“ಗುಟ್ಟು ತೆರಿಂಡ ಪಿಲಿತ
ಬೆರೆಯೆಲಾ ಪೋವಲಿಗೆ.” ಉಂದೊಂಜಿ ತುಳುತ ನುಡಿ.
ಈ ಪಾತೆರೊ ನಮ್ಮ ಹಿರಿಯಕೆಳೆನ ಬಾಯಿಡ್ಡು
ಬಾಯಿಗ್ ಪರತ್ತೊಂದು ಬೈದಿನವು. ಮೂಲು, ಗುಟ್ಟುಗು ಒತ್ತು
ಕೊರ್ತೆರು. ಅಂಚಾಂಡ. ಈ ಗುಟ್ಟು ಪಣ್ದುಂಡ ಎಂಚಿನ? ‘ತೆರಿಂಡ್’ ಪಣುಂಡ ‘ಗುಟ್ಟು
ರಟ್ಟಾಪಿನಿ’. ‘ಪಿಲಿತ ಬೆರಿ
ಪೋಪಿನಿ’ ಪಂಡ ‘ಧೈರ್ಯೊಡ್ - ಆಪಿನಂಚಿನ
ಅಪಾಯ ಗೊತ್ತು ಇತ್ತುದಲಾ - ಪಿಲಿತ ಪಿರ ಪಿರನೇ ಪೋಪಿನಿ’. ಮೂಲು, ಧೈರ್ಯೊಗು ಬೋಡಾಯಿನವು
ರಡ್ಡ್ ವಿಷಯೊಳು: ಒಂಜಿ ಮೆಯಿತ ಬಲ, ಬೋಕ್ಕೊಂಜಿ
ಬುದ್ಧಿದ ಬಲ. ನಮ್ಮ ಮೆಯಿತ ಬಲ ಪಿಲಿತ ಬಲತೆದುರು ನಡಪಂದು.
ಬುದ್ಧಿ ಬಲೊಕು, ನಮ ಪಿಲಿತ ನಡೆವಳಿಕೆದ
ತಿಳುವಳಿಕೆನು ಸುರುಟೇ ತೆರಿಯೊನೊಡು.
ಗುಟ್ಟು ಎಂಚಿನ?
ಗುಟ್ಟು ಪನ್ನುಣ್ಡ ‘ದೆಂಗುದು ಇತ್ತಿನ ಒಂಜಿ ವಿಷಯ’ (secret), ‘ಕಂಡುದು ಮಳ್ತಿನ ವಿಷಯ’ (It is a
thing what is done stealthily or in secrecy). ಪನ್ನುಣ್ಡ, ಅವೊಂಜಿ ‘ರಹಸ್ಯಮಯ
ಸಂಗತಿ’. ತೆರಿನು, ತೆರಿಯಂದು. ತೆರಿನು ಇಂದುದು ನೆನೆಪನಗ, ತೆರಿಯಂದೆ
ಪೋಪುನು.
ಗುಟ್ಟು ಏರೆನ? ಆಕೆಳೆನ ಗುಟ್ಟು ಬೊಕ್ಕ
ಎಂಕೆಳೆನ ಗುಟ್ಟು: ಅಂಚ, ವ್ಯಕ್ತಿಗತವಾದು
ರಡ್ಡು.
ಮೂಜಿನೆ ಗುಟ್ಟು ಆಧ್ಯಾತ್ಮಿಕ. ಸಾಮಾನ್ಯ ಗುಟ್ಟು – ತೆರಿಂಡಲಾ, ತೆರಿಯಂದಿನಂಚ. ಒಡೆಪೆರ ಕಷ್ಟ.
ಅರ್ಹತೆ ಇತ್ತಿನಕೆಳೆಗು ಆಕೆಳೆನ ಸಾಮರ್ಥ್ಯದ ಮಿತ್ತುಡ್ ಈ ರಹಸ್ಯದ ಜ್ಣಾನೋದಯವಾಪುನು – ಪೂರ್ಣವಾದು ವಾ ಭಾಗಶಃ
ಬುಡಡೆ ಗುಟ್ಟುನು ಪಿದಯಿ
ಗುಟ್ಟುನು ಐನ್ ಜನಕು ಪಣೆರ ಬಲ್ಲಿ ಇಂದುದು ಪಣ್ಪೆರ್. ಏರೇರ್ ಪನ್ನುಣ್ಡ: ಪೊಂಜೋವೆಳೆಗು,
ಜೋಕುಳೆಗು, ದುರಾಸೆ-ಕುರಾಸೆ ಇತ್ತಿನಕೆಳೆಗು,
ನೀಚರೆಗು, ಬೊಕ್ಕ ಮರ್ಲೆರೆಗು ಪಣೆರ ಬಲ್ಲಿ. ಶ್ರೀ ಜಗನ್ನಾಥದಾಸೆರುಲಾ ಆರೆನ ‘ಹರಿಕಥಾಮೃತ
ಸಾರೊಡು’ ಇಂಚೆನೆ ಪಣ್ತೆರ್: “ ಹರಿಕಥಾಮೃತ ಸಾರವಿದು ಸಂ| ತರು ಸದಾ ಚಿತ್ತೈಸುವುದಿದ ನಿ| ಷ್ಟುರಿಗಳಿಗೆ ಪಿಶುನಿಗಯೋಗ್ಯರಿಗಿದನು
ಪೇಳದಲಿ|| ನಿರುತ ಸದ್ಭಕ್ತಿಯಲಿ ಭಗವ| ಚ್ಚರಿತಗಳ ಕೊಂಡಾಡಿ ಹಿಗ್ಗುವ| ಪರಮ ಭಗವದ್ದಾಸರಿಗೆ
ತಿಳಿಸುವುದು ಈ ರಹಸ್ಯ|| “
ಆಧ್ಯಾತ್ಮಿಕ ಗುಟ್ಟುನು ಪಣೆರ ಅರ್ಹತೆ ಉಪ್ಪೊಡ್. ಕೇಣೆರ ಯೋಗ್ಯತೆ ಉಪ್ಪುನಕೆಳೆಗು ಇಂಚಿನ ‘ಗುಹ್ಯಾತ್
ಗುಹ್ಯ’ ವಿಷಯೊನು ಪಣೋಲಿ. ಶಿವನ
ರುಂಡ ಮಾಲೆನು ತೂದು, ಆ ಮಾತ ರುಂಡೊಳು
ಏರೆನ ಇಂದುದು ಪಾರ್ವತಿ ದೇವಿ ಕೇಣುನಗ, ‘ಬೇತೆ
ಬೇತೆ ಜನ್ಮೋಡು ಯಾನೆ ಪತಿಯಾವೊಡು ಇಂದುದು ಪುಟ್ಟಿನ ನಿನ್ನ’ ಇಂದುದು
ಶಿವ ದೇವೆರು ಪಣ್ಪೆರ್. “ಎಂಕೇ ದಾಯೆಗು ಮರಣ ಈರೆಗು
ದಾಯೆಗಿಜ್ಜಿ?” ಆರೆನ ಒತ್ತಾಯೊಡು,
ಅಮೃತತ್ವದ ಆತ್ಮ ವಿದ್ಯೆನು ಪಾರ್ವತಿ ದೇವಿಗು (ಕಣ್ಣು ಮುಚ್ಚಿದ್) ಪಣ್ಪೆ ಇಂದುದು ಶಿವ ದೇವೆರು ಓಪ್ಪುವೆರು - ಬೊಕ್ಕ ಆರ್ ರಾತ್ರೆಡು ಒರ್ತಿಯೇ ಉಪ್ಪೋಡ್, ನಿದ್ರೆ
ಮಲ್ಪಂದೆ ಹೂಂಗುಟ್ಟೊಡು ಪಣ್ಪಿ ಶರ್ತೊಡ್. ಅಲ್ಪ ಗಿಳಿತ ತೆತ್ತಿ ಒಂಜಿ ಇತ್ತುನು, ಅವು ಪುಡಾದು
ಕಿನ್ನಿ ಪಿದಯಿ ಬರ್ಪುನು. ಪಾರ್ವತಿ ನಿದ್ರೆ ಮಲ್ಪನಗ ಅವು ಹೂಂಗುಟ್ಟುನು. ಕತೆ ಮುಗ್ಗಿದ್ ಶಿವ
ದೇವೆರು ಕಣ್ಣು ಬುಡ್ನಗ ನಿದ್ರೆಡಿತ್ತಿ ಪಾರ್ವತಿನುಲಾ
ಬೊಕ್ಕ ಗಿಳಿತ ಕಿನ್ನಿನ್ಲಾ ತೂಯರ್.
ತೂದು, ಕಂಡುದು ಕೇಣಿನ ಶುಕದ ಬೆರಿ ಪತ್ತುವೆರು, ಕೆರ್ದು
ಪಾಡುವೆ ಪಣ್ಪಿ ಕೋಪೊಡು. ಅವು ತಪ್ಪವೊಂದು ವ್ಯಾಸ ಮುನಿನ ಆಶ್ರಮೊಗು ಪೊಗ್ಗುದು
ಅರೆನ ಬುಡೆದಿನ ಬಂಜಿಡು ದೆಂಗುದು ಕುಳ್ಳುನು ಕೆಲವು ಸಾರವರ್ಸ. ತೆತ್ತಿದ ಉಲಯಿಡೇ ಇತ್ತುದ್ ಆತ್ಮವಿದ್ಯೆದ ರಹಸ್ಯೋನು ಕೇಣಿನ ಶುಕನು ಕೆರೆರ
ಏರೆಗುಲಾ ಆವಂದು ಇಂದು ವ್ಯಾಸೆರು ಪಂಡಿ ಬೊಕ್ಕ
ಕೋಪ ತಗ್ಗುದು ಪಿರ ಪೋಪೆರು. ಇಂಚ, ವ್ಯಾಸೆರೆನ ದೀರ್ಘ ತಪಸ್ಸುದ
ಕಾರಣೋದ್ದು, ಜನ್ಮತ ಜ್ಣಾನಿಯಾದಿತ್ತಿನ ಶುಕ ಮುನಿ ಮಗೆಯಾದ್ ಪುಟ್ಟಿನ ಕತೆ ಉಂದು. ಪುರಾಣ ಕತೆಳೆಗು ಒಂಜಿ ರೂಢಿಡಿತ್ತಿ ನೀತಿ ತತ್ವದ ಬೊಕ್ಕ ನಂಬಿಕೆದ ಅರ್ಥ ಉಂಡು. ಉಂದೆನು ನಂಬುನಕುಳು
ನಂಬುವೆರು. ನಂಬಂದಿನಕುಳು (Mythoclasts) “ಗೂಡ್ಡು ಪುರಾಣ” ಇಂದುದು
ಪಣುವೆರು.
ಗುಟ್ಟುದ ಪ್ರಮಾಣ: ಪರಿಣಾಮ
ಗುಟ್ಟು ಅಪಗಪಗನೆ ತೊಜೂಜಿ, ಆಂಡ, ಪರಿಣಾಮ
ದರ್ಶಕವಾದುಂಡು. ಆ ಗುಟ್ಟುನು ನಾಡ್ಡು
ಪತ್ತೋಡಾವು. ಎನ್ನ ಗುರುತದಕುಳು ತಿಕ್ಕನಗ, ಸಾದಾರಣವಾದು ಎಂಕು ಕೇಣುನ
ಪ್ರಶ್ನೆ: What is the secret of your keeping trim (ನಿನ್ನ ತೋರ ಆವಂದೆ
ಉಪ್ಪುನ ಗುಟ್ಟು ಎಂಚಿನ)? ಇಂಚಿನ ಪ್ರಶ್ನೆ
ಪರಿಣಾಮ-ಸೂಚಕ. ತಿರ್ತ್ದು ಕೊರ್ತಿನ ಗುಟ್ಟುದ ಪರಿಣಾಮನೊಡ್ಡು ಆಯಿತ ಪಿರವುದ ಗುಟ್ಟುದ ವಿಷಯದ ಒಂತೆ ಪರಿಚಯ ನಮಕು ತೆರಿಯೊನೇಲಿ.
ಗೆಂದುನು, ಯಶಸ್ಸು, ಗೆಲವು: ಗುಟ್ಟು = ಪರಿಶ್ರಮ, ಧೈರ್ಯ,
ನಿಂದೆನು ಅಪಮಾನೊನು ಗೆಣಿಪಂದೆ ನಡೆಪುಣು.
ಒಂಜಿ ರಾಜ-ತಾಳೆರೆನ ಬೊಕ್ಕ ವಿಕ್ರಮ-ಬೇತಾಳೆರೆನ ಕತೆಕಳೆನು ನೆನೆಪುಳೆ. ಇಜ್ಜಾಣ್ಡ ಕಪ್ಪೆಳೆನ ಗುಡ್ಡೆ ಏರುಣ ಕತೆ
ಕೇಣುಲೆ: ಒಂಜಿ ಸರ್ತಿ ಕಪ್ಪೆಲೆನ ಒಂಜಿ ಎತ್ತರದ
ಗುಡ್ಡೆ ಏರುಣ ಪಂದ್ಯಾಟ ನಡೆತುನು. ತೂವೆರ
ಬತ್ತಿನ ಬೇತೆ ಪ್ರಾಣಿಲು ಆಕೆಳೆಗು ತಮಾಷೆ ಮಲ್ಪೆರ, ತೆಲಿಪೆರೆ
ಶುರು ಮಳ್ತೆರ್. “ಈ ಎತ್ತರದ ಮಲೆ ನಿಕೆಲೆಗು
ಏರೆರ ಸಾಧ್ಯನೇ ಇಜ್ಜಿ. ಬೂರುವರು, ಪಿರ ಪೋಲೆ“.
ಎಲ್ಯ-ಮಲ್ಲ ಕಪ್ಪೆಳು ಮಾತಾ ಪಿರ ಜಾರಿಯೆರು.
ಒಂಜಿ ಕಪ್ಪೆ ಮಾತ್ರ ಆಕೆಲ ಪಾತೆರೊನು, ನಂಜಿ ತೆಲಿಕೆಳೆನು ಗೆಣಿಪಂದೆ
ಏರೊಂದೆ ಪೋದು ಸ್ಪರ್ಧೆ ಗೆಂದುನು. ಬೊಕ್ಕೊಂಜಿ
ಕಿಣ್ಣ್ಯ ಕಪ್ಪೆ ಗೆಂದಿನ ಕಪ್ಪೆಡ ಪಾತೆರ್ಣಗ, ಅವು ಉತ್ತರನೇ
ಕೋರ್ಜಿ. ಅಪಗ ಗೊತ್ತಾಂಡು, ಗೆಂದಿ ಕಪ್ಪೆಗು
ಕೆಬಿಯೇ ಕೇಣುಜಿಂದುದು. ನೆತ್ತ ಅರ್ಥ: ಏರ್ಲಾ ನಮ್ಮ ಕೆಲಸೊಗು ಹುರುಪು ಕೊರ್ಜೆರ್ಡ, ನಮ
ಕೆಬಿ ಕೇಣಂದಿನಂಚ ಮಲ್ಪೊಡು.
ಆರೋಗ್ಯ: ಗುಟ್ಟು = ಸ್ವಚ್ಛತೆ,
ಸಾತ್ವಿಕ ಉಣ್ಪು-ತಿಣ್ಪು – ಎಚ್ಚಲಾ ಅತ್ತ್,
ಕಡಿಮೆಲಾ ಅತ್ತ್ - ಆಂಡ ಸಮಯಸಮಯೊಗು, ವ್ಯಾಯಾಮ ಮಲ್ಪುನು, ಆಲಸ್ಯತನ
ಬುಡ್ಪಿಣಿ, ನಿದ್ರೆ ಏತ್ ಬೋಡೋ
ಆತೇ.
ವಯಸ್ಸು: ಗುಟ್ಟು = ದೀರ್ಘಾಯುಸ್ಸುಗುಲಾ ಆರೋಗ್ಯದ ಮಿತ್ತುಡ್ ಬರೆತಿನ ಸಂಗತಿಲು ಒಮ್ಮುನು.
ನಮ್ಮ ದಿನಚರಿಟ್ ದಿಂಜ ಏರುಪೇರುಪ್ಪೆರೆ ಬಲ್ಲಿ, ಉಣ್ಪು-ತಿಣ್ಪಿ ಸಮಯ ತಪ್ಪಾವೆರೆ ಬಲ್ಲಿ.
ಉತ್ತಮ ವ್ಯಾಪಾರ : ಗುಟ್ಟು = ಗುಣಮಟ್ಟದ
ಉತ್ಪಾದನೆ. ಆಯಿಕಾತ್ರ ಕಳಪೆ ದಾಂತಿ ಕಚ್ಚಾ
ಮಾಲುದ ಬಳಕೆ ಮಳ್ಪೊಡು. ಉಳಾಯಿಡ್ ಹಾಳು ಮಾಲು
ಪಾಡ್ಡು, ಪಿದಾಯಿಡ್ ಗಿಲೀಟುದ ವಸ್ತುಳೆನು ಪಾಡಿಂಡ, ಮಳ್ತಿನ
ವಸ್ತು ಮಾರ್ದು ಪೊಂಡಲಾ, ಬಾಳ್ತರ ಕಡಿಮೆಯಾದ್
ಕಂಪೆನಿದ ಪುದಾರು ಹಾಳಾಪುಣು, ಕ್ರಮೇಣ ಗಿರಾಕಿಲು ಕಡಿಮೆ
ಆದ್, ಸಂಪಾದನೆಡು ಕುಂದು
ಬರುವು.
ಶಕ್ತಿ: ದೈಹಿಕ, ಮಾನಸಿಕ
ಶಕ್ತಿಳು ನಮಕು ಸಹಜವಾದೆ ಉಂಡು. ಆವೆನು ಒರಿಪುಣ
ಗುಟ್ಟು ನಮ್ಮ ಕೈಟೇ ಉಂಡು. ನಮ್ಮ ಆಹಾರ,
ಆಚಾರ-ವಿಚಾರ ಮಾತ ಸಮತೋಲನೆಡು ಉಪ್ಪೊಡು.
ಶಕ್ತಿನು ಊರ್ಜಿತ ಮಲ್ಪುನ ಯೋಗ, ಮುದ್ರೆಳು,
ತಪ್ಪು-ಒಪ್ಪುನು ವಿಚಾರ ಮಲ್ಪುನ ಮತಿ, ನಮ್ಮ ಬಾಳುಗೊಂಜಿ ನೀತಿ –
ಇಂಚ ಕೆಲವು ವಿಷಯೊಳು ಬೋಡು. ಕೆಲವು ಶಕ್ತಿಳು –
ಜನ್ಮ ಕುಂಡಲಿಡ್ ಸಂಭಾವನೆ ಮಲ್ಪುನಂಚ, ಅವಾತ್ತಂದೆ ದೇಹ ರಚನೆಡ್ ಗೊತ್ತಾಪಿನಂಚ – ಸಹಜವಾದೆ
ಉಪ್ಪುನು. ಪೂವೊಳುದ ಆಕಾರೊಡುಲಾ ನಮ್ಮ ಶಕ್ತಿ
ಸೂಚಕಾಂಕೊಲು ಉಳ್ಳಾ ಇಂದುದು ಇತ್ತೆದ ಪೂವೊಲುದ
ಆಕಾರದ ಮಿತ್ತುದ ದೇಹ ಶಾಸ್ತ್ರ ವಿದ್ಯೆ (Omphalomancy)
ಪಣ್ಪುನು.
ಆಧ್ಯಾತ್ಮಿಕ ರಹಸ್ಯ
ಈ ಮೂಜನೆ ಗುಟ್ಟು, ಪ್ರಕೃತಿ ರಹಸ್ಯನಾ,
ದೇವೆರೆನು ತೆರಿಯುನ ಗುಟ್ಟಾ? ಇಂಚೊಗು
(20.03.2018), ಎನ್ನ ಸಹೋದ್ಯೋಗಿ, ಸಹವಾಸಿ ಬೊಕ್ಕ
ಗುರು-ಬಂಧುವಾದಿತ್ತಿನ ದಯಾನಂದ ರಾವು ಕಾವೂರೆರು ಒಂಜಿ ಪ್ರಶ್ನೆ ಕೇಣಿಯೆರು. ಇದಮುಟ್ಟ ಉತ್ತರ ಕೊರ್ತಿಜಿ. ಈ ಬರಹೊಡು ಆರೆನ ಪ್ರಶ್ನೆಗು ಉತ್ತರ ಕೊರೆರ ಪ್ರಯತ್ನ
ಮಳ್ತೊಂದುಳ್ಳೆ.
ಆರೆನ ಪ್ರಶ್ನೆ: ಸಾದರಣವಾಗಿ ಸನಾತನ/ಹಿಂದೂ ಧರ್ಮದಲ್ಲಿರುವ ದೇವರ ರೂಪಗಳ ಪರಿಚಯ ನಮಗೆಲ್ಲರಿಗೂ ಇದೆ. ಹಿಂದೂ ದೇವಸ್ಥಾನಗಳ ಮತ್ತು ಪುಸ್ತಕಗಳಿಂದ ಗಳಿಸಿದ ಜ್ಣಾನದಿಂದ, ಯಾವ ದೇವರ ರೂಪವನ್ನು ‘ಆದಿಮೂಲ’ (Super-most Power) ಎಂದು ಎಣಿಸಬಹುದು? ಉತ್ತರಿಸಲು ಪ್ರಯತ್ನಿಸಿರಿ; ಯಾಕೆಂದರೆ ಮುಂದೆ ನಿಮ್ಮ ಮೊಮ್ಮಕ್ಕಳ ಪ್ರಶ್ನೆಗಳಿಗೆ ಉತ್ತರ ಹೇಳಬೇಕಾಗಬಹುದು.”
ಉತ್ತರ ಕೊರ್ಜಿಡ ತರೆ ಪೊಡಿಪೊಡಿಯಾವು ಇಂದುದು ವಿಕ್ರಮಗು ಬೇತಾಳ ಪಣ್ತಿನ ಪಾತೆರೊದಂಚ
ಪ್ರಶ್ನೆ ಚುರುಕಾದುಂಡು. ಪಂಪಿನಕೆಳೆಗುಲಾ,
ಕೇಣುನಕೆಳೆಗುಲಾ ಯೋಗ್ಯತೆ ಉಪ್ಪೊಡು. ಸಂಸಾರ
ತಾಪತ್ರಯೊಡು ನುರಿದೆಡಲಾ, ಈ ವಿಷಯೊಡ್ ಎಂಕು ಆಳವಾದು ಅಭ್ಯಾಸವಿಜ್ಜಿ. ಕೇಣುನಕೆಳೆಗು ‘ಅನುಬಂಧ
ಚತುಷ್ಟಯ’ ಪಣ್ಪಿ ಅರ್ಹತೆಲು ಬೋಡು.
ಈ ನಾಲು ಅರ್ಹತೆಲು:
(1) ವಿಷಯ (ಜೀವ ಜಗತ್ತುದ ನಿಜ ಸ್ವರೂಪ),
(2) ಪ್ರಯೋಜನ (ಸಂಸಾರಿಯಾದು ಬದುಕುನ ದೇಹಿ,
ಸ್ವಸ್ವರೂಪ ಜ್ನಾನದ ಅನುಭವೊಡು ಆನಂದ ಪಡೆಪಿನಿ),
(3) ಅಧಿಕಾರೀ (ಸೀಮಿತ ಸಾಧನ ಪಂಡ ಇಂದ್ರಿಯಜನ್ಯ ಜ್ನಾನೋಡುದ್ದು ಪರತತ್ವದ ರಹಸ್ಯೊನು
ತೆರಿದು ಮುಮುಕ್ಷುತ್ವ ಪಡೆವೆರ ಮನಸ್ಸಿತ್ತಿನಾಯಗು ಪನೋಡು. ಆಯೆಗು,
ನಿತ್ಯಾನಿತ್ಯ ವಸ್ತು ವಿವೇಕ, ಇಹಮುತ್ರ = ಇಹಪರ ವಿಷಯ ಭೋಗವಿರಾಗ, ಬೊಕ್ಕ ಶಮ
(Control of mind)-ದಮ (Control of Sensory Organs)-ಉಪರತಿ (to remain
steadfast to achieve ultimate bliss as against mistaking sensory pleasure as
real happiness)-ತಿತಿಕ್ಷಾ (Maintain equanimity towards three types of obstacles - ತಾಪತ್ರಯಸಹನೆ – to gain pure happiness)-ಶ್ರದ್ಧಾ-
(having faith in Guru and scriptures)-ಸಮಾಧಾನ ಪಣ್ಪಿನ ಆಜಿ ಸಾಧನ ಸಂಪತ್ತು ಬೋಡು ಬೊಕ್ಕ
(4) ಸಂಬಂಧ (ಬೋಧ್ಯ-ಬೋಧಕ ಸಂಬಂಧ.
ಅಭಿಪ್ರಾಯಪ್ರಿಯ ಹಠವಾದಿಗು, ಕುಂದುನು ನಾಡುನ ಕೆಟ್ಟ ಸ್ವಭಾವದಯಗು, ಬೊಕ್ಕ ಭಕ್ತಿ ದಾಂತೆ ಅಸಡ್ಡೆ ಮಲ್ತುದು
ಓದುನ-ಕೇಣುನ
ಕೆಳೆಗು ಪಣೆರ ಬಲ್ಲಿಂದು ಪಣ್ಪೆರು. {ಟಿಪ್ಪಣಿ: ಚಿದಾನಂದ ಅವಧೂತರೆನ “ಜ್ನಾನಸಿಂಧು” (ಭಾಮಿನಿ ಷಟ್ಪದಿ)
ಓದುಳೆ}.
ಆದಿಮೂಲ
ದೇವ-ಜೀವ-ಜಗತ್ತುದ ರಹಷ್ಯೊನು ನಮ ಓದುದುಲಾ, ಕೇಣುದುಲಾ
ಉಳ್ಳ. ಜಗತ್ತು ಪರಿವರ್ತನಾ ಶೀಲ. ಆಯಿಟ್, “ಚೇತನಾಚೇತನಾ” ಗುಂಪುಡುಪ್ಪುನ ಸಾಮಾನ್ಯ ಮೂಲ ನಿತ್ಯ ಚೇತನ ವಸ್ತು ಒಂಜೆ ಒಂಜಿ.
ಉಂದೊಂಜಿ ಅನಾದಿ ಸತ್ಯ. ಉಂದೇ “ಆದಿಮೂಲ”. ಸ್ವಯಂ
ಅನುಭವ ಮಾತೆರುಗುಲಾ ಮಲ್ಪೆರ ಆಪುಜಿ. ಆಂಡ, ಸಾಧನೆಡು ಸಾಧ್ಯ – ಸಾಧು
ಸಂತೆರುಲನಂಚ. ರಮಣ ಮಹರ್ಷಿಲೆನ ಜೀವನ ಚರಿತ್ರೆ ಓದುದರಾ?
ಆದಿ+ಮೂಲ. ರಡ್ಡ್ ಶಬ್ದಲಾ ಒಂಜೇ ಅರ್ಥ ಕೊರ್ಪುನು.
ಆಂಡ, ‘ಆದಿ’ ಪನ್ನುಣ್ಡ ‘ಸುರುಟು’ (beginning), ಮೂಲ ಪನ್ನುಣ್ಡ ‘ಬೇರು’ (root). ಬೇರುಗು ಸಂವರ್ಧಕ ಶಕ್ತಿ ಉಂಡು. ಈ ಶಕ್ತಿ ತ್ರಿಮೂರ್ತಿಳೆಡು ವಿಷ್ಣುಗುಂಡು. ಸಾದರಣವಾದು, ‘ಆದಿಮೂಲ’ ಇಂದುದು
ವಿಷ್ಣುಗು ಪಣ್ಪೆರ್ (ಇತ್ತೆ ಭಜನೆಡು, ದೇವೆರೆನ ಬೇತೆ ಬೇತೆ
ರೂಪೋಗುಲಾ ಪಣ್ಪೆರ್). “ಕರಿ ಮಕರಿಗೆ ಸಿಕ್ಕಿ
ಮೊರೆಯಿಡುತಿರುವಾಗ| ಆದಿಮೂಲನೆಂಬ ನಾಮವೇಕಾಯ್ತೋ” ಪುರಂದರ ದಾಸೆರೆನ ಭಜನೆಡು, ‘ಗಜೇಂದ್ರ ಮೋಕ್ಷದ’ ಕತೆನು
ನೆನೆಪುಳೆ (ಭಜನೆ: “ನೀನ್ಯಾಕೋ ನಿನ್ನ ಹಂಗ್ಯಾಕೋ ನಿನ್ನ ನಾಮದ ಬಲವೊಂದಿದ್ದರೆ ಸಾಕೋ”).
ವಿಷ್ಣು ಸಹಸ್ರ ನಾಮೊಡು, ವಿಷ್ಣು ವಿಶ್ವಂ (= ಸರ್ವ ಪ್ರಭು), ವಿಷ್ಣು
(= ಸರ್ವತ್ರ ವ್ಯಾಪಿ), ನೈಕ್ಯ ರೂಪ (= ಕಾಲ ಕಾಲೋಗು ಬೇತೆ ಬೇತೆ ರೂಪೋಡು ತೋಜಿದು ಬರ್ಪಿನಾಯಿ), ಭಾವಮ್
(= ಕಾರ್ಯ ಕಾರಣಸ್ಥ), ಮುಕ್ತಾನಂ ಪರಮಗತಿ (= ಮೋಕ್ಷಗ್ರಸ್ಥರೇಗುಲಾ ಆಶ್ರಯ ಕೊರ್ಪಿನಾಯೆ), ಶರ್ವಮ್
(= ಜಗತ್ ಭಕ್ಷಕ), ವ್ಯಾಳಮ್ (= ಆಧಾರಭೂತಲಾ,
ಲಯಕಾರಿಲಾ ಆಯೇ; ಪನ್ನುಣ್ಡ ವಿಶೇಷ ರೀತಿಡು ನಮನು ಸ್ವೀಕಾರ ಮಲ್ಪುನಾಯೆ), ಕುಂಡಲಿಂ
(= ನಮ್ಮ ತಪ್ಪು-ಒಪ್ಪುನು ಲೆಕ್ಕ ಮಲ್ಪಂದೆ ದೆರ್ತು
ಪತ್ತುನಾಯೆ), ತ್ವಷ್ಟಾಮ್ (= ಸರ್ವ ಹೃದಯ ಸೂರ್ಯ),
ಬಭ್ರುಮ್ (ಸಹಿಷ್ಣುತಾ ಮೂರ್ತಿ) ಬೊಕ್ಕ ಪ್ರಾಣದಂ (= ಸದಾಚಾರಿನಕೆಳೆಗು ಸಾರಭೂತ ಶಕ್ತಿ
ಕೋರ್ಪಿನಾಯೆ).
ಒವು ಅವ್ವೆ ಆದುಂಡ ಆಯಿಕ್ ‘ತತ್ವ’ ಇಂದುದು
ಪಣ್ಪೆರ್. ಜಗತ್ ವಿಕಸನ ತತ್ವೊಡು, ಮೂಲ
ತತ್ವೊಳು 24. ಆಯಿಕ್ ಅವ್ಯಕ್ತ ರೂಪೋಡಿತ್ತಿನ
ಪರಮಾತ್ಮೆ, ಪಣ್ಡ ‘ಆದಿ ಶಕ್ತಿ’ (Primordial Being or Primordial Energy)ನು ಸೇರಿಸಾವೊಡು. ಆ
ಮಹಾಶಕ್ತಿಗು ಲಿಂಗಭೇದವಿಜ್ಜಿ, ಪನ್ನುಣ್ಡ, ಪೊನ್ನಣ ವ ಆಣನ ರೂಪ ಧಾರಣೆ ಮಲ್ಪುನ ಶಕ್ತಿ ಪರಮಾತ್ಮಗುಂಡು. ಈ ಪರಮಾತ್ಮ
ಶಕ್ತಿನು ಸೇರಿಸಾಂಡ 25 ತತ್ವೊಳು. ಅವೆನು ಪಂಚಕ
ಪಣ್ಡ ಐನ್ ಐನೆತ್ತ ಕಟ್ಟು ಮಲ್ತುಂದೆರು. ಆ 5
ಕಟ್ಟುಳು: ಮಹಾಭೂತ ಪಂಚಕ (ಆಕಾಶ, ವಾಯು, ಅಗ್ನಿ, ಜಲ, ಬೊಕ್ಕ
ಪ್ರಥ್ವಿ), ಮರುತ ಪಂಚಕ (ಪ್ರಾಣ, ಅಪಾನ, ವ್ಯಾನ, ಉದಾನ
ಬೊಕ್ಕ ಸಾಮಾನ), ವಿಷಯ ಅಥವಾ ತನ್ಮಾತ್ರಕ
ಪಂಚಕ (ಶಬ್ದ, ಸ್ಪರ್ಶ, ರೂಪ, ರಸ
ಬೊಕ್ಕ ಗಂಧ), ಜ್ನಾನ/ಪಂಚೇಂದ್ರಿಯ ಪಂಚಕ (ಕಣ್ಣು, ಕೆಬಿ, ಮೂಕು, ನಾಲಾಯಿ, ಬೊಕ್ಕ
ಚರ್ಮ), ಕಡೆಕ್ ಕರಣ ಪಂಚಕ (ಮನಸ್ಸು, ಬುದ್ಧಿ, ಚಿತ್ತ, ಅಹಂಕಾರ
ಬೊಕ್ಕ ಆತ್ಮ. ಉಂದೆನು ಇಂಚಲಾ ಪಣ್ಪೆರ್: ಪ್ರಕೃತಿ, ಮಹತ್ತು, ಅಹಂಕಾರ, ಮನಸ್ಸು
ಬೊಕ್ಕ ಜೀವ ಇಂದುದು). ಶಿವ ತತ್ವೊಡು, ಉಂದೆನೇ
36 ತತ್ವೊಳು ಇಂದುದು ವಿಸ್ತಾರ ಮಲ್ತುದು ಪಣ್ತೆರು. (ಟಿಪ್ಪಣಿ: ನಾರಣಪ್ಪನ 'ಭಾರತ ಕಥಾಮಂಜರಿ'-ಡ್ ಅರಣ್ಯ
ಪರ್ವದ ಶಬರ-ವಿಜಯ ಸಂಧಿಡ್ ಅರ್ಜುನನ ಶಿವ ಸ್ತುತಿನು ಓದುಳೆ). ಕನಕದಾಸೆರುಲಾ ಅರೆನ ‘ಹರಿಭಕ್ತಿ
ಸಾರ’ ಪುಸ್ತಕೊಡು ಈ ವಿಷಯೊಡು
ಬರೆತೆರು.
ವ್ಯಾಪ್ಯ-ವ್ಯಾಪಕ ಭಾವೊಡು, ಪರಮಾತ್ಮನ ಅಂಶ ಪಂಚಭೇದೊಡು ಈ
ಜಗತ್ತುದ ಜೀವ-ಜಡ ವಿಷಯೊಡು ದೆಂಗುದುಂಡು. ಮಧ್ವ ಸಿದ್ಧಾಂತದ ಈ ಸತ್ಯೊನು ಕನ್ನಡನಾಡುದ ದಾಸ
ವರೇಣ್ಯೆರು ಪಣ್ತೆರು. ಪುರಂದರ ದಾಸೆರು, ‘ಸತ್ಯ ಜಗತಿದು ಪಂಚಭೇದವು ನಿತ್ಯ ಶ್ರೀ ಗೋವಿಂದನ | ಕೃತ್ಯವರಿತು ತಾರತಮ್ಯದಿ ಕೃಷ್ಣಧಿಕನೆಂದು ಸಾರಿರೈ ||ಪಲ್ಲ|| ಜೀವ ಈಶಗೆ ಭೇದ
ಸರ್ವತ್ರ ಜೀವ ಜೀವಕೆ ಭೇದವು | ಜೀವ ಜಡಕೆ ಜಡ ಜಡಕೆ
ಭೇದ ಜಡ ಪರಮಾತ್ಮಗೆ || 1 ||’ ಭಜನೆಡು
ಸಾರುದೆರು. ಜಗನ್ನಾಥ ದಾಸೆರು ತನ್ನ ‘ಹರಿಕಥಾಮೃತ
ಸಾರೊಡು’ ವಿಸ್ತಾರವಾದು ಪಣ್ತೆರು.
ಆತ್ಮ ವಿಚಾರ
‘ಆತ್ಮಾನಂ
ವಿದ್ದಿ’ ಪಣ್ಡ ‘Know thyself’. ‘ಯಾನ್ ಏರ್’ ಇಂದುದು ‘ಯಾನ್
ಅವತ್ತು ಅವತ್ತು’ ಇಂದುದು ವಿಚಾರ ಮಳ್ತುದು ಆತ್ಮಸ್ಥಿತವಾಪಿನವೇ ಒಂಜಿ ನೇಲ್ಯ ತಪಸ್ಸು.
ಪಿಲಿತ ಪಿರವು ಪೋಪಿನಂಚ ಧೈರ್ಯ ಬೋಡು. ಯೋಗಿನಕೆಳೆನ
ಹೃದಯೊಡು ದೇವೆರು ಪರಿಪೂರ್ಣವಾದುಲ್ಲೆರಿಂದು ಪಣ್ಪೆರು. (ಕನಕ ದಾಸೆರೆನ ಹರಿಭಕ್ತಿ ಸಾರ: “ಅನುಪಮಿತ ಚಾರಿತ್ರ್ಯ ಕರುಣಾ| ವನಧಿ
ಭಕ್ತ ಕುಟುಂಬಿ ಯೋಗೀ| ಜನ ಹೃದಯ ಪರಿಪೂರ್ಣ ನಿತ್ಯಾನಂದ ನಿಗಮನುತ || ವನಜನಾಭ ....
ಸುರಾರ್ಚಿತದೇವ ರಕ್ಷಿಸು ನಮ್ಮನನವರತ || “ ನಮ್ಮ ಮಾತೆರ್ಲನ
ದೇವಸ್ಥಾನ ನಮ್ಮ ನಮ್ಮ ಹೃದಯ. ಜಗತ್ತುದ
ಜನೋಕುಲೆಗು ಈ ಸ್ವಸ್ವರೂಪದ ಆತ್ಮ ಬೋಧೆ ಅವಡಿಂದು ಒಂತೆ
ತೆರಿದಿನೆನ್ನಾಸೆ.
ಹೊಸಬೆಟ್ಟು ವಿಶ್ವನಾಥ, ಪುಣೆ
