41. ಅಪಾಯ! ಕುಳ್ಳಡ ಪೊಲ್ಲುನಾಯ ಬರಿಟ್.....!

ನಮ ಪುಟ್ಟಿ ಬೊಕ್ಕ,ಎಲ್ಯಿಡ್ ಅಪ್ಪೆ-ಅಮ್ಮೆರ್ ಬೆಂದುದು ಉಣುಪು-ತಿನಿಪು ತಿನಿಪಾವೆರು.  ಬೊಕ್ಕ ನಮ ಬುಳೆದು  ನೇಲ್ಯಾವನಗ ನಮನೆ ಕೆಲಸ ಮಳ್ಪೊಡು.  ಒವ್ವುಲಾ ಕೆಲಸ ಮಲ್ಪನಗ ತಪ್ಪುಲಾ, ಒಪ್ಪುಲಾ ಆಪುಣು.  ಎಲ್ಯಿಡ್ ಹಿರಿಯೆರು ಎಡ್ಡೆ ಬುದ್ಧಿದ ಪಾತೆರೊ ಪಣುದು ನಮನು ತಿದ್ದುವೆರು.  ಆಕೆಲ ಪಾತೆರೊನು ನಮ ದೆತ್ತು ಕಳೆವೆರ ಬಲ್ಲಿ.  ನೇಲ್ಯಾಯಿ ಬೊಕ್ಕ ಜೋರು ಮಲ್ತುದು, ನೆರ್ಪೆರು.  ನೆರನಗ ಕೆಲವೆರು, “ಯೆಂಕೊಂಜ  ದೆತ್ತಿ ದೆರ್ಪಾಟಗೆನಾ, ಯೆನ್ನ ಕೆಬಿಕುಳು ಪರಿದ್ ಪೋವಂದಿನ  ಮಲ್ಲೆ” – ಇಂಚೊಂಜಿ ಪಾತೆರೊ ಪಣುವೆರು; ನಿಕುಲಾ ಕೇಣ್ದುಪ್ಪರ್.  ಎಡ್ಡೆಗು ಪಣ್ಪಿನಕುಲಾ ಉಪ್ಪೆರ್, ಪಡ್ಕೆಗು  ಪಣ್ಪಿನಕುಲಾ ಉಪ್ಪೆರ್.  ನೆರ್ಪಿನಕೆಲ ಬುದ್ಧಿ ಆಕೆಲ ಸಂಬಂಧ ಎಂಚಿನವು ಇಂದುದು ತೋಜಾದು  ಕೊರುವು.   ಮೋಕೆಡು ಬುದ್ಧಿ ಪಣ್ಪಿನೆಕ್ಕುದ ಬೊಕ್ಕ ಮತ್ಸರೋರ್ದು ಮುರ್ಯೋ  ಕೊರ್ಪಿನೆಕ್ಕುದ ವ್ಯತ್ಯಾಸ ಪಣ್ಪಿ ನಾಲಾಯಿಡೇ ಗೊತ್ತಾವು.

ಪೊಲ್ಲುನಾಯಿ, ಅರ್ಪಿನಾಯಿ

ಈ ಸಂಬಂಧದ ವಿಚಾರೊನು  ಬರಿಕು ದೀದ್, ವಿಚಾರ ಮಲ್ಪುಗ.  ಸಾಮಾನ್ಯವಾದ್  ನಮ್ಮ ತುಳು ಪಾತೆರೊಡ್  ಏತೋ  ನೀತಿವಾಕ್ಯೊಳುಳ್ಳ.  ಅವು ಮಾತೆರೊಗುಲಾ  ಎಡ್ಡೆ ಆವೊಡೆಂದೆ ಪಂತಿನ ಪಾತೆರೊಳು.  ಇಂಚಿನ ಒಂಜಿ ಪೊರ್ಲು ನುಡಿನು ಇತ್ತೆ  ನಮ ಒಂತೆ ಆಲೋಚನೆ ಮಲ್ಪುಗ:  

“ಪೊಲ್ಲುನಾಯ ಬಲತ್ತಡ್  ಕುಳ್ಳಡ, ಅರ್ಪಿನಾಯ ದತ್ತುಡ್ ಕುಳ್ಳಡ”

ಓದುನ ನಿಕ್ಲುಲಾ ಕೇಣ್ದುಪ್ಪರ್ ಈ ಪಾತೆರೊನು. 

ಅಪಾಯ! ಅಯ್ಕೊಂಜಿ ಸೂಚನೆ

ಮಿತ್ತುದ ಪಾತೆರೊಡು ಪಡ್ಕೆ ಆಪಿನ ಸೂಚನೆದ ಕೆಂಪು ಬೋಲ್ಪು ತೋಜುಂಡು.  ಅಂಚಾದ್,‘ಇಂಚ ನಡಪಡೆ, ಹುಷಾರ್’ ಇಂದುದು ಗಂಟೆ ಬೊಟ್ಟುದು ಪಂಪುಣುಆ ಪಾತೆರೊ.

ಪೊಲ್ಲುನಾಯನ ಬಲತ್ತಡ್ ಕುಳ್ಳಡ!  ಬಲತ ಬರಿಟ್ ಕುಳ್ಳುಂಡ, ಪೊಲ್ಲುನಾಯನ ಬಲತ ಕೈಟಿತ್ತಿನ ಸೂಜಿ ನಮ್ಮ ಕಣ್ಣುಗು ತಾಗುದು ಪೋವು, ಸೂಜಿದಾರ ಉದ್ದ ಇತ್ತುಣ್ಡ.  ಕಣ್ಣು  ಒಟ್ಟೆ ಆದ್ ನೆತ್ತರ್ ಬರು.  ಆಸ್ಪತ್ರೆಗು ಬಲ್ಪೋಡಾವು.  ಆಪಿನ ಅಪಾಯೊಗು ಸುರುಟೆ ಉಪಾಯ ಪಣ್ತೆರ್ ದುಂಬುದಕುಳು ಆಕೆಳೆನ ಅನುಭವೊಡು.

ಅರ್ಪಿನಾಯನ ದತ್ತ್-ಡು ಕುಳ್ಳಡ!  ದಾಯೆಗ್ ಪಣ್ದುಂಡ, ಜೋರುಜೋರುಡು ಬುಲಿಪುನಾಯನ ಕಣ್ಣುಡ್ ನೀರು ಜಪ್ಪರೆ ಸುರುವಾಪುಣು, ಮೂಕುಡ್  ತೊರಳೆ (= ಸೊರಳೆ) ಜಾರುನು,ಬಾಯಿಡ್ ದೊಳ್ಳೆ ಅರಿನ್ಡು. ಕುಡಲಕುಡಲ  ಆಯೆ  ಆಯೆನ ದತ್ತ ಕೈಟ್ ಮೂಕುನು ಒರೆಸೊಂದೆ  ಉಪ್ಪುವೆ.  ಆಯಿ ಸಿಂಟ್-ದು ಆಯೆನ ಅಂಗಿಗ್ ಒರಿಸಿನ ತೊರೊಲೆ, ದೊಲ್ಲೆ, ಅಯನ ದತ್ತ ಬರಿಟ್ಟಿತ್ತಿನ ನಮ್ಮ ಮೆಯಿಕ್  ರಟ್ಟುದು ಬೂರು.  ಅಯಿದಾತ್ರ, ‘ಜೋಕೆ’ ಇಂದುದು  ಸುರುಟೆ  ಪಣ್ದು  ಬುಡ್ತೆರ್ ಪಿನಿದಿನ ನಮ್ಮ ನಾಡುದ  ಹಿರಿಯಾಕುಲು.  

    

ಎಚ್ಚರ  ಕೊರ್ಪಿನ ಪಲಾಯಿ

ಇತ್ತೆ,ಏತೋ ಅಪಾಯಸೂಚಕ ಫಲಕೊನು ನಮ ದಿನನಿತ್ಯಲಾ ತೂಪ – ಸಾಲೆಡ್, ರಸ್ತೆಡ್, ಕೆದು-ತುದೆ-ಕಡಲ ಬರಿಟ್,ಗುಡ್ಡೆದ ಬರಿಟ್ – ಇಂಚ ಮಾತ. ಉದಾ:  ಬೇಗ ಪಿದಡುಳೆ, ಅಪಾಯ ತಪ್ಪಾವುಳೆ; ಗಾಡಿ ಮೆಲ್ಲ ಬುಡುಲೆ, ದುಂಬು ತಿರುವು ಉಂಡು; ಮುಲ್ಪ ನೀರುಗು ಜಪ್ಪಡೆ, ಸುಳಿ ಉಂಡು;  ಈ ಕಣಿತ ಬರಿಟ್ ಉಂತಡೆ, ಫೋಟೋ ದೆಪ್ಪಡೆ,ಗಾಳಿ ಜೋರುಂಡು, ನೀರ್ದ ಬೊಲ್ಲ ಒರನೇ  ಬರ್ಪುನು ನೆಟ್ಟೆ ತೋಡು, ತುದೆ, ಕಡಪಡೆ –ಸುಳಿ, ಕಯ ಗುರಿ ಉಂಡು,ಕಳ್ವ ಬೊಲ್ಲ ಬರ್ಪುನ್ದು,ಒಯ್ಪುನು - ಇತ್ಯಾದಿ.ಇತ್ತೆ, ಶಾಲೆ-ಕಾಲೇಜುದ ಕೆಲವು  ಜೋಕುಳು ಶೈಕ್ಷಣಿಕ ವಿಹಾರೊಗು ಪೋತಿನವುಳು ಎಚ್ಚರಿಕೆದ ಫಲಕೊನು ಗೆಣಿಪಂದೆ ಪ್ರಾಣ ಕಳೆವೊಂದಿನ ಸುದ್ಧಿಳು ದಿನಾಲ ಕೇಣುವ. 

 

ಬದುಕುದ ಸಾಲೆ

ಮಿತ್ತುದ ಪಾತೆರೊ ಇತ್ತೆದ ಕಾಲೊಗುಲಾ ಸರಿ ಒಂಬುನು. ನಮ್ಮ ಬದುಕುದ ಮಾತ ಕಳೊಟು  ನಮ್ಮ  ಎಂಚ ಉಪ್ಪೊಡ್, ಉಪ್ಪೆರ ಬಲ್ಲಿ ಇಂದುದು ತೆರಿಯೊಂದು ನಡಪೊಡು. ದುಂಬುದಕೆಳೆನ ನಡೆ-ನುಡಿವಳಿ ನಮಕು ಬಳುವಳಿಯಾದ್ ಬಯಿದಿನು, ಅಂಚಾದು ತಾರತಮ್ಮ್ಯೊಡು ನಡಪೆರ ತೆರಿದಿನು.  ತಪ್ಪು ಮಲ್ತಡ, ಬದುಕುದ ಸಾಲೆಡು ನಮ ಕಲ್ಪುವ.  ಅಪಗ ಆಯಿಕ್ ತಕ್ಕದ  ಕುಡೊಂಜಿ ಪೊಸ ನಾಡ ನುಡಿ ಪುಟ್ಟು. 

ಪುಣ್ಯ ಸ್ಮರಣೆ

ಒಂಜಿ ದುಕ್ಕದ ನೆನೆಪು. ಎಂಕಲೆ ಕಂಪೆನಿದ ಕಾಸ್ಟ್ ಅಂಡ್ ಬಜೆಟ್ದ, ಒರಿ ಎಲ್ಯ ಪ್ರಾಯದ CAನ,  ಲೊನಾವಲೊಡು ಒಂಜಿ ಬಂಡೆಕಲ್ಲುದ ಮಿತ್ತುಡ್ ಉಂತುದು ಫೋಟೋ ದೆಪ್ಪನಗ  ಕಳುವ ಬೊಲ್ಲೊಡು  ತಿಕ್ಕುದು, ಕುಡೊಂಜಿ ಕಲ್ಲುದ ಮಿತ್ತ್ ಅಸ್ರ ತಿಕ್ಕನಗ, ಸಹಾಯೊಗು ಬಳ್ಳು ದಕ್ಕನಗ ಬೆರಿಟೆ ಬತ್ತಿನ ಬಾರಿ ಒಯ್ಲುದ ಬೊಲ್ಲೊಗು ಕುಡ ತಿಕ್ಕುದು, ಕಯ ಕಣಿಕು ಬೂರ್ದು ಪ್ರಾಣ ಪೊಂಡು - ತೂಪಿತೂಪಿನಂಚನೆ.  ಇರ್ವ-ಇರ್ವತ್ರಡ್ ವರ್ಸ ದುಂಬುದ ಆಗೋಸ್ತುಡು ಅತಿನ ವಿಷಯ. ಆಯೆನ -  ಎನ್ನ ಸಲುಗೆದ ಎಲ್ಯ ಮಿತ್ರನ - ಆತ್ಮೊಗು ಶಾಂತಿ ಉಪ್ಪಡು.

ಹೊಸಬೆಟ್ಟು ವಿಶ್ವನಾಥ, ಪುಣೆ