54. ಬೀಜ ಎಡ್ಡೆ, ಕಂಡ ಕೇದೆಲ್



ತುಳುಟು, ವೃತ್ತಿನು ದೆರ್ತು ತೋಜಾವುನ ಪದೋಳು, ನುಡಿಗಟ್ಟುಳು ದಿಂಜ ಉಳ್ಳ.    ಬೆನ್ನಿದ ಒಂಜಿ ನುಡಿಗಟ್ಟು:   ದತ್ತಿನಂಚನೆ ಬಿತ್ತೋಡು.    ನೆತ್ತ ಮಿತ್ತುಡ್ ಒಂಜಿ ಲೇಖನೊನು ಈಮಾಲೆದ ಸುರುಟೇ ಬರೆದುಲ್ಲಾ (ಆಗಸ್ಟ್ 2016).   

ಬೀಜ ಎಡ್ಡೆ,   ಕಂಡ ಕೇದೆಲ್
ಬೆನ್ನಿದ ಮಿತ್ತುಡು ನನಲಾ ಒಂಜಿ ನುಡಿಗಟ್ಟುನು ತೂಯೆ. ಕುಡೊಂಜಿ ಪದರಾಶಿ: ಬೀಜ ಎಡ್ಡೆ, ಕಂಡ ಕೇದೆಲ್ (ಪುಟ 2330 ತುಳು ನಿಘಂಟು). ಸಾಧರಣವಾದು ಉಂದು ಬೆನ್ನಿ ಸಾಗುವಳಿಗು ಹೊಂದುನು. ಮಿತ್ತುಡು ತೋಜಿದು ಬರ್ಪಿನ ಅರ್ಥ ಪಣ್ಪಿನಾಂಡ, ಇಂಚ ಪಣೋಲಿ:   ಬೀಜಯೋಗ್ಯಜಾತಿದ; ಆಂಡ ಅವೆನು ಬಿತ್ತುನ ಕಳತ ಮಣ್ಣು ನಾತ ಬರ್ಪುನು ,ಬಿತ್ತರೆ ಎಡ್ಡೆ ಇಜ್ಜಿ, ದಿಂಜ ಮಯಿಲೆ ಪತ್ತುದು ನಿಂದು”. ಕಂಡೊಗು ಪೊಲ ಪಣ್ಪಿ ಸುಬುದ  ಉಂಡಾತುನು ಅರ್ಥೊಡ್.

ದ್ವಂದ್ವಾರ್ಥ
ನುಡಿಗಟ್ಟು ಒಂಜಿ ಭ್ರಮೆನು ಪುಟ್ಟಾವುನು.  ಬೆನ್ನಿದ ಕಳ (ಕಂಡ)  ಕೇದೆಲ್“,  ಪನ್ನುಣ್ಡ ಮಯಿಲೆ,  ಹೀನ ಇಂದುದು ಪಣ್ನಗ, ಒಂಜಿ ಪರಿಹಾಸ್ಯದ  ಮೂರಿ ಬರ್ಪುನು . ನಿಷೇದರೂಪದ ಅರ್ಥ ತೋಜಿದು ಬರು – ಇಂಚಿನ ಕಂಡೊಡು ಬಿತ್ತಡೇ  ಪಣ್ದು.
ಇಂಚ ವಿಚಾರ  ಮಲ್ಪನಗ, ಯಾನ್ ದ್ವಂದ್ವೊಗು  ಬೂರಿಯೆ.  ಬರೆವೆರ ದೆತ್ತಿನ  ಕೈ  ಅಡೆಗೇ  ಉಂತುನು . ಅಪಾರ್ಥೊನು ಬರಿಕ್ದೀದು,  ನೆಕ್ಕು  ಬೇತೆ  ಅರ್ಥಲಾ  ಕಟ್ಟೋಲಿಯಾ  ಇಂದುದು ತೂಕನೆ?   “ದತ್ತಿನಂಚನೆ ಬಿತ್ತೋಡು  - ಬರೆವೊಡು -  ಅಂದತ್ತೆ !
ಬೀಜ ಪ್ರಕೃತಿ ಜನ್ಯ ಮೂಲ ಜೀವಾಣು ಉಂದು.     ಉಂದೇ ಮೂಲ ಕಾರಣ  ಮರುಸೃಷ್ಟಿಗು ಪ್ರಾಣಿಲೆಡು ಬೊಕ್ಕ ಸಸ್ಯಜಾತಿಲೆಡು .    ಣ್ ಬೊಕ್ಕ  ಪೊಣ್ಣು  ಒಂಜಾಪಿ  ಕಾಲೊಡು ಬೀಜದ  ಉತ್ಪತ್ತಿ  ಅಪುಣು  -   ಪೂವಾದು, ಕಾಯಿಯಾದು,  ಪರುಂದುದು  ಆಯಿತುಳಯಿದ  ಬೀಜಾದು.    ಎಂಚಿನ  ಬೀಜ? ಎಡ್ಡೆಬೀಜ.     ಮುಲ್ಪ ಬೀಜ” ಪನ್ನುಣ್ಡ ಬಾರುದ ಬೀಜ“ ಇಂದುದು ಅರ್ಥ ಮಲ್ಪೋಲಿ (ಕರಾವಳಿದಕುಳು), “ಕೇದೆಲ್ಕಂಡ    ಸಬುದೊಳು  ಬರ್ಪಿನೆಟ್ಟು ಡ್ದಾತ್ರ.
ಕಂಡ ಬೀಜ (ವೀರ್ಯ)  ಬಿತ್ತುನ  ಕ್ಷೇತ್ರ,  ಪನ್ನುಣ್ಡ  ಬೀಜ  ಬುಳೆವೆರ  ಆಪಿನ  ಫಲ್ವತ್ತುದ ನೀರು ಕೆಸರುದ  ಜಾಗ.     ಅವುಲಾ ಎಡ್ಡೆ ಉಪ್ಪೊಡು - ಬೀಜ ಮುಂಗೆ ಬರೆರ ಬೊಕ್ಕ ಬೀಜೊಡ್ಡು  ದೈಯಾದು, ಮರವಾದು, ಪೂ ಬತ್ತುದು ರೋಗ ಪತ್ತಿನಂಚದ ಬೀಜ ಪುಟ್ಟೆರ .
ಕೇದು ಬಾರುಗು  ಬೋಡಾಯಿನ  ವಿಶೇಷವಾಯಿನ  ವಸ್ತು  ಮಣ್ಣು – ಕೆಸರುಮಣ್ಣು,  ಬೀಣೆಮಣ್ಣು.  ಮಣ್ಣು ಪುಟ್ಟುನ ಕತೆನು ತೆರಿಯೊಣುಗ.  ಕೋಟ್ಯಾಂತರ  ವರ್ಸ ಕಾಲೊಡ್ಡು  ದುಂಬು  ಸೂರ್ಯಗ್ರಹೊಡ್ಡು  ಪುಡಾದು ರಟ್ಟುದು ಬಯಿದಿನ,  ಸೂಜಿಕಲ್ಲುದ ಶಕ್ತಿ  ಇತ್ತಿನ  ತುಂಡು ನಮ್ಮ ಭೂಮಿ ಗ್ರಹವಾಂಡು.  ಆತುಂಡು ಉರಿಯೊಂದೇ  ಇತ್ತುದುಲಾ  ವಾರಸ  ಪರತೊಂದು ಇತ್ತುನು ಸುಮಾರು  ಕೋಟಿ  ವರ್ಸ  ಕಾಲ.    ಕ್ರಮೇಣ  ಭೂಮಿದ  ಮಿತ್ತಮೈ  ಚಪ್ಪೆ  ಅಪುಣು  ವಾತಾವರಣೋಡ್ಡು  ಆಪೀನ ಕ್ರಿಯೋದ್ದಾತ್ರ.   ಕಾಲ ಕಾಲೊಗು  ಭೂಮಿಗು  ಬೂರಿನ  ನೇಲ್ಯ ನೇಲ್ಯ   ಉಲ್ಕೆಗಳೆಡ್ಡು  ನೀರು  ಉಂಡಾಪುಣು.  ಮುರ್ಕಿದಿನ  ಭೂಮಿ  ಅಲ್ಪಅಲ್ಪ  ನೀರುದ  ಮಿತ್ತು  ಬರೆರ  ಸುರುವಾಪುಣು.  ಕಾಲಾಂತರೊಡು,  ಅನುಕೂಲ  ವಾತಾವರಣ  ಇತ್ತಿನೆಡ್ಡು ಜೀವಿಜಾತಿಳು  ಉಂಡಾಪುನು.
ಅಂಚ, ನಮ್ಮ ಭೂಮಿದ  ಮೇಲ್ಮೈತ  ಮಣ್ನೊಂಜಿ ಅದ್ಭುತ ವಸ್ತು. ಭೂಮಿದ ವಿವಿಧ ಸ್ತರೊಡು ಸುತ್ತು ಪಾಡೊಂದು  ಉಂಡು.  ನಮ್ಮ ಭೂಮಿ ಅತ್ತಾಂದೆ ನಮ್ಮ ಆಕಾಶಗಂಗೆದ ಮಾತ  ಗ್ರಹೊಟುಲಾ ಇಂಚನೆ  ಸ್ಥಿತಿ ಉಂಡುಂದು ಪಣ್ಪೆರು.   ಅಂಚನೆ   ಮಹಾದ್ವಿಶ್ವದ  ಮಾತಾ  ಆಕಾಶಗಂಗೆಡುಲಾ ಇಂಚನೆ ಉಪ್ಪು. ಮಣ್ಣುದ ಪದರುಗು ಸಾಯಿಲ್ ಹೊರೈಝನ್ (soil horizon)” ಇಂದುದು ಪಣ್ಪೆರು.  ಉಂದೆಟ್ ಸಾರಜನಕ ಖನಿಜಾಂಶ ದಿಂಜಿದಿನು.  ಕಾಲಾಂತರದ ರೂಪ ಪರಿವರ್ತನೆಡು ಉಂಡಾಪಿನ  ವಿಶೇಷವಸ್ತು ಸ್ವಾಭಾವಿಕ ವಸ್ತು.
ಮಣ್ಣುದ  ಮೂಲ, ಪಾದೆಕಲ್ಲು.   ನೆಲತ  ಅಡಿತ ಮೂಜಿನೆ  ಪದರು ಪಾದೆ = ಬಂಡೆಕಲ್ಲು  (C-Horizon).  ಕಾಲಕ್ರಮೇಣ ಗಾಳಿ - ದೊಂಬು - ಬರ್ಸದ ಕಾರಣೋಡು  ಆಯಿತ  ಮಿತ್ತುದ ರಡ್ಡನೆ ಪದರು (Sub Soil B-Horizon) ಉಂಡಾಪುಣು.   ಮಣ್ಣು ಜಿಗುಟು ಮಣ್ಣು  (clay). ನೆಟ್ಟು ಸೂಕ್ಷ್ಮಜೀವಾಣುದ  ಜೈವಿಕ  ಕೆಲಸ ಕಡಿಮೆಯಾದು  ಪೌಷ್ಟಿಕ ಅಂಶೊಳು ಕಡಿಮೆ ಪ್ರಮಾಣೋಡು ಉಳ್ಳ.  ಜಿಗುಟು ಮಣ್ಣುಗು ಪೊಯ್ಯೆ (sand) ಸೇರಿಸಾವೆರು – ಗಾಳಿ -      ನೀರು ಪರಪೆರ ಗಾತ್ರ.  ನೆತ್ತ ಮಿತ್ತುದ, ಪನ್ನುಣ್ಡ  ಭೂಮಿದ ಮೇಲ್ಮೈತ  ಮುಖ್ಯಪದರು (Sub-Soil)-ಗು A-Horizon ಇಂದುದು ಪಣ್ಪೆರು.     ಮಣ್ಣುಡು ಕುರಿದಿನ ಸಾವಯವ  ವಸ್ತುಲು ಜಾಸ್ತಿ.     ಅಂಚಾದು ಬಲ ಕೊರ್ಪಿನ ಪೋಷಕಾಂಶೊಳು ಸೇರ್ದುಂಡು.      ಮಣ್ಣು ಭೂ ಸವೆತ ಅತ್ತಾವಂದೆ,  ರಾಸಾಯನಿಕವಾದು ಬೊಕ್ಕ ಪರಿಸರದ ಮಿತ್ತು ಆಪಿನ ಕ್ರಿಯೆಡ್ಡು ಗುಡ್ಡಕಾಡುದ ಬಂಡೆಕಲ್ಲುಳು ಪುಡಾವುದು, ನದಿ ನೀರುಡು ಕೊಚ್ಚೊಂದು, ಹವಾ ಪರಿಣಾಮೊದ್ದು  ಮಾರ್ಪಾಡಾದು  ಉಂಡಾಪುನು. ಭೂಗೊಳ, ಜಲಗೋಳ, ವಾಯುಗೋಳ  ಬೊಕ್ಕ  ಜೀವಗೋಳದೊಟ್ಟುಗು  ಕೂಡ್ಡು ಆಯಿನ ಮಣ್ಣು ಮೂಲ ಶಿಲೆಡ್ಡು ಬೇತೆ ಗುಣೋನು ಪಡೆತೆನುನು.    ಉಂದುಘನ,  ಅನಿಲ ಬೊಕ್ಕ  ದ್ರವರೂಪೋಡು  ಉಪ್ಪುನ ಖನಿಜ ಬೊಕ್ಕಇಂಗಾಲ (carbon) ಮಿಶ್ರಣವಾದುಂಡು.    ಮಣ್ಣುದ ಕಣೋಳು ಒಂಜಿ ಕೊಂಜಿ ಸಡಿಲವಾದು ಒಟ್ಟೆಲು ಉಪ್ಪುನು.  ಈ‌ ಒಟ್ಟೆಡ್ ಗಾಳಿ ಇಜ್ಜಾಂಡ ನೀರು ಪಸರೊಂದುಪ್ಪುನು.    ಅತ್ತಾವಂದೆ, ಮಣ್ಣುಪ್ಪುನ ಬಂಡೆಕಲ್ಲುದ ಮೂಲ ಖನಿಜಾಂಶೋಳು, ನೀರುದ ಮುಖಾಂತರ ಇಜ್ಜಾ ಮರಮಟ್ಟು, ಪಕ್ಷಿ-ಪ್ರಾಣಿಲೆನ  ಮೂಲಕ  ಒಂಜಿ  ಜಾಗುದ್ದು  ಬೋಕ್ಕೋಂಜಿ  ಜಾಗುಗು  ನಿರಂತರ ಪೊವೊಂದುಪ್ಪುನು.

ಭೂಸಾಗುವಳಿ ಸಾಗುವಳಿದ ರೀತಿನು ತೆರಿಯೊನುಗ.    ಇಂದೆತ ಮಿತ್ತ್ ಎಚ್ಚ ಬುಡ್ಪಾವುದು ಪಣ್ಪನ  ಅಗತ್ಯ ಇಜ್ಜಿ.    ಬೀಜ ಪಾಡುನೆತ್ತ ದುಂಬುದಾಯೆ ಗುದಪ್ಪೊಡು?  ಬೀಜ ಎಡ್ಡೆ ಇತ್ತುಣ್ಡ ದಾನೆ, ಅವು ಬುಳೆಪಿ ಕಂಡಲಾ ಸರಿಯುಪ್ಪೊಡು.   ಆಂಗ್ಲ ವೈದ್ಯಕೀಯ  ಶಸ್ತ್ರಕ್ರಿಯೆ ಮಲ್ಪುನ (Surgeon) ಡಾಕ್ಟರ್ ಒರಿ  -  ಸ್ಟೀಫನ್ ಪಾಗೆಟ್  (Stephen Paget) ಕಾನ್ಸರ್ (cancer) ಬೀಜಾಣು ಪರಡುನ  ವಿಷಯೊಡು ಬರೆವನಗ  ಇಂಚ  ಪಣ್ತೆರು (1889):
   When a plant goes to seed, its seeds  are carried to all directions, but  they can only live and grow  if they fall on congenial soil”.

ನೆತ್ತ ಅರ್ಥ:  ಒವುಲಾ ಸಸ್ಯ ಬೀಜ  ಬುಳೆವೆರ ಎಡ್ಡೆ ಮಣ್ಣು ಬೋಡು.  ಆರ್ ಹೋಲಿಕೆ  ಗಾತ್ರಬೀಜ - ಮಣ್ಣುದ ಪಾತೆರೊ ಪಣ್ತೆರು.  ಕ್ಯಾನ್ಸರ್ ವಿಷಯೊಡು  ಪಣ್ನಗ, ಅವುಳು ಇಂಚಿನ  ಒಗ್ಗುನ (congenial) ಸಂಗತಿನು ಕಡಿಮೆ ಮಲ್ಪೊಡ್ ಇಂದುದು ಪಣ್ತೆರು. ನಮ್ಮ, ಬೆನ್ನಿಡ್ ಮಣ್ಣುದ ಸಾರೊನು ಎಚ್ಚ ಮಳ್ಪೊಡು.  ಆಯಿಕಾತ್ರ  ದಪ್ಪುನ ಅಗತ್ಯ ಉಂಡು.    ಅಪಗ:  (1) ಮಣ್ಣು ಅಡಿಮೇಲಾದು ಮೆದು ಅಪುಣು, (2) ಮಣ್ಣುದ ಉಳಯಿ ಗಾಳಿ ಸೇರುನು, (2) ಸೂಕ್ಷ್ಮಾಣು ಜೀವಿಲು  ಮಣ್ಣುದುಳಯಿ ಸೇರ್ದಿನ  ವಸ್ತುಳೆನು  ಕುರಿಪಾವುದು ಮಣ್ಣು ಮಲ್ತುದು ಮಣ್ಣುನು ಕುಡಲಾ ಫಲವತ್ತು ಮಲ್ಪುನು,   (3) ಮಣ್ಣುದ ನೀರುದ ಪಸೆನು (ತೇವೊನು) ಹೆಚ್ಚ ಮಲ್ಪುನು, (4) ಮುಂಗೆ ಬತ್ತಿನ ಬೀಜದ ಬೇರು ಸರಾಗವಾದು  ತಿರ್ತು ಮುಟ್ಟ ಬುಳೆವುನು,  (5) ಕಂಡೊಡಿತ್ತಿ  ಬೊರ್ಚಾಂದಿನ  ಕಳೆಕುಲೆನು  ದೆತ್ತುದು  ಭೂಮಿದುಳಯಿ ಪಾಡುನು.
ದಪ್ಪೆರ ಬೋರಿಯಾ  ಎರುನು ಉಪಯೋಗ ಮಲ್ಪುವೆರು. ಕೈಯಿಟು ಸೀದಾ ಬೀಜೊನು ಬಿತ್ತುವೆರು.   ಇಜ್ಜಾಂಡ, ಬೇತೆನೆ ನೇಜಿದ  ಕಂಡೊಡು  ಬೀಜ ಬಿತ್ತುವೆರು.   ಬುಳೆ ಮಲ್ಪುನ ಕಾಲೋಗು ನೇಜಿನು  ದೆತ್ತುದು ದತ್ತಿನ ಕಂಡೊಡು ನಡ್ಪೆರು.  
ಮೂಲಪ್ರಶ್ನೆ
ಮಣ್ಣುಲಾ ಬೋಡು,  ಬೀಜಲಾ ಬೋಡು  ಬೇತೆ ಬೇತೆ ಸಸ್ಯೊಳು  ಬುಳೆವೆರ.    ಆವೇ ಮಣ್ಣು, ಆಂಡ  ಪೂಬಣ್ಣ,  ಬೀಜ ಬೊಕ್ಕ ರು ಚಿಟು ತರಾವಳಿ.    ಮರದುಂಬಾ  ಬೀಜದುಂಬಾ (ತೆತ್ತಿ- ಪೇರಡೆದ ಮಿತ್ತುದ  ಸವಾಲುದಂಚ)?   ಪ್ರಶ್ನೆಗು ಚರ್ಚೆ ನಾಲ  ನಡತ್ತೊಂದೆ ಉಂಡು ಸರ್ವತ್ರ;   ಉತ್ತರ  ತಿಕ್ಕುಜಿ.      ಪರಸ್ಪರ,    ಒಂಜಿ  ಉಪ್ಪಂದೆ  ಬೊಕ್ಕೊಂಜಿ ಉಪ್ಪೆರ ಸಾಧ್ಯ ಇಜ್ಜಿ.        
ಆಧ್ಯಾತ್ಮಿಕ ದೃಷ್ಟಿ ಮಾತ  ದೇವೆರೆನ  ಸೃಷ್ಟಿ ಇಂದುದು  ಪಣ್ಪೆರ್ ಅತ್ತೆ!       ಬೀಜನೇ  ದುಂಬುಂದು ಪಣೋಲಿಯ?       ಮಾತೆಕ್ಲಾ  ಮೂಲ ಬೀಜಮಂತ್ರ  ಓಂ”.     ಕ್ಲೀಂ,   ಶ್ರೀ,  ಂ, ಹ್ರೀಂ -  ಜಗನ್ಮಾತೆನ ರೂಪ ಭೇದೊಳೆನು ನೆನಪೆನಗ ಪಣ್ಪೆರ್.  ಬೀಜ ಮಂತ್ರೊಳೆಡ್ಡು  ಅಕುಳಕುಳು  ಎನ್ನಿನ ದೇವೆರೆನ ಸನ್ನಿಧಾನದ ಪ್ರಾಪ್ತಿ ಅಪುಣು.     ಮರ ಉಂಡು ಪಣ್ಪಿನಲಾ,  ದೇವೆರು ಉಳ್ಳೆರಿಂದು ಪಣ್ಪಿನಲಾ ಒಂಜೆ.    ಬೀಜ ಸಮಯದ  ಧರ್ಮೋಗು ಒದಗುದು ಬತ್ತಿನವು.     ನಮ್ಮ ಭೂಮಿದ  ವಿಷಯೊಗು ಬನ್ನಗ,   ಪ್ರಕೃತಿ  ತತ್ವೊಡು ತಾನಾದು ಒದಗಿನವು ಜೀವ ಬೀಜೋಲು; ಬೇತೆ ಆಕಾಶಕಾಯೊಡ್ಡುಲಾ  ಬತ್ತುದುಪ್ಪು  ಜಗತ್ಕಾರಣೋಗು ದೇವೆರು ಕಾರಣ.    ಕಾರಣೋಳು ರಡ್ಡು.  ವಸ್ತುಯಾ ಸಾಧನ ಸಂಪತ್ತು (ಪ್ರಕೃತಿ) ಬೊಕ್ಕ ಸಾಧಿತ ಫಲ  (ಜೀವಸಂಕುಲ)  -  ಲೌಕಿಕ  ಉದಾಹರಣೆ:   ಮಣ್ಣು ಬೊಕ್ಕ  ಕರ.    ಕುಂಬಾರೇ  ಉಳ್ಳೆನೆ ಉಳ್ಳೆ  ಬರಿಟ್,  ತೋಜಂದೆ.     
ಬೆನ್ನಿದ ವಿಸಯೊಗು ಪಿರತಿರುಗನಗ ನಮ್ಮ ಬೊಂಡು ಕಂಡ ಆಂಡ, ಸದ್ವಿಚಾರೊಳು ಎಡ್ಡೆ ಬೀಜ. ಹಾಳು ವಿಚಾರೊಳು ಪೊಟ್ಟುತೆಟ್ಟು ಬೀಜೊಳು.  ಜೋಕುಲೆನ ಮಂಡೆ ದಪ್ಪಂದಿ ಕಂಡಂಚ. ಕಂಡೊನುದ ಪ್ಪುನವು, ಅಪ್ಪೆ-ಅಮ್ಮೆರ, ಗುರುಕುಳೆನ, ಸಮಾಜ  ಸುಧಾರಕರೆನ ಕೆಲಸ. ದೇಶದ ಉನ್ನತಿಗು ಇಂಚಿನ ಸಂತತಿಳು ಅಗತ್ಯ.
ಬೆನ್ನಿದಾಯಿ ಬರಲಯೆ ಬೆನ್ನಿದಾಯೆ ಬೇಗ ಬರಲಾಯೆಗ!    ಸದ್ಯದ  ಪರಿಸ್ಥಿತಿನೇ ಬೇತೆ.    ರೈತೆರು  ಜೀವ  ದೆತ್ತೊಂದುಳ್ಳೆರ್  ಸಾಲದ  ಪುದೆನು ದೆರ್ಪೆರ ತೀರಂದೆ.   
ಕೈಗಾರಿಕಕರಣ  ಬೊಕ್ಕ ನಗರೀಕರಣೋಡ್ಡು  ಇತ್ತೆ ಕಂಡೊಡು ಕೆಲಸ ಮಲ್ಪೆರ ಜನ ತಿಕ್ಕುಜೆರು;   ತಿಕ್ಕಿಯೆರ್ಡಾ, ಅಕೆಲ ಮಜೂರಿ  ಜಾಸ್ತಿ.    ಅಂಚಾದು ನಮ್ಮ ಕರಾವಳಿಡ್  ಎಚ್ಚಾದು    ಕೃಷಿ  ಭೂಮಿಳು ಬಂಜರು ಬೂರ್ದು  ಪೊವೋದುಂಡು.   ತಾಕತ್  ಇತ್ತಿನಕುಳು ದಪ್ಪುನ,  ನಾಟಿದ  ಬೊಕ್ಕ  ಖಟಾವುದ  ಮಾತ  ಕೆಲಸೊಲೆನು  ಯಂತ್ರ ಮುಖಾಂತರ  ಮಲ್ಪುವೆರು.
ಒಂಜಿ ಕಾಲೊಡು ಪಚ್ಚೆಪೈರುದ ಕಂಡೊಳು ತುಳುನಾಡುದ ಉದ್ದಗಲೋಗುಲಾ ತೂವೆರ ತಿಕ್ಕೊಂದಿತ್ತುನು. ಇತ್ತೆದ ಜೋಕುಲೆಗುಲೆಗು    ಭೂಸಾಗುವಳಿದ ವಿಷಯ ಚೂರುಲಾ  ಗೊತ್ತುಜ್ಜಿ.    ಇತ್ತೆ, ಆಟಿದ ತಿಂಗೊಳುಡು ಕೆಸರುಡು ಒಂಜಿ ದಿನಪಣ್ದು ಕಂಡೊಡು ಗೊಬ್ಬುವೆರು, ನೇಜಿ ನಡ್ಪಿನ ಪ್ರಾತ್ಯಕ್ಷಿಕೆ ಮಲ್ಪುವೆರು – ಜೋಕುಲೆ ಗಾತ್ರ. ತುಳುನಾಡುಗು ವಿಶೇಷವಾಯಿನ ಆಟಿದ ತಿಂಗೊಳುದ ಒಣಸು ತಿನಸುದ ಅಟಿಲುದ ಪರಿಚಯ ಜೋಕುಲೆಗು ತೆರಿಪಾವೆರು.   ಶಾಲೆ, ಸಾಮಾಜಿಕ  ಸಂಘ ಸಂಸ್ಥೆಳು  ಇಂಚಿನ ಕೆಲಸ ಮಲ್ಪುವೆರು.    ಕೆಲವೆರು  ಪುದರು  ತಿಕ್ಕೆರಾತ್ರ  ಮಲ್ಪುನಂಚ  ತೊಜುನು.   ಅವು ಎಂಚಲ  ಉಪ್ಪಡು ಉದ್ದೇಶ  ಎಡ್ಡೆ  ಉಂಡತ್ತೆ!

ಸಾವಯವ  ಕೃಷಿ ಪದ್ಧತಿ
ಇತ್ತೆ ರಾಸಾಯನಿಕ ಗೊಬ್ಬರೊಡ್ಡು, ನಮ್ಮ ದುಂಬುದ ಪದ್ಧತಿ ಪ್ರಕಾರ ಸಾವಯವ ಗೊಬ್ಬರ ಪಾಡ್ಡು ಸಾಗುವಳಿ ಮಲ್ಪೆರ ಒತ್ತು ಕೊರ್ಪೆರು.     ಇಂಚಿನ ಒಂಜಿ  ಪ್ರಯೋಗ ಸಾಂಗತ್ಯ  ಸಹಜೀವನ ಗೃಹ  (Sangatya Commune – An experiment in sustainable living)  ಕಾರ್ಕಳದ ಕೈತಲ್ದ ನಕ್ರೆ ಗ್ರಾಮೊಡು  ಡಾಕ್ಟರ್ (ಪ್ರೊಫೆಸರ್) .ಶ್ರೀ ಕುಮಾರ್ ಶ್ರೀನಿವಾಸ ಬೊಕ್ಕ ಅರೆನ ಮಿತ್ರ ಬಳಗದಕುಳು ನಡಪಾವೊಂದುಳ್ಳೆರು.    ಎಚ್ಚಿನ ಮಾಹಿತಿಗು ಅರೆನ ನೆಟ್ಜಾಲೋನು (ವೆಬ್ಸೈಟ್ - ಜಾಲತಾನ) ತೂಲೆ: https://www.ecologise.in.  

ಕಡೆತ ಪಾತೆರೊ
ದವಸ, ಧಾನ್ಯ, ತೋಟಗಾರಿಕೆ, ಹೈನಗಾರಿಕೆ, ತಿಗೆತದ ಪಾಲನೆ, ಮೀನು ಪತ್ತೋಣ, ಪಶುಪಾಲನೆ – ಉಂದು ಪೂರಾ ವ್ಯವಸಾಯದುಳಯಿಡೇ ಬರುಪುಣು. ಸರಕಾರದ ಸಹಾಯ ನೆಕ್ಕ್ಯಾಪಲಾ ಉಪ್ಪೊಡು. ಕೇದೆಲ್ ಮಣ್ನಣ್ಡ  ಸಾರಯುಕ್ತ ಮಣ್ಣು.    ನಾದೆಲ್ ಮಣ್ಣುಂದು  ತಾತ್ಸಾರ ಮಲ್ಪೆರ ಅವಂದು.     ಪೊಲೊಟು, ನೀರುಡು  ಪೊರ್ಮುನಯನು  ತಿರಸ್ಕಾರ ಮಲ್ಪುನ ಕಾಲ ಕರಿದು ಪೋತುನು. 

- ಹೊಸಬೆಟ್ಟು  ವಿಶ್ವನಾಥ   (ಪುಣೆ)    

No comments:

Post a Comment