್ಚುಪಕರಣ=ಹೀಟರ್) ವಿದ್ಯುತುಡು ನಡಪುನವು ಅತ್ತ್! ಕಂಡಿದ  ಅಡಿತ ಗೋಡೆಗ್ ತಿಕ್ಕಾದಿನ ಬೊಲ್ದು ಕೊಳಾಯಿಲೆಡ್ ಮಲ್ದಿನ ಊರುದ ಪಡಿಮಂಚಾವುದ ಲೆಕ್ಕ ತೋಜುಂಡು.(ಚಿತ್ರ ತೂಲೆ). ಈ ಬೆಂಪುಕರಣದ ಕೊಳಾಯಿಡ್  ಬೆಚ್ಚ ನೀರ್  ಸಾಗಾವೆರ್. ಅಯಿತ ಶೆಕಗ್ ಕೋಣೆ(ರೂಮು)ದ ಉಲಾಯಿ ಬೆಚ್ಚನೆದ ವಾತಾವರಣ ಅನುಭವೊಗು ಬರ್ಪುಂಡು. ಯುರೋಪುದ ಮಲ್ಲ ನಗರೊಲೆಡ್ ದಿನಾ ಸಂಗ್ರಹವಾಪಿನ  ಕಜವುನು ಪೊತ್ತಾದ್ ಬೆಂದಿರ್ (ಬೆಚ್ಚ-ನೀರ್) ಮಂತ್’ದ್ ಕೊಳಾಯಿ(ಪೈಪು)ಲೆಡ್  ಸಾಗಾದ್ ಇಲ್ಲದುಲಾಯಿ ವಾತಾವರಣ ಬೆಚ್ಚ ಮಲ್ಪರೆ ಬಳಸುವೆರ್ ಇಂದ್ ಯೂ-ಟ್ಯೂಬುಡು ತೂತಿನ ನೆಂಪಾಪುಂಡು.

ಆಂಡ, ಬೆಂದಿರ್/ಮೀಪಿನ ಅಂಕಣದುಲಾಯಿ ಉಪ್ಪುನ ಬೆಂಪುಕರಣ ಉಂದೆ ರೂಪೊಡು ಇತ್ತ್’ನ್ಡಲಾ  ಅವು ವಿದ್ಯುತುದವು. ಮೀಯಿ ಬೊಕ ಅರ್ದಿನ ಕುಂಟು ಆಜಿಡರೆ ಮಲ್ದಿನವು.

ಅಂಚ ತೂನಗ ಇತ್ತೆ ಉಪ್ಪುನ ಕೋಣಿವಾಸ ( ಅಪಾರ್ಟ್’ಮೆಂಟ್)ದ ಗಾತ್ರ ಅಂದಾಜಿ 25 ಅಡಿ ಉದ್ದ, 15 ಅಡಿ ಅಗೆಲ. ನಡುಟು 7 ಅಡಿ ಉದ್ದ x 6 ಅಡಿ ಅಗೆಲದ ಹಾಸಿಗೆ, ಹಾಸಿಗೆದ ಅಂಚಿ ವಂತೆ ಜಾಗ ಬುಡುದು ಅಟಿಲ್ ಮಲ್ಪರೆ ವ್ಯವಸ್ಥೆ. ಅಟಿಲ್ದ ವ್ಯವಸ್ಥೆ 2 ಅಡಿ ಅಗೆಲ, 9 ಅಡಿ ಉದ್ದದ ಜಾಗೊಡು. ಉಂದೆಟ್ 2x6 ಅಡಿ ಅಟಿಲ್ದ ಮೇಜಿ. ಮೇಜಿದ ಮಿತ್ತ್ ಒಂಜಿ ಜೋಡಿ ಉಳಚೋದಕ ದಿಕ್ಕೆಲು (ಇಂಡಕ್ಷನ್ ಸ್ವವ್),  ದೆಕ್ಕರೆ, ನೀರ್ ಜಿಂಜಾವರೆ ಜಲಪಾತ್ರ (ಬೇಸಿನ್). ಅಯಿತೊಟ್ಟುಗು ಕಾಫಿಮಲ್ಪುನ (ಕಾಫಿಮೇಕರ್) ಉಪಕರಣ. ಅಡ್ಪಿ ಮೇಜಿದ ಮಿತ್ತ್’ದ ಕಪಾಟುಲೆಡ್ ಬಾಜನ ದೀಪಿನ ವ್ಯವಸ್ಥೆ. ಬೊಕ  ಸೂಕ್ಷ್ಮ ತರಂಗದ ದಿಕ್ಕೆಲ್ (ಮೈಕ್ರೊವೇವ್ ಒವನ್) ಮೇಜಿದ ಅಡಿತ ಮುಚ್ಚಿನ ಕಪಾಟುಲೆಡ್  ಬಾಜನರ್ದುನ (ಬಾಜನ ದೆಕ್ಕುನ ಉಪಕರಣ-ಡಿಶ್ ವಾಶರ್), ತಂಪುಕರಣ (ರೆಫ್ರಿಜಿರೇಟರ್) ಬೊಕ ಕಜವುದ ಬುಟ್ಟಿ. ಮೇಜಿದ ಬಲತ್ತ ಜೋಡಿ  ಕಪಾಟುಲು ಅಟಿಲ್ದ ಸಾಮಾನುಲು ಕುಂಟು ಇತ್ಯಾದಿ ಗೋಡಿಸಾದ್ ದೀವರೆ,

ಬೆಂದಿರ್ ಕೊಟ್ಯ 5 x 9 ಅಡಿ ಜಾಗದ ಅಂಕಣ, ಅಯಿಟ್ 5 x 3 ಅಡಿತ ಗಾಜಿ (ಗ್ಲಾಸ್) ದ  ಮೀಪಿ ಚಿಲಿಂಬಿ (ಶವರ್)ಗ್, ಒರಿದಿನ 5 x 6 ಅಡಿ ಜಾಗೊಡು ಮಲಪೀಠ (ಕಮೋಡ್) ಬೊಕ ಕನ್ನಡಿಲಾ, ಕೈಜಲಪಾತ್ರ  (ಹ್ಯಾಂಡ್ ವಾಶ್ ಬೇಸಿನ್)ಲಾ. ಅಯಿತ ಎದುರು ಗೋಡೆಡ್ ಕುಂಟು ನುಂಗಾವರೆ ವಿದ್ಯುತುದ  ಬೆಂಪುಕರಣ! ಯುರೋಪುದ ತಂಡಾಸುಲೆನ ವಿಶೇಷ  ಇನ್ನಗ ಮಲಪೀಠದ ಬರಿಟ್  ನೀರ್ದ ಚಿಮ್ಮಕ (ಫಾಸೆಟ್) ಉಪ್ಪುಜಿ, ಬದಲಾದ್ ತೆಲು ಕಾಕಜಿ (ಟಿಶ್ಶೂ ಪೇಪರ್)ದ ಸುರುಳಿ ಉಪ್ಪುಂಡು! ಕಾಕಜಿಡ್ ವರಸುನವು  ಏತಾಂಡಲಾ ಸ್ವಚ್ಚ ಆಪುಜಿಯಾ-  ಇನ್ಪಿನ ನಂಮ ಊರುದಕಲೆಗ್  ಮೀಪಿ ಅಂಕಣದ ಉಲಾಯಿದ ಕೈ  ಚಿಲಿಂಬಿ (ಶವರ್) ಉಪಯೋಗೊಗು ಬರ್ಪುಂಡು!

ಉಂದು ಒಂಜಿ ಸೇವಾ ಕೋಣೆವಾಸ (ಸರ್ವೀಸ್ ಅಪಾರ್ಟ್’ಮೆಂಟ್ ). ವಾರೊಗೊಂಜಿ ದಿನ ಕೆಲಸದಕುಲು ಬತ್ತ್’ದ್ ಕೋಣೆನ್ ಸ್ವಚ್ಚ ಮಲ್ತ್   ಹಾಸಿಗೆದ ಪುದೆಪುನೆನ್  ಬದಲ್ ಮಲ್ತ್  ಪೋಪೆರ್. ವಾರೊಗು ರಡ್ಡ್ ದಿನ ಬೈರಾಸ್ (ಟವೆಲ್) ಬದಲ್ ಮಲ್ಪುವೆರ್. ಕೋಣೆಡ್ ಅಂತರ್ಜಾಲ (ಇಂಟರ್’ನೆಟ್ ವೈಫಿ) ವ್ಯವಸ್ಥೆ ಉಂಡು. ಈ ಸೇವಾ ಕೋಣೆವಾಸದ ತಿಂಗೊಲ್ದ ಬಾಡಿಗೆ ಸುಮಾರ್ 2,500 ಸ್ವಿಸ್ ಫ್ರಾಂಕುಲು ( CHF) .

ಊರ್ಲಿಕಾನ್

ಉಪ್ಪುನ ಜಾಗದ- ಉಪನಗರದ- ಪುದರ್ : ಊರ್ಲಿಕಾನ್! ಪುದರ್ ಕೇಣುನಗ ಎಂಕ್ ನಂಮ ಊರುದ ಪುದರುಲು ನೆಂಪುಗು ಬರ್ಪುಂಡು. ಊರುಲಿ + ಕಾನ!  “ಊರು” ಬೊಕ “ಉರ್ಲಿ” ಲು ನಂಮೌಲುಲಾ ಉಂಡತ್ತೆ! (ಉರ್ಲಿ= ಬೈತುರ್ಲಿ, ಪಂಜುರ್ಲಿ ಇತ್ಯಾದಿ). ಅಂಚನೆ “ಕಾನ”ಲಾ ನಮ್ಮೂರುಡುಲಾ ಉಂಡು! ವಿಭಿನ್ನ ಭಾಷೆಲೆನ ಶಬ್ದೊಲೆಡ್ ಉಪ್ಪುನ  ಪ್ರಾಚೀನ ಸಾಮರಸ್ಯದ ವಿಚಾರ ನನೊಂಜಿ ಸರ್ತಿ ಪಾತೆರುಗಾ.

ಊರ್ಲಿಕಾನದ ರೈಲ್ವೇ ನಿಲ್ದಾಣ ಕೈತಲ್ಡೇ ಉಂಡು.  ಯುರೋಪು ಸ್ವಿಜರ್’ಲ್ಯಾಂಡುದ ವಿಶೇಷೊಲು ಇನ್ನಗ ಪೊರ್ಲುದ, ಸ್ವಚ್ಚದ ರೈಲುಲು. ಟಿಕೇಟ್ ಗೆಪ್ಪರೆ ನಿಲ್ದಾಣೊಡು ಉಪಕರಣೊಲು ಉಂಡು.  ರೈಲ್’ಗ್ ಜರ್ಮನ್ ಭಾಷೆಡ್ “ಬಾನ್” (Bahn ) ಇನ್ಪೆರ್ . ಬಾನ್ ಇನ್ನಗ ನಂಮ ದೇಶದ ಶಬ್ದೊಲೆಡ್  “ಬಾಹನ” (ಬಂಗಾಲಿ), “ವಾಹನ” (ಸಂಸ್ಕೃತ) ಇತ್ಯಾದಿ ಪದೊಕುಲೆಗ್ ಸಮಾನವಾಯಿನ ಜರ್ಮನ್ ಭಾಷೆದ ಪದ. ಅಕುಲು ರೈಲ್ವೇ ನಿಲ್ದಾಣೊಗು ಬಾನ್’ಹೂಫ್ (Bahnhof ) ಇನ್ಪೆರ್.

ಬಾನ್’ಹೂಫ್ ಊರ್ಲಿಕಾನ್ ಊರುದ ನಡುಟೆ ಉಂಡು. ಊರ್ಲಿಕಾನ್ದ ಮೂಡಾಯಿ ಭಾಗೊರ್ದು ಪಡ್ಡಾಯಿಗ್ ನಡತ್ತ್  ಪೋವರೆ ರೈಲ್ವೇ ನಿಲ್ದಾಣದ  ಅಡಿಟ್ ಮಲ್ಲ ಸುರಂಗ ಮಾರ್ಗ ಮಲ್ತ್’ದೆರ್.

ಸಂಚಾರ

ನಗರದ ಉಲಾಯಿ ಸಂಚಾರೊಗು ರೈಲ್ವೇ ಅತ್ತಾಂದೆ ರಸ್ತೆಡ್ ಪೋಪಿನ ರಸ್ತೆರೈಲ್ (ಟ್ರಾಮು) ಬೊಕ ಬಸ್ಸುಲೆನ ವ್ಯವಸ್ಥೆ ಉಂಡು. ಸಂಚಾರ ವ್ಯವಸ್ಥೆಲೆನ್ ಏಕ ರೂಪಿ ಗಣಕೀಕರಣ ಮಲ್ದಿನ ಕಾರಣ ರೈಲ್’ಗ್ ಗೆತ್ತಿನ ಟಿಕೇಟುಡು ಟ್ರಾಮು ಇಜಿಂಡ ಬಸ್ಸುಡುಲಾ ಪೋವರೆ ಆಪುಂಡು. ನಗರದ ಉಲಾಯಿ ಆಡಳಿತ ವಲಯ (ಜೋನ್- Zone) ಲೆನ್  ಮಲ್ತ್ ‘ದೆರ್.   ಉದರ್ಮೆಗ್  ಸ್ಯೂರಿಶ್ ನಗರ ಕೇಂದ್ರ ಭಾಗ  ಬೊಕ ಊರ್ಲಿಕಾನ್ 110 ವಲಯೊಗು ಬರ್ಪುಂಡು. ಆಯಿನ  ಕಾರಣ ಒಂಜಿ ವಲಯೊದ ಪ್ರಯಾಣೊಗು ಗೆತ್ತಿನ ಟಿಕೇಟಿಡ್ ಬೇತೆ ವಲಯೊಗು ಉಪಯೋಗ ಬರ್ಪುಜಿ. ರಡ್ಡ್ ಮೂಜಿ ವಲಯ ಬರ್ಪಿನಡೆ ಅಯಿಕುಲೆಗ್ ಅನ್ವಯ ಆಪಿನಾತ್  ಮೌಲ್ಯದ ಟಿಕೇಟ್ ಗೆಪ್ಪೊಡು. ಸಾಮಾನ್ಯವಾದ್ ಟಿಕೆಟ್ ಪರಿಶೀಲನೆ( ಚೆಕ್ಕಿಂಗ್) ಕಡಿಮೆ. ಟಿಕೆಟ್ ಪರಿಶೀಲಕೆರ್ ಬನ್ನಗ ಕೈಯಿಟ್ ಸರಿಯಾಯಿನ ಟಿಕೆಟ್ ಇಜ್ಜಿಂಡ,  ಬಾಯಿ ಮುಚ್ಚೊಂದು  ಬಾರಿ ದಿಂಜ ಮೊತ್ತದ ದಂಡ ಕಟ್ಟೊಡಾಪುಂಡು!

ಒಂಜಿ ನಿಲ್ದಾಣೊರ್ದು ನನೊಂಜಿ ನಿಲ್ದಾಣೊಗು ಸುಮಾರ್ 2.80 ಸ್ವಿಸ್ ಫ್ರಾಂಕುದ ಟಿಕೇಟ್ ಆಪುಂಡು.ಸ್ಯೂರಿಶ್ ನಗರೊರ್ದು ವಿಮಾನ ನಿಲ್ದಾಣೊಗು ಪೋವರೆ 6.80 ಸ್ವಿಸ್ ಫ್ರಾಂಕುದ ಟಿಕೇಟ್ ಆವೊಡು. ಸಾಮಾನ್ಯವಾದ್ ಈರ್ ಗೆತ್ತಿನ ಟಿಕೇಟ್ 90 ನಿಮಿಷ ಮುಟ್ಟ ವಾಯಿದೆ ಉಪ್ಪುಂಡು. ಟಿಕೇಟುಡು ಟಿಕೇಟು ಗೆತ್ತಿನ ದಿನಾಂಕ, ಸಮಯ, ವಲಯ ಮಾತಾ ಮಾಹಿತಿ ಪ್ರಿಂಟ್ ಆದುಪ್ಪುಂಡು. ವಾಯಿದೆ ಮುಗಿನೆರ್ದ್  ಬೊಕ ಬೇತೆ ಟಿಕೇಟ್ ಗೆಪ್ಪೊಡು. ದಿಂಜ ತಿರ್ಗರೆ ಉಂಡು, ವಂತೆ ಕಾಸ್ ಒರಿಪಾವೊಡು ಇಂದ್ ಇತ್ತ್’ನ್ಡ ದಿನತ್ತ ಟಿಕೆಟ್ ಗೆಪ್ಪೊಲಿ. 110 ವಲಯದ ದಿನತ (24 ಗಂಟೆ ವಾಯಿದೆ) ಟಿಕೇಟ್ 8.80 ಸ್ವಿಸ್ ಫ್ರಾಂಕುಗು ತಿಕ್ಕುಂಡು. ಇಡೀ ಸ್ವಿಸರ್ಲ್ಯಾಂಡ್’ದ  ಉಲಾಯಿ ತಿರುಗೆರೆ ಆಪಿನ  24 ಗಂಟೆದ ಟಿಕೇಟ್ 110 ಸ್ವಿಸ್ ಫ್ರಾಂಕುಗು ತಿಕ್ಕುಂಡು. ಈ ಟಿಕೇಟ್ ಪಸೊಂದು ಸ್ವಿಸರ್’ಲ್ಯಾಂಡುದ ಊರುಲು ಲೂಸರ್ನ್, ಬೆರ್ನ್, ಬಾಸೆಲ್, ರೈನ್ ಜಲಪಾತ, ಊಟ್ಲಿಬರ್ಗ್ ಪರ್ವತ ಇಂಚ ಮಾತಾ ರೈಲ್, ಟ್ರಾಮು, ಬಸ್ಸು ಪಸೊಂದು ಪೋದ್  24 ಗಂಟೆದ ಉಲಾಯಿ ತಿರುಗೊಂದು ಬರೋಲಿ. ಜೋಕುಲೆಗ್, 6 ವರ್ಷೊರ್ದು ಕಿನ್ಯಕಲೆಗ್ ಟಿಕೆಟ್ ಇಜ್ಜಿ. 6 ವರ್ಷೊದು 12 ವರ್ಷೊದ ಜೋಕುಲೆಗ್ ಅರ್ಧ ಟಿಕೆಟ್. ಒಂಜಿ ತಿಂಗೊಳ್ದ ಇಜಿಂಡ ಒಂಜಿ ವರ್ಷದ ಪಾಸ್ ಮಲ್ಪಾವೊಂಡರ್ಡ ಆ ಅವಧಿಡ್ ಮಾತಾ ಟಿಕೆಟಿಲೆಡ್ ಅರ್ಧ ಬಿಲೆ ಕರಿತಿನ ಟಿಕೆಟ್ ಮಲ್ಪುನ ಸೌಲಭ್ಯ ಉಂಡು. ತಿಂಗೊಳ್ದ ಪಾಸ್ಗ್ 110 ಬೊಕ ವರ್ಷದ ಪಾಸ್ಗ್ 160 ಸ್ವಿಸ್ ಫ್ರಾಂಕ್ ಆಪುಂಡು.

ಟ್ರಾಮುಲು ವಿದ್ಯುತ್ ಚಾಲಿತ ವ್ಯವಸ್ಥೆಲು ವಂತೆ ನಿದಾನವಾದ್ ಪೋಪಾ. ಬಸ್ಸುಲು ರೈಲುಲು ವಿದ್ಯುತ್ ಚಾಲಿತ ಅಂಚನೆ  ಡೀಸಲ್’ದವು  ಉಲ್ಲಾ.  ಅರ್ಜೆಂಟ್  ಇತ್ತ್’ನ್ಡ  ವೇಗದ  ರೈಲುಡು ಬೇಗ ಪೋಪಿನ ಎಡ್ಡೆ.

ಸುರಕ್ಷೆ – ಸಮಯಪಾಲನೆ

ಸಾಮಾನ್ಯವಾದ್ ಮಾತಾ ಊರುಲೆಡ್ ರೈಲ್ವೆ ನಿಲ್ದಾಣೊಲೆಡ್ ಬರ್ಪಿನ ಪೋಪಿನ ರೈಲುಗಾಡಿಲೆನ  ಸಮಯ ಅವೆನ್ ಪತ್ತರೆ ಪೋವೊಡಾಯಿನ  ವಾಹನಂಕಣ (ಪ್ಲಾಟ್’ಫಾರಂ) ಇತ್ಯಾದಿ ವಿವರೊಲು ಉಪ್ಪುಂಡು. ಇಂಚಿನ ನಿಖರ ವಿವರೊಲು ರೈಲ್ವೇ ನಿಲ್ದಾಣೊಡು ತಿಕ್ಕುನು ಮಾತ್ರಾ ಅತ್ತ್ ರೈಲುಲು ಕ್ಲಪ್ತ ಸಮಯೊಗು ಬರ್ಪಿನ ಪೋಪಿನ ವಿಶೇಷ ಸಂಗತಿ. ಸಾಮಾನ್ಯವಾದ್ ರೈಲುಗಾಡಿ ತಡವಾಂಡ ಅವೆನ್  ಕೆಲ ಸೆಕೆಂಡುಲೆಡ್ ಲೆಕ್ಕ ಪಾಡೊಲಿ ಆತೆ!

ಉಂದೇ ರೀತಿಡ್, ಬಸ್ಸು/ಟ್ರಾಮುಲೆನ ಆಯಾ ನಿಲ್ದಾಣೊಲೆಡ್ ಅಂಕಿಕ (ಡಿಜಿಟಲ್) ಫಲಕ  ದುಂಬು ಬರ್ಪಿನ ಬಸ್ಸು/ಟ್ರಾಮುಲೆನ ನಂಬರ್ ಬೊಕ ಪೋಪಿನ ನಿಲ್ದಾಣದ ಪುದರ್ ತೆರಿಪಾವುನ ವ್ಯವಸ್ಥೆ ಉಂಡು.

ರೈಲ್ /ಟ್ರಾಮು /ಬಸ್ಸು ಬತ್ತ್’ದ್ ನಿಲ್ದಾಣೊಡು ಉಂತಿ ಬೊಕ ಸ್ವಯಂಚಾಲಿತ ಬಾಕಿಲ್ ತೆರೆವುಂಡು. ಬಸ್ಸುಲಾಂಡ  ಮಿತವುನಕಲೆಗ್ ಅನೂಕೂಲ ಆವರೆ ಬಾಕಿಲ್ದ ಎತ್ತರೊನು ತಗ್ಗಾವುನ ವ್ಯವಸ್ಥೆ ಉಂಡು. ಅಂಚನೆ ಟ್ರಾಮುಲೆಡ್ ಬಾಕಿಲ್ ದೆಪ್ಪುನಗ ಒಂಜಿ ಪಲಾಯಿ ಮುಟ್ಟು ಬತ್ತ್’ದ್ ಜನಕುಲೆಗ್ ಸರಾಗೊಡು ಮಿತಾವರೆ ಅನುಕೂಲ ಮಲ್ತ್ ಕೊರ್ಪುಂಡು. ನಿಲ್ದಾಣೊಡು  ಸುರುಟು ಜಪ್ಪುನಕಲೆಗ್ ಆದ್ಯತೆ. ಜಪ್ಪುನ ಜನಕುಲು ಮಾತಾ ಜಪ್ಪುನ ಮುಟ್ಟ ಏರ್ಲಾ ಮಿತಾವುನ ಪದ್ದತಿ ಇಜ್ಜಿ! ಪಿದಾಯಿದ ಜನ ಮಿತಾಯಿ ಬೊಕ ಬಾಕಿಲ್ ಮುಚ್ಚುಂಡು. ವಾಹನೊಲೆಡ್  ಬಾಕಿಲ್ ಪಾಡ್ದ್ ಪಿದಡಿ ಬೊಕ, ಏರ್ಲಾ ಪಾರೊಂದು ಬತ್ತ್’ದ್ ಮಿತವರೆ ಪ್ರಯತ್ನ ಮಲ್ಪುನು, ಆವಂದೆ ಜಾರ್ದ್ ಬೂರುನ  ಇಂಚಿನ ಮಾತ (ನಮೌಲು ಇತ್ತಿನಂಚಿನ) ಪರಿಸ್ಥಿತಿಯೇ ಇಜ್ಜಿ. ಅಂಚನೆ ವಾಹನ ಪೋವರೆ ಸುರು ಮಲ್ತಿನೆರ್ದ್ ಬೊಕ ಏರ್ಲಾ, ಲಾಗಿವುನ,  ಲಾಗಿದ್ ಬೂರುನ ಅವಕಾಶ ಇಜ್ಜೇ ಇಜ್ಜಿ.

            ಸ್ಯೂರಿಶ್ ಎಚ್.ಬಿ - ಮುಖ್ಯ ರೈಲು ನಿಲ್ದಾಣ

        ಸ್ಯೂರಿಶ್ ನಗರದ ಮುಖ್ಯ ರೈಲು ನಿಲ್ದಾಣೊಗು ಸ್ಯೂರಿಶ್ ಹಾಫ್ಟ್ ಬಾನ್’ಹೂಫ್ (Zürich  Haupt Bahnhof) ಇನ್ಪೆರ್. ಉಂದು ಸ್ಯೂರಿಶ್ ಎಚ್ ಬಿ ( Zürich HB) ಇಂದೇ ಪ್ರಸಿದ್ಧ ವಾದುಂಡು. ಲಿಮ್ಮತ್ ಬೊಕ ಸಿಹಲ್ ಇನ್ಪಿನ ರಡ್ಡ್ ಸುದೆಕುಲು ಸೇರುನ ಜಾಗೊಡು ಈ ಎಚ್.ಬಿ. ಇನ್ಪಿನ ಮುಖ್ಯ ನಿಲ್ದಾಣ ಬರ್ಪುಂಡು. ನಿಲ್ದಾಣದ ಅಡಿಟ್ ಮಾನವ ನಿರ್ಮಿತ ಒಂಜಿ  ಸುರಂಗದಂಚಿನ ಕಾಲುವೆದ ಮೂಲಕ ಸಿಹಲ್ ಸುದೆ ಪರತೊಂದು ಪೋಪುಂಡು. ಮುಖ್ಯ ನಿಲ್ದಾಣದ  ನೆಲತ ಮಟ್ಟೊಡು ವಾಹನಾಂಕಣ (ಪ್ಲಾಟ್’ಫೋರ್ಮ್-  Platform) 3 ರ್ದ್ 18 ಮುಟ್ಟ ಉಲ್ಲ. ನೆಲ ಮಾಳಿಗೆಲೆಡ್ ಮೂಜಿ ಬೇತೆ ಬೇತೆ ಮಟ್ಟೊಲೆಡ್ 21-22 / 31-32; 33-34/ 41-42; 43-44 ವಾಹನಾಂಕಣೊಲೆನ್ ತೂವೊಲಿ. ಈ ನಡುತ ಮಾತಾ ವಿಶಾಲವಾಯಿನ ಪೋಪಿನ ಬರ್ಪಿನ ಜಾಗೊಲೆಡ್ ಆಧುನಿಕ ಶೈಲಿದ  ಮಾಲ್ ರೂಪದ ಬಗೆ ಬಗೆತ ಅಂಗಡಿ ಸಾಲುಲು ತೂವರೆ ತಿಕ್ಕುವಾ. ಬೋಡಾಯಿನ ರೈಲು ಬರ್ಪಿನ-ಪೋಪಿನ ವಾಹನಾಂಕಣೊಗು ಜನ ಪೋಯರೆ ಸೂಕ್ತ ಜಾಗೊಲೆಡ್   ಎತ್ತರಕರಣೊಲು (ಎಲೆವೇಟರುಲು-Elevators), ಸಾಲುಮುಟ್ಟುಲು (Stair case) ಉಂಡು.

ಸ್ಯೂರಿಶ್ ಕೆದು- (ಸ್ಯೂರಿಶ್’ಝೀ  Zürichsee)

ಸ್ಯೂರಿಶ್ ನಗರದ ಮಲ್ಲ  ಪ್ರಾಕೃತಿಕ ಆಕರ್ಷಣೆ  ವಿಶಾಲವಾಯಿನ ಕೆದು. ಕೆದುತ ಉದ್ದ  ಕಿಲೊಮೀಟರುಲು. ಅಗೆಲ

ಲಿಮ್ಮತ್ ಸುದೆ ಉಂದೆಕ್ ಬತ್ತ್ ಸೇರುಂಡು.