ತುಳುವೆರೆಗು ಬೆರಿತ ಅರ್ಥ ಬುಡ್ಪಾವುದು ಪಣೋಡುಂದಿಜ್ಜಿ. ದುಂಬುದ ಜೋಕುಲೆಗು ಗೊತ್ತುಪ್ಪು. ಸಾಲೆದಮಾಸ್ತರ್, “ಇಲ್ಲಡು ಮಲ್ತೊಂದು
ಬರೆರ ಕೊರ್ತಿನ ಕೆಲಸೊನು ಮಲ್ತಿಜೆರ್ಡಾ. ಎಲ್ಯೆ ಶಾಲೆಗು
ಬನ್ನಗ ಬೆರಿಕ್ಪಾಲೆ ಕಟ್ಟೊಂದು ಬಲ್ಲೆ” ಇಂದುದು ಪೋಡಿಗೆ
ಪುಟ್ಟವೊಂದಿತ್ತೆರ್. ಇತ್ತೆದ ಅಪ್ಪೆ-ಅಮ್ಮೆರುನಕುಳು ಭಾರಿ ಬಿಸಿ (busy). ಜೋಕುಳು ಕಲ್ತಿಜೆರ್ಡಾ,
ನಿಕ್ಕೆಲ ಬೆರಿ ಸರಿ ಪುಡಪುವ ಇಂದುದು ಜೋರು
ಮಲ್ಪುವೆರು. ಈ ಬೆರಿ ಪಣ್ಡುಂಡ
ನಮ್ಮ ದೇಹದ ಪಿರವುದ ಮೆಯಿ. ನಮ್ಮ ಕಣ್ಣುದ
ಎದುರುಗಿಜ್ಜಿ.
ತನ್ನ ಬೆರಿ ತನುಕು
ತೋಜಿಜಿ
‘ತನ್ನ ಬೆರಿ
ತನುಕು ತೋಜುಜಿ’ – ಉಂದೊಂಜಿ ಎಡ್ಡೆ ಪಾತೆರ, ತೆರಿದಿನಕೆಳೆನ ಚುರುಕುದ ಪಾತೆರೊ. ರೂಢಿಡು,
ಯಥಾಗತವಾದು ಪಣ್ಪಿನ
ಒಂಜಿ ಸಾಮಾನ್ಯ ಪಾತೆರೊ.ಉಂದೊಂಜಿ ವಾಸ್ತವಿಕ ಸಂಗತಿ.
ಬೇತೆ ಸಹಾಯ-ಸಾಧನೋಡ್ಡು ತನ್ನ ಬೆರಿ ತೂವರೆ ಆಪುನು.
ಮೆಯಿ ಬುಳೆಯಿ ಬೊಕ್ಕ, ಬೆರಿ ತುಚ್ಚನಗ
ಬೆರಿ ಕಿರುಂಬೆರ, ಇಜ್ಜಾ ಮೀಯನಗ ಬೆರಿ ತಿಕ್ಕೆರ ಬೇತಕೆಳೆನ ಸಹಾಯ ದೆತೊಣುವ. ದಾಯೆಗ್
ಪನ್ನಗ ಮಾತೆರ್ಲಾ ರಬ್ಬರ್ ಮೆಯಿತ ಜನ ಅತ್ತ್. ಬೆರಿತ
ಬರಿ ಬರಿನು ನಮ ಕನ್ನಡಿಡುಲಾ ತೂವೊಲಿ.ಇಂಚ ಅರ್ಥ ಕಟ್ಟೆರ ಆವಂದು.
ನನೊಂಜಿ ಅರ್ಥಲಾ ಕಟ್ಟೊಲಿ. ದುಂಬು-ಪಿರವುದ ಅರಿವಿಜ್ಜಿ. ಪಿರವುಡು ಆದು ಪೋತಿನ
(ಇಲ್ಲುದ, ಊರುದ, ಸಮಾಜದ, ರಾಷ್ಟ್ರದ) ಕತೆ
ಗೊತ್ತಿಜಿ. ಅಪ್ಪೆ-ಅಮ್ಮೆರೆನ ಪುದರುಳೆನು ಬುಡ್ಡು, ಆಕೆಳೆಡ್ಡು ದುಂಬುಡು
ಪುಟ್ಟುದು ಲಕುದ್ ಪೋತಿನಕೆಲ್ನ ಪುದರುಳೆನು ಪುರೋಹಿತೆರು (ಪೂಜೆದ ಸಮಯೊಡು) ಕೇಣ್ನಗ ನಮಕು ಪಣೆರ ಬರ್ಪುಜಿ. ನಮ್ಮ ಪಿರುವುಡ್ ನಡಪುನ
ಗೊಬ್ಬುಡು ನನ ದುಂಬುಗು ಎಂಚಿನ ಆವು ಪಣ್ಪಿನ
ಅಜ್ನಾನ. ಇಂಚ ಪಣ್ನುಂಡ ನಮ ಕುರುಡೆರಾಪನ?
ಇಂಚ ಅತ್ತ್ ಆಂಡ, ನಮ್ಮ ತಿಳುವಳಿಕೆದ ಯಾ
ಅನುಭವದ ಕಮ್ಮಿಯಾ? ಈ ಪಾತೆರೊದ ನಿಜತ ತಿರ್ಲೆಂಚಿನ? ಒಂತೆ ತರೆ
ಕಿರುಂಬುಗನೆ!
ಪಿರ ತೂಪಿನಿ
ತೂಪಿನಿ ಕಣ್ಣುಡ್ಡು. ಕಣ್ಣುಳು ರಡ್ಡ್ ತರ –
ಪಿದಯಿದ (ಬಾಹ್ಯ) ಚಕ್ಷು ಬೊಕ್ಕ ಉಳಯಿದ
(ಪ್ರಜ್ನಾ) ಚಕ್ಷು. ಸುರುತ ತೊಜುನು, ಬೊಕ್ಕದ ತೊಜುಜಿ.
ವಸ್ತು ವಿಷಯ
ಮಾತ ವಸ್ತು ವಿಷಯೊಗು ರಡ್ಡ್ ಮೋಣೆಳುಳ್ಳ – ಎದುರು ಬೊಕ್ಕ ಪಿರ. ಒಂಜಿ ಚಿತ್ರೋನು ತೂವನಗ ಆಯಿತ ಎದುರುದ ವಿಶೇಷತೆಳೆನು–
ರೂಪ-ಗುಣ-ವರ್ಣ ರಚನೆಳೆನು - ಸರ್ವ
ಸಾಧಾರಣ ಗ್ರಹಣ ಶಕ್ತಿಡ್ಡು ಅರ್ಥ ಮಲ್ತೊಣುವ, ವಿಮರ್ಶೆ ಮಳ್ಪುವ. ಆ ಚಿತ್ರದ ಪಿರವುದ ಕತೆನು ಮಾತೆರುಗುಲಾ ತೆರಿಯೊನೆರ
ಆಪುಜಿ. ತೋಜಂದಿ ವಿಷಯೊನು ನಮ್ಮ ನಮ್ಮ ಬುದ್ಧಿಡ್
ಗ್ರಹಣ ಮಲ್ತುದು,ಆ ಅಮೂರ್ತ ವಿಷಯೊಗು ನಾನಾ ತರತ ಶಬ್ದ ರೂಪದ ವಿವರೆಣೆನು ಯಾ ಚಿಂತನದ ರೂಪೊಳೆನು ಕೊರೊಲಿ. ಪನ್ನುಣ್ಡ, ಉಂದು ಮಾನಸಿಕವಾದು ಪಿರ ತೂಪಿಣಿ.
ವಾಹನದ ಸೇವೆ ದಾಂತಿ ಎತ್ತರದ ಸಾದಿಡ್ ನಡತ್ತೊಂದು ಪೋವನಗ ನಮ
ಸಾಧಾರಣವಾದು ಪಿರ ತೂಪನೆ - ಏತ್ ದೂರ ಬತ್ತ
ಇಂದುದು ತೆರಿಯೆರ. ಕುಡ ಏತ್ ದೂರ ಪೊಪಿನ ತ್ರಾಣ
ಬರು ಪಣ್ಪಿ ವಿಚಾರ ನಮ ಕರಿದು ಬತ್ತಿನ ದೂರದ ಮಿತ್ತ್ ಹೊಂದುದು ಉಂಡು. ಈತ್ ಸಾದಿ ದೈಹಿಕ ಶಕ್ತಿಡ್ಡು ಕಡತುದು ಈತ್ ದೂರಮುಟ್ಟಿ ಬೊಕ್ಕ ಒರಿದಿನ ಒಂತೆ ಸಾದಿ ಮುಟ್ಟಿಯೆರ
ಆವಂದಾ ಪಣ್ಪಿ ಮಾನಸಿಕ ಶಕ್ತಿ ತನ್ನಾತೆ ಉಂಡಾಪುಣು.
ಅಂಚನೆ, ಒಂಜಿ ಮದುಮೆದ ಪಾತೆರೊ ಬನ್ನಗ, ಆಣನ -
ಪೊಣ್ಣನ ಗುಣ - ನಡತೆ, ಕುಟುಂಬದ ದಿಣ್ಣ - ಬಣ್ಣೋನು ತೂದು, ಎನ್ನುದು ಬೊಕ್ಕ
ತೆರಿಯೊಂದು, ಸಂಬಂಧ ಮಳ್ಪೊಲಿಯಾ ಇಜ್ಜಾ ಬಲ್ಲಿಯಾ ಇಂದುದು ನಕ್ಕಿ ಮಲ್ಪುವ. ಆವೆ ರೀತಿ ದುಂಬು ಪೋಪ.
ಉದ್ಯೋಗ ಸಂಸ್ಥೆದಕುಳು,
ಕೆಲಸೋಗು ಬರಿಪಿ ಉಮೇದುವಾರೆನಕೆಳೆನ ವಿದ್ಯೆದ ಬೊಕ್ಕ ಅನುಭವದ ಪ್ರಮಾಣಪತ್ರೊಳು ಇತ್ತುಂಡಲಾ
ಆಕೆಳೆನ ಪೂರ್ವಾಪೂರ್ವ ವಿಚಾರೊನು (antecedents) ದುಂಬುಡು ಅಕುಳು ಕೆಲಸ ಮಳ್ತಿನ ಸಂಸ್ಥೆಳೆದ ಅಥವಾ ಪತ್ತೆದಾರಿ ಸಂಸ್ಥೆಳ ಸಹಾಯ
ದೆತೊನುದು ನಾಡುವೆರು. ಉಂದು, ಇತ್ತಿನ ಮೂಲ ಮಾಹಿತಿನು– ಯೋಗ್ಯತಾಪತ್ರೊನು -ಪಡೆಪಿನ ಸಾದಿ. ಮನಶಾಸ್ತ್ರ ತೆರಿದಿನಕೆಳೆನ ಸಹಾಯ ದೆತೋಂದ್ದು, ಉಮೇದುವಾರನ ಮೋಣೆ, ಪ್ರಶ್ನೆಗು ಧೈರ್ಯವಾದು ಉತ್ತರ ಕೊರ್ದು ಪಾತೆರುನ ಶೈಲಿ,
ಕುಳ್ಳುನ - ಉಂತುನ, ಕುಂಟುದ ಮಡಿ, ಆವೆನು
ತುತ್ತಿದಿನ ರೀತಿ, ಹಸ್ತಾಕ್ಷರ, ಇಂಚ ಮಾತ
ಮರ್ಗಿಲೆನು ತೂದು ಸೂಕ್ಷ್ಮ ಗುಣ ಪರೀಕ್ಷೆಲಾ ಮಲ್ಪುವೆರು.
ನಮ್ಮ ಬೆರಿ
ನಮ್ಮ ಪೂರ ದೇಹದ (ಭೌತಿಕ) ರಚನೆಡು ಬೆರಿತ ಪಾತ್ರ ಮಲ್ಲ. ಈ ಬೆರಿಕೋಲು (ಅಂಕೆ 8 ಳೆನು
ಜೆಪುಡಾವುದು (oo) ಓಂಜೆತ್ತ ಮಿತ್ತು ಒಂಜಿನು ಅಟ್ಟಿಮಲ್ತುದು ದಿತ್ತಿನ ಆಕಾರೊಡು ಉಂಡು. ಬೆರಿಟ್
(ಎಲುತ) ಬೆರಿಮುಳ್ಳು, ಬೆರಿತ ಕೋಲು ಅಥವಾ ಬೆರಿಮೂಳೆ (Spinal column)ನಮ್ಮ ಇಡೀ ಮೆಯಿನು ಸಮತೊಲೊಡು ದಿಪ್ಪಿನ ನೇಲೆ ವಿಶೇಷ ಅಂಗ.
ನಮ್ಮ ದೇಹದ ಆಸನೊಡ್ (ಪೀಕಣುದ ಕಂಡೆಡ್)-ದ್ದು ಕೆಕ್ಕಿಲ್ದ ಮುತ್ತು ಮುಟ್ಟ ಪೋದು, ಆಯಿತ ಉಳಾಯಿದ ಮೂಜಿ ನಾಡಿಳೆಡು (ಇಡಾ, ಸುಷುಮ್ನ, ಪಿಂಗಲ),
ನಡುತ ಸುಷುಮ್ನ ನಾಡಿ ನಮ್ಮ ಬೊಂಡು (Brain)-ದ ನೆತ್ತಿದ ಬಾಯಿ ವಾ ಒಟ್ಟೆಗು (ಬ್ರಹ್ಮರಂಧ್ರಗು) ಪೋದು ಮುಟ್ಟುನು, ಬೆರಿಕೋಲು ಮಿದುಳುಗು ಜೋಡಾವುನ ಸಂವೇದಲಾಶೀಲ
ಅಂಗ. ಪೆಟ್ಟಾನ್ಡ ನಮ ಸರ್ತ ಕುಳ್ಳೆರೆ-ಉಂತೆರೆ ಆವಂದು.
ವೈಜ್ನಾನಿಕವಾದು ನಮ್ಮ ಪೂರಾ ಶಕ್ತಿ ಈ ಬೆರಿಕೋಲುಡ್ ವಸ್ತುನಿಷ್ಠವಾದುಂಡು.
ಪಿರವುದ ಪರದೆ
ನಾಟಕದ ರಂಗಭೂಮಿಡು ಸಾಂಕೇತಿಕ ಪಟೊಳು ಉಳ್ಳ.
ಪ್ರತಿ ಅಂಕದ ಕತೆದ ಅನುಗುಣವಾದು ಪಟದ ರಂಗ ಸಂಯೋಜನೆ ಉಪ್ಪುನು. ಎದುರುದ ಪರದೆ ಮಿತ್ತು ಪೊಯಿನಂಚನೆ ಪಿರವುದ ಪಟ
ತೊಜುನು, ಆ ಅಂಕದ ಕತೆದ
ಪಾತ್ರೊಳು ಕತೆನು ದುಂಬು ಕೊನೊದು ಪೊಪೆರ್. ನನ ದಾನೆ ಅಪುಣು ನನ ದಾನೆ ಅಪುಣು ಇಂದುದು ಎನ್ನುಣ ಮಟ್ಟೊಗು ಕನಪೆರು. ಬೆರಿ ಪಂಪಿನವು ನಮ್ಮ ಪಿರವುದ ಪರದೆ (back-drop) ಇತ್ತಿನಂಚ. ನಮ್ಮ ‘ನಮ್ಮತನ’ ನಮ್ಮವೆ ಪಣ್ಪಿ ತಿಳುವಳಿಕೆನು ತೋಜಾದು
ಕೊರ್ಪುನು.
ಆಧ್ಯಾತ್ಮ ಸಾಧನೆ
ಆಧ್ಯಾತ್ಮ ಸಾಧನೆಡು ಈ ಬೆರಿ ಮುಳ್ಳುದ ಕೆಲಸ
ಕುಡಲಾ ಮಲ್ಲವು. ನಮ್ಮ
ಬೆರಿ, ಪನ್ನಗ ಆತ್ಮದ – ನಮ್ಮ
ಜೀವಾತ್ಮದ - ಪೂರ್ವ ಸ್ಮೃತಿನು ತೆರಿಪಾವುನ ಅಂಗ.
ನಮ್ಮ ಅಜ್ಣಾನೊಡ್ಡು ನಮಕು ತೋಜುಜಿ.
ಬೆರಿತ ಉದ್ದೋಗುಳ ಶಕ್ತಿ ಬಿಂದುಳು – ಕೆಂದ್ರೊಳು – ಉಳ್ಳ. ಈ ಮಾತಾ ಬಿಂದುಳೆನು ಎಚ್ಚರ ಮಲ್ತೊಂದು ಪೋವನಗ ನಮ್ಮ
ನಮ್ಮ ನಿಜ ಸ್ವರೂಪದ ಅನುಭವ ಆಪುಣು. ಕುಂಡಲಿನಿ
ವಿದ್ಯೆ ಇಂದುದು ಯೋಗ ಶಾಸ್ತ್ರೋಡು ಉಂದೆಕು ಪಣ್ಪೆರ್.
ಕುಂಡಲಿನಿ
ಮೂಲ ವಿಶ್ವ ಚೈತನ್ಯದ ಶಕ್ತಿ ಬಿಂದುಳು ಪ್ರತಿ ಜೀವಾತ್ಮನ ಜಾಗ್ರತಾವಸ್ಥೆಡುಂಡು. ಅವು ನಾಗನಂಚ ಮೂಜರೆ ಸುತ್ತುಡು ಸುರುಳಿ ಪಾಡೊಂದುತರೆ
ತಿರ್ತು ಪಾಡ್ಡು ಬೆರಿತ ತಿರ್ತ ಮೂಲೊಡು ಜೆತ್ತೊಂದುಂಡು.
ಈ ಜಾಗೊಗು ಮೂಲಾಧಾರ. ಪಣ್ಪೆರ್. ತೊಜಂದಿ
ಈ ಬಿಂದುಳೆನೆನು ಒಂತೆ ಒಂತೆನೆ
ಮಿತ್ತ್ ಲಕ್ಕಾವೊಂದು ಬರೋಡು.
ಈ ವಿದ್ಯೆಗು ಕುಂಡಲಿನಿ ಯೋಗ ಯಾ ನಾದಯೋಗ ಇಂದುದು ಪಣ್ಪೆರ್. ಈ ಕಾರ್ಯ ಪದ್ಧತಿಡ್, ಜೀವಾತ್ಮ ಪರಮಾತ್ಮೋಡು ಲಯ ಆಪಿನೆಟೆದಾತ್ರ ಲಯಯೋಗ
ಇಂದುದುಳ ಪಣ್ಪೆರ್. ಈ ಶಕ್ತಿ ಬಿಂದುಳೆಗು ಚಕ್ರ ಅಥವಾ ಕಮಲ ಇಂದುದು ಪಣ್ಪೆರ್.
ಚಕ್ರ ಯಾ ಕಮಲ ಶಕ್ತಿಬಿಂದುಳು
ಈ ಶಕ್ತಿಮೂಲ ಬಿಂದುಳು ತಿರ್ತುಡ್ಡು ಮಿತ್ತು ಮುಟ್ಟ ಕ್ರಮೊಟು ಇಂಚ ಉಂಡು:
1. ಮೂಲಾಧಾರ ಚಕ್ರ = ಮೂಲ ಚಕ್ರ – ಉಪ್ಪುನ ಜಾಗ ಬೆರಿತ ತಿರ್ತ ಮೆಯಿ. ಕುಂಡಲಿ (= ಮಂಡಲ) ಪಾಡ್ಡು ಜೆಯಿದಿನ ಸರ್ಪದಂಚ ಉಂಡು. ಪ್ರಕೃತಿ ತತ್ವ. ನಮ್ಮ ಅದೃಷ್ಟದ ಮೂಲ, ನಮ್ಮ ಗುಣ-ಕರ್ಮ ಬಂಧಿತ. ಆವೆನು ಎಚ್ಚರ ಮಲ್ಪೋಲಿ,
ಪ್ರಾಣಾಯಾಮ ಬೊಕ್ಕ ಅಶ್ವಿನಿ ಮುದ್ರೆದ ಸಹಾಯೊಡು. ಯೋಗದ
ದಿಂಜ ತರತ ಸಾಧನ ಕ್ರಮೋಟು. ಎಚ್ಚರ ಮಲ್ತುದು ಆ ಬಿಂದುನು ಮೆಲ್ಲಮೆಲ್ಲನೆ ಮಿತ್ತ
ಕೆಂದ್ರೊಗು ಕೊನೋಡು.
2. ಸ್ವಾದಿಷ್ಟಾನ ಚಕ್ರ = ಕಿಬೊಟ್ಟೆದ ಕೈತಳ್. ಉಂದು ಆತ್ಮ ಸಂಯಮನ ಚಕ್ರ,.
3. ಮಣಿಪೂರಚಕ್ರ = ಬೆರಿ ಮುಳ್ಳುಡು ಪೂವೊಲುಗು
ಸಮಾನಾಂತರವಾದುಂಡು.
4. ಅನಾಹತ ಚಕ್ರ = ಹೃದಯ
ಮಧ್ಯದ ಬಿಂದು,
ಪಣ್ನುಂಡ ನಮ್ಮ ಆತ್ಮ. ಒಂಜಿ ರಹಸ್ಯರೂಪದ
ಆಧ್ಯಾತ್ಮಿಕ ನಾದ (ಓಂಕಾರ) ನಮಕು ಕೇಣ್ನುನು. ನಮ್ಮ
ನಿಜ ರೂಪದ ಪೂರ್ಣಬೋಧೆ ಆಪುನು.
5. ವಿಶುದ್ಧಿ ಚಕ್ರ = ಉಪ್ಪುನ ಜಾಗ ಕಂಠ ಪ್ರದೇಶ.
ಈ ಚಕ್ರೋಗು ಬನ್ನಗ ನಮ್ಮ ಮನಸುಲಾ ಶರೀರಲಾ ಪರಿಶುದ್ದ ಸ್ಥಿತಿಗು ಬರ್ಪುನು.ಪಣ್ನುಂಡ, ನಮ್ಮ ಸಾತ್ವಿಕ ಗುಣ ಹೆಚ್ಚುನು.
6. ಆಜ್ನಾಚಕ್ರ = ಭ್ರೂ ಮಧ್ಯದ – ಕುರುಬುದ ನಡುತ - ಚಕ್ರ.
ಇಡೆಗು ಮುಟ್ಟನಗ ನಮ್ಮ ಆಜ್ಣಾನ ನಾಶ ಆದು ಬುದ್ಧಿ ಪ್ರಕಾಶಮಾನ ಅಪುಣು.
7. ಬಿಂದು ಚಕ್ರ =
ಚಂದ್ರ ಮಂಡಲ ಹಣೆ ಮಧ್ಯದ ಚಕ್ರ ಅಥವಾ ಮಂಡೆದ ಪಿರವುದ
- ಸುಳಿಯಾಕಾರದ ಜಾಗ. ಪೆತ್ತ ಆಯಿತ ಕಂಜಿದ ತರೆ ನಕ್ಕನಗ ತರೆ ಕುಜಲು ತಿರ್ತು ಬಗ್ಗಿನಂಚ
ತೋಜುನು. ಆಯಿದ್ದಾತ್ರ ಇಂಗ್ಲೀಷ್-ಡು ಈ ಜಾಗೊಗು cowlick ಇಂದುದು ಪಣ್ಪೆರು.ಅಮೃತತ್ವದ ಮೂಲ ಉಂದು.
8. ಸಹಸ್ರಾರ ಚಕ್ರ = ಅಂತಿಮ ಚಕ್ರ – ಶಿರಸ್ಸುಡು. ಸಾವಿರ ಎಸಳುದ ಕಮಲದ ರೂಪ. ಬ್ರಹ್ಮ ರಂದ್ರ (ಇಂಗ್ಲಿಷ್: fontanel or fontanelle) ಇಂದುದು ಪಣ್ಪೆರು (ಎಲ್ಯೆ ಜೋಕುಲುಪ್ಪನಗ ತೊಜುಣು). ಆದಿ-ಅನಾದಿ-ಮೂಲ ಚೈತನ್ಯದ ವಿಶ್ವಮೂಲ ಸ್ವರೂಪ, ಪಣ್ನುಂಡ ಪರಮಾತ್ಮ ತತ್ವ ಅಥವಾ ಪುರುಷ ತತ್ವದೊಟ್ಟುಗು
ಪ್ರತಿ ಜೀವಾತ್ಮನ ಕುಂಡಲಿನಿ ಶಕ್ತಿ ಮುಲ್ಪ ಸೇರುದು ಒಂಜಿ ಅಪುಣು.
ಆತ್ಮ ವಿಚಾರ
ಪೂರಾ ಶಕ್ತಿಳು ನಮ್ಮ ದೇಹದ ಉಳಾಯಿಡೆ ಉಂಡು. ವಿಶ್ವ ಮಾತ
ಜೀವಾತ್ಮನ ಜಾಗ್ರತಾವಸ್ಥೆಡು ಉಂಡು. ಆತ್ಮ ವಿದ್ಯೆದ ಗುರಿ ಒಂಜೆ, ಸಾದಿಲು ದಿಂಜ. ಗುರುಕುಳು ಸಾದಿ ತೋಜಾವೆರು. ಗುರು ಕೃಪೆ ಬೋಡು; ಸಾಧನೆ ಆ ವ್ಯಕ್ತಿಗು ಸೇರ್ದುಂಡು. ಶಿಷ್ಯನ ಯೋಗ್ಯತೆ ತೂದು ಗುರು ಕೃಪೆ ಮಲ್ಪುವೆರು. ವಿವೇಕಾನಂದರೆನು ರಾಮಕೃಷ್ಣ ಪರಮಹಂಸೆರು ತಿದ್ದಿನಂಚ.
ನಮ ನಾಡುನು ನಮ್ಮ ನಿಜ ರೂಪೊನು ಸೀದಾ ಸರ್ತ ಸಾದಿಡ್, ಆಂಡ ದೀರ್ಘ ಆತ್ಮ
ಕೇಂದ್ರಿತ ತಪಸ್ಸುಡು. ನಾಡುಲ ವಸ್ತುಲಾ ನಮನೆ, ನಾಡುನಕುಲುಲಾ ನಮನೆ.
ಅಪಗ ನಮಕು ನಮನೆ ಗುರು. ರಮಣ ಮಹರ್ಷಿಳು
ಉಂದೆಕು ಉದಾಹರಣೆ. ಆಂಡ, ಆರ್ ಮದುರೈ ಮೀನಾಕ್ಷಿ ಅಮ್ಮ ಬೊಕ್ಕ
(ಶಿವರೂಪದ) ಅರುಣಗಿರಿನು ಅಪ್ಪೆ - ಅಮ್ಮೆಯಾದ್
ಎಣ್ಣಿಯೆರು. ಇಲ್ಲು ಬುಡಿಯೆರ್. ಅರುಣಾಚಲದ ಗುಹೆಟು ಕುಳ್ದು ತಪಸ್ಸು ಮಲ್ತೆರು.
ಪ್ರಕೃತಿಡ್ ನಮ್ಮ ಗುರುವಾದು ಕೆಲಸ ಮಲ್ಪುನ ಏತೋ ವಿಷಯೊಳು ಉಳ್ಳ. ದಿಗಂಬರ ದತ್ತಾತ್ರಯೆರು ಪ್ರಕೃತಿನು ತೂದು ಅಯಿಟ್ ಉಪ್ಪುನ 24 ಗುರುನಕೆಲಡ ಪಾಠ ಕಲ್ತೆರು. ಈ ಕತೆನು ನಿಕುಳು ಕೇಣ್ದುಪ್ಪರ್. ಭಾಗವತ ಗೀತೆದ ಅಂಗವಾದಿತ್ತಿನ ಉದ್ಧವ ಗೀತೆಡು ಶ್ರೀಕೃಷ್ಣೆ ಉದ್ಧವಗು ಪಣ್ಪೆರ್. ದತ್ತತ್ರಾಯೆರೆಗು ತಿಳುವಳಿಕೆ ಕೊರಿನ ಪ್ರಕೃತಿ
ರೂಪೊಳು: ಭೂಮಿ, ಗಾಳಿ, ನೀರು, ತೂ (ಅಗ್ನಿ) ಚಂದ್ರ, ಸೂರ್ಯೆ,
ಪಾರಿವಾಳ, ಪೆರ್ಮರಿ, ಕಡಲು, ಪಾಂತೆ, ತಿಗ (honey bee), ಆನೆ, ತಿಗತ ನೆಯಿ ಒಟ್ಟು ಮಲ್ಪುನ ಕುರುಬೆ, ಜಿಂಕೆ, ಮೀನು, ಪಿಂಗಲೆ ಪುದರುದ ಸೂಳೆ,
(ಮೀನು ಪತ್ತುನ) ಕಡಲುದ ಕಾವೆ ಅಥವ ಕುರಾರ ಪಣ್ಪಿ ಪಕ್ಕಿ, ಒಂಜಿ ಬಾಲೆ, ಒಂಜಿ ಮದಿಮೆ ಆವಂದಿ ಕಿಶೋರಿ ಬೊಕ್ಕ ಆಳೆನ
ಕಾಜಿ, ಪಗೆರಿ (ಬಾಣ) ಮಲ್ಪುನಾಯಿ,
ಒಂಜಿ ಸರ್ಪ, ಒಂಜಿ ತಾಲೆ (spider), ಬೊಕ್ಕ (ನೇಲೆ ಕಣಜಿಗ (wasp) ಕಟ್ಟಿದಿನ ಮಣ್ಣುದ ಗೂಡುದುಳಾಯಿದ) ಕಣಜಿಗದ ಕ್ರಿಮಿ (ಕತೆದ ವಿವರ ತೆರಿಯೆರೆ ಓದುಳೆ: A Quintessence of Uddhava Gita by Swami Shantananda Puri). 1960ದ
ದಶಕೊಡು, ಭಾರತೀಯ ವಿದ್ಯಾ ಭವನದ ಪಾಕ್ಷಿಕ ನಿಯತಕಾಲಿಕ ಪತ್ರಿಕೆಡ್ಲ
ಈ ಕತೆ ಬತ್ತುದಿತ್ತುನು.
ಕುಂಡಲಿನಿ ವಿದ್ಯೆನು ನಮ್ಮ ಸಾಧನೆಡು ಸ್ವತಃ ಅನುಭವ ಮಲ್ಪೊಡು. ಸಾಧನೆ ಮಲ್ಪನಗ ಕೆಲವರೆಗು ದುಸ್ಪರಿಣಾಮದ
ಅನುಭವಲಾ ಆವು. ಪತ್ತುನ ಸಾದಿ ವ್ಯಕ್ತಿಗತ ಆಯ್ಕೆ.
ಈ ಲೋಕೋಕ್ತಿನು ದುಂಬುದ ಹಿರಿಯೆರು ಲೌಕಿಕ
ಅನುಭವೊನು ಎದುರು ದೀದ್ ಪಣ್ತೆರ ? ಇಜ್ಜಾಂಡ, ಬೆರಿ
ತೋಜಾಂದಿನ ಪಿರವುದ
ರಹಸ್ಯ ಎಂಚಿನ, ಆಯಿತ
ಶಕ್ತಿ ಎಂಚಿನ ಪಣ್ದು ನಾಡುದು ತೂಲೆ ಇಂದುದು ಆಧ್ಯಾಮಿಕ ದೃಷ್ಟಿನು ಎದುರು ದೀದು ಪಣ್ಡುಪ್ಪೆರೆಲಾ ಇಯಾವ ? ಯೋಗ ಸಾಧನೆದ
ಮಾರ್ಗೊಡು ತಾನ್ ಏತ್ ದೂರ ಪೋತೆ ಇಂದುದು
ಏರ್ಲಾ ಪಣ್ಪುಜೆರ್. ಅಂಚ ಪಣಿಯೆರ್ಲಾ
ಬಲ್ಲಿ. ಏತ್ ಕಲ್ತುಂಡಲಾ ನಮ
ಮಾತ ಅಜ್ನಾನಿಲೆ. ಮಾತ
ಸಾಧು ಸಂತೆರ್ಲಾ ಆಕೆಲ ಅಜ್ನಾನೊನು ದೂರ್ದು.
ಜ್ನಾನ-ಭಕ್ತಿ-ವೈರಾಗ್ಯ ಕೋರುಲೆ ಇಂದುದು ದೇವೆರೆಡ ನಟ್ಟುವೆರು. ಎನ್ನ ಆಯತಿಕೆದ
ಮಿತ್ತುಡ್ ಈ ಗಾದೆಗು ಅರ್ಥ ಕೋರಿಯೆರ ಮಲ್ತಿನ
ಎಲ್ಯ ಪ್ರಯತ್ನ. ಆಯಿಟ್ ತೋಜಿದು ಬತ್ತಿನ
ತಪ್ಪುಳು ಮಾತ ಎನ್ನವು.
- ಹೊಸಬೆಟ್ಟು ವಿಶ್ವನಾಥ, ಪುಣೆ
